Kudatanga amakuru mu Nzego z’ibanze ni ukwihunza inshingano- MINALOC

Minisitiri w’Ubutegetsi bw’Igihugu MINALOC Musabyimana Jean Claude yavuze ko abayobozi bo mu Nzego z’ibanze nta bwiriza bigeze bahabwa ry’uko abayobozi b’Uturere ari bo bemerewe gutanga amakuru, ahubwo kutayatanga ari ukwihunza inshingano.

Yabigarutseho ku wa Kabiri, tariki ya 6 Gashyantare 2024, asobanurira Inteko Rusange y’Umutwe w’Abadepite ibibazo byagaragaye muri Raporo y’Urwego rw’Igihugu rw’Imiyoborere, RGB.

Ni nyuma y’uko abakora umwuga w’itangazamakuru bari bamaze igihe batabonera amakuru ku gihe kuko abayobozi b’Inzego z’ibanze bangaga kubavugisha bitwaje ko babihaweho amabwiriza na MINALOC.

Ku kibazo yabajijwe na Depite Dr Habineza Frank abanyamakuru bavuga ko MINALOC ibuza abayobozi b’ibanze gutanga amakuruku bibazo by’abaturage ndetse abayobozi bakabuza n’abaturage gutanga amakuru ku banyamakuru

Minisitiri w’Ubutegetsi bw’Igihugu, Musabyimana Jean Claude, yamaganye abayobozi badatanga amakuru bakitwaza ko babibujijwe, ashimangira ko baba bihunza inshingano.

Yagize ati: “Ntabwo ari byo, ndumva n’igihe byavugwaga kuri radiyo hari umwanzuro wari warafashwe ko ibintu bimeze nk’amatiku batazongera kubimbaza.  Ntabwo ari byo, ni najye bavugaga, nta hantu na hamwe nigeze mvugira muri uru Rwanda ko umuyobozi runaka atagomba gutanga amakuru.”

Yongeyeho ko ubivuga ari we wabazwa aho yabikuye kuko n’aho byavugiwe atari ahari, nabyumvise ku mbuga nkoranyambaga nk’abandi bose, ko ubwo uwabivuze yazavuga aho yabikuye.

Abangaga kuvugisha itangazamakuru bemezaga ko amabwiriza bahawe aha gusa Umuyobozi w’Akarere uburenganzira bwo gutanga amakuru mu gihe yabaha atabonetse kubona amakuru yuzuye byabaga ari ingorabahizi.

Yasubizaga Abadepite basabye ko hakorwa amavugurura mu korohereza abanyamakuru kubona amakuru nyuma y’uko hamaze iminsi humvikana imikoranire itanoze hagati yabo n’abayobozi bo mu nzego z’ibanze.