Kurwanya ruswa ni urugendo rusaba ubufatanye- Umuvunyi Mukuru

  • Imvaho Nshya
  • Nyakanga 13, 2023
  • Hashize amezi 11
Image

Gukumira no kurwanya ruswa ni inshingano ya buri wese kandi ni urugendo rusaba ubufatanye, kuko urwego rumwe ntirwabishobora rwonyine.

Ubu butumwa bwatanzwe n’Umuvunyi Mukuru Nirere Madeleine ndetse n’abandi bayobozi batandukanye babugarutseho ubwo hizihizwaga Umunsi Nyafurika wo kurwanya ruswa kuri uyu wa 12 Nyakanga 2023.

Nirere Madeleine yibukije ko kurwanya ruswa bisaba ubufatanye bw’inzego zose.

Ati: “Ruswa ni icyaha kimunga ubukungu kandi ni imwe muri gahunda Leta ishyiramo imbaraga mu kurwanya ruswa kuko kuyirwanya ni urugendo kandi bisaba ubufatanye bw’inzego zose”.

Yakomeje asobanura kandi ko ruswa ari ikibazo kibangamiye Isi yose by’umwihariko Umugabane w’Afurika.

Yagize ati: “Umugabane w’Afurika utakaza umutungo mwinshi bitewe na ruswa. Imibare igaragaza ko Afurika itakaza buri mwaka amafaranga ajya mu bindi bihugu mu buryo budakurikije amategeko angana na miliyari 88,6 z’amadolari y’Amerika”.

Uko kohereza hanze y’umugabane amafaranga mu buro busadobanutse bikomeza gutuma Umugabane w’Afurika udatera imbere uko bikwiriye nk’uko byakomeje bisobanurwa n’inzego zitandukanye.

Nirere yagize ati: “Murebe icyo ayo mafaranga yagakoreshejwe ateza umugabane imbere ariko akaba yoherezwa mu buryo bunyuranyije n’amategeko mu bihugu biherereye ku yindi migabane.  Ingaruka za ruswa ntizigereranywa”.

Gusa u Rwanda ntirwatereye agati mu ryinyo, kuko hashyizweho ingamba zigamije guhangana no kuyirwanya.

Mu kungurana ibitekerezo, hahurijwe ku kuba kurwanya ruswa ari urugendo bikaba bisaba ubufatanye cyane ko hashyizweho gahunda na politiki zo kuyikumira no kuyirwanya, aho ari uyitanga n’uyakira bose baba bakoze icyaha. 

Uyu munsi nyafurika wo kurwanya ruswa zwizihijwe ku nshuro ya karindwi hanizihizwa imyaka 20 Amasezerano y’Umuryango w’Ubumwe bw’Ibihugu by’Afrika yogukumira no kurwanya ruswa amaze ashyizweho.

Muri rusange abaturage basabwa gutanga amakuru  kare kugira ngo ruswa ikumirwe.

Yanditswe na NYIRANEZA Judith

  • Imvaho Nshya
  • Nyakanga 13, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE