Kwibuka 30: Ingaga za siporo zose zigiye gutegura amarushanwa yo kwibuka

  • SHEMA IVAN
  • Mata 12, 2024
  • Hashize ukwezi 1
Image

Komisiyo ishinzwe gutegura amarushanwa yo Kwibuka Jenoside yakorewe Abatutsi mu 1994 muri Komite Olempike y’u Rwanda, yatangaje ko uyu mwaka ishaka ko federasiyo 30 zategura iyi mikino mu rwego rwo kuyihuza n’imyaka 30 ishize iyi Jenoside ihagaze.

Kuva tariki ya 7 Mata 2024, u Rwanda rwinjiye mu minsi 100 yo kwibuka ku nshuro ya 30 Jenoside yakorewe Abatutsi mu 1994 aho yahitanye abasaga miliyoni imwe.

Muri siporo, hari amarushanwa yo kwibuka Abatutsi bishwe muri Jenoside ategurwa n’amashyirahamwe y’imikino itandukanye buri mwaka, kandi yose akaba mu gihe cyagenwe hagati ya Mata na Nyakanga.

Kuri ubu, hashize imyaka 11 Komite Olempike y’u Rwanda, ku bufatanye na Minisiteri ifite Siporo mu nshingano, itegura amarushanwa yo Kwibuka buri mwaka, “aba agamije kwibuka aba-sportifs, abakinnyi, abatoza n’imiryango yabo bose bishwe muri Jenoside yakorewe Abatutsi mu 1994 no gutanga ubutumwa ko ayo mahano adakwiye kuzongera kuba ukundi.”

Umuyobozi wa Komisiyo ishinzwe gutegura aya marushanwa muri Komite Olempike y’u Rwanda, Sharangabo Alexis OLY, yavuze ko ari igikorwa kigenda gikura buri mwaka.

Ati “Ni ibikorwa ingaga za siporo zitegura ku matariki dushyiraho, akenshi biba ari ukuva tariki ya 14 Mata kugeza mbere yo Kwibohora (mbere ya Nyakanga). Mbere barabikoraga, ariko mu 2013 ni bwo cyatangiye gutegurwa n’amashyirahamwe ashamikiye kuri Komite Olempike y’u Rwanda. Mu mwaka ushize cyateguwe na federasiyo 18, hari hiyongereyeho eshatu ugereranyije n’umwaka wa 2022.”

Mu 2023, amashyirahamwe 18 muri 35 agize Komite Olempike y’u Rwanda ni yo yateguye aya marushanwa, Komite y’Igihugu y’Imikino y’Abafite ubumuga (NPC Rwanda) iteguramo abiri.

Sharangabo yavuze ko kuri iyi nshuro, mu 2024, bifuza ko amashyirahamwe azategura aya marushanwa yagera kuri 30 bikajyana no kuba u Rwanda rwibuka ku nshuro ya 30.

Ati: “Ni igikorwa giteguye neza, twizera ko uyu mwaka bizasumba uko byagenze mu mwaka ushize. Turateganya gushaka federasiyo zigera kuri 30 zitabira iki gikorwa. Ubushize zabaye 18, ntibyoroshye kugira ngo ubone izindi 12, ariko turakora ibishoboka turebe ko zagera kuri 30 kuko bihurirana n’imyaka 30 twibuka Jenoside yakorewe Abatutsi.”

Amashyirahamwe yateguye amarushanwa yo kwibuka mu 2023 mu mikino irimo koga, amagare, Golf, Triathlon, Badminton, Rugby, Tennis, Fencing, Karate, TableTennis, ARPST, Handball, Skating, GoalBall, Cricket, Sitting Volleyball, Kungfu Wushu, Baskteball, Iteramakofe na Volleyball, aho arindwi muri yo yitabiriwe n’amakipe yaturutse hanze y’u Rwanda.

  • SHEMA IVAN
  • Mata 12, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE