Ku bana ibihumbi 100 bavutse hapfa abagore 200- MINISANTE

  • ZIGAMA THEONESTE
  • Werurwe 26, 2024
  • Hashize ibyumweru 2
Image

Minisiteri y’Ubuzima mu Rwanda yatangaje ko kubera ubuke bw’ababyaza bigira ingaruka ku bagore babyara aho imibare igaragaza ko mu bana ibihumbi 100 bavutse hapfa abagore 200.

Ibyo Minisiteri yabigarutseho kuri uyu wa Kabiri tariki ya 26 Werurwe 2024 mu kiganiro yagiranye na RBA.

MINISANTE ivuga ko mu Rwanda hari ikibazo cy’ubuke bw’ababyaza, aho habarirwa 2000 bagomba kwita ku bantu miliyoni 13 z’Abanyarwanda babagana mu gihe barwaye.

Imibare itangwa n’Ishami ry’Umuryango w’Abibumbye ryita ku buzima (OMS) rigaragaza ko ku Isi, buri minota 2 hapfa umugore umwe kubera impamvu zo kubyara.

Umuyobozi Mukuru ushinzwe Imyigishirize y’Abakozi bo mu rwego rw’Ubuzima muri MINISANTE, Dr Nkeshimana Menelas, yavuze ko  imibare y’abaganga ikiri mike ari imbogamizi ikomeye ku buzima b’ababagana.

Yagize ati: “Kugeza ubu imibare itwereka ko mu bana ibihumbi 100 bavutse ababyeyi 200 barapfa, bivuze ko ikibazo gihari. Nko kuvira ku nda, ngira ngo biri mu mpamvu za mbere. Urumva rero abagombye kudufasha ntibahagije”.

MINISANTE ivuga ko buri mwaka havuka abana ibihumbi 400.

MINISANTE ati: “Abakozi 2000 (ababyaza) urumva ko bavunika”.

Minisiteri y’Ubuzima ivuga ko kugeza ubu mu Rwanda, umuganga umwe yita ku barwayi 1000, ubusanzwe bakitaweho n’abaganga 4.

Umuyobozi w’Ishyirahamwe ry’Ababyaza mu Rwanda, Murekezi Josephine avuga ko kuba umubare w’ababyaza ukiri muke, gukurikirana abagore batwitse mu buryo bukwiye bigoye.

Ati: “ Ubundi umugore uri kunda tuba tugomba kumugeraho buri minota 30. Ni ukuvuga ngo ntibiri gushoboka kuko haba hari umubare munIni w’abagiye kubyara.Hari ibitaro bibyaza nk’ababyeyi 40 mu ijoro rimwe kandi wenda hari ababyaza babiri gusa urumva rero icyo gihe ntibibura ingaruka. Kubyara hari ubwo  biza vuba cyane, wenda ugasanga ababyaza bataramugeraho”.

Uwo muganga avuga ko ubundi abagore batwite bagomba gukurikiranwa n’ababyaza kugeza igihe bageze ku byumweru 6 babyaye.

Ati: “Nibura abagore 1000 mu gihe batwite bagombye gukurikirwa n’umubyaza umwe. Ariko mu gihe aje kubyara cya gihe ategereje buri mugore yagombye kuba ari kumwe n’umubyaza umwe, ariko yagera igihe cyo kubyara akaba afite ababyaza babiri ku mugore umwe. Cya gihe yamaze kubyara noneho ubwo aba ari umubyeyi n’umwana we, umubyaza umwe yagombye kuba areberera 6, ubwo iyo tuvuze 6 ni umubyeyi n’umwana we, abo ni 12.Ntabwo dufite uwo mubare wo kubitaho”.

Umuganga ku kigo Ndebuzima cya Kabarore mu Karere ka Gatsibo yabwiye RBA ko bagira ababyaza 2, ariko bakabyaza ababyeyi 150 buri kwezi, ndetse ko mu gihe habyaye ababyeyi benshi, hitabazwa abandi baforomo batize ububyaza bagafasha ababyaza bahari kuko ari bake.

Umwe mu babyeyi wo mu Karere ka Gatsibo  we yavuze  ko kuba ababyaza ari bake bishobora kugira ingaruka ku mubyeyi mu gihe babyara, ariko akavuga we ubwo yajyaga kubyara n’ubwo bari bake bamwakiriye neza.

Dr Nkeshimana yatangaje ko Minisiteri y’Ubuzima irimo gukora ibishoboka byose ngo ababyaza biyongere.

Yagize ati: “Hari ikusanyamakuru ryakozwe mu mwaka ushize, twagiye kureba mu mashuri, tureba ubushobozi buhari n’aho bigira (abanyeshuri). Kuri iyi gahunda yo kwiga ububyaza dusanga ababwitabira ari 20%. Ni ukuvuga ko mu banyeshuri 100 hakurikijwe imyanya ihari, haje 20.”

Avuga ko mu gukurikirana igituma abanyeshuri batitabira aya masomo y’ububyaza, basanze biterwa n’uko  babuze ubushobozi nyamara bafite ubushake bwo kwiga.

MINISANTE ivuga ko kugira ngo urangiza amasomo ya Kaminuza mu buzima bitwara amadolari ari ku mpuzandengo y’ibihumbi 7 by’amadolari y’Amerika.

Dr Nkeshimana ati: “Niba dufite ubushobozi bw’aho kwigira n’abiga bahari, ubwo  bushobozi (amafaranga y’ishuri) tugomba kubushakira hamwe. Abafite ubushobozi bwo gukomeza kwiga turabashimira tubabwira ngo babikomeze, ariko abatabufite bujuje ibisabwa bakaba badafite ubushobozi, turimo gushaka kubaha inkunga y’amafaranga ngo bige.”

Kugeza ubu hari amashuri 4 ya Kaminuza yigisha ububyaza mu Rwanda, aho Minisiteri y’Ubuzima iri mu mikoranire nayo mu kureba abanyeshuri badafite ubushobozi kugira bafashwe kwiga bityo byongere ababyaza bakenewe.

  • ZIGAMA THEONESTE
  • Werurwe 26, 2024
  • Hashize ibyumweru 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE