Kiyovu Sports yihimuye kuri Sunrise FC yayibujije igikombe cya shampiyona 

  • SHEMA IVAN
  • Mata 3, 2024
  • Hashize ibyumweru 2
Image

Kiyovu Sports yanyagiye Sunrise FC ibitego 4-0 mu mukino w’umunsi wa 26 wa shampiyona iyishyira mu makipe arwanira kumanuka mu cyiciro cya kabiri.

Uyu mukino wabaye kuri uyu wa Gatatu tariki 3 Mata 2024, kuri Kigali Pele Stadium. 

Kiyovu Sports yari yahize gutsinda Sunrise FC yayikuye ku gikombe cya shampiyona mu mwaka ushize w’imikino iyitsinze igitego 1-0 mu mukino wabereye kuri Sitade ya Nyagatare. 

Kiyovu Sports yatangiye umukino iri hejuru cyane arı na ko isatira cyane izamu rya Sunrise FC.

Ku munota wa 7, Kiyovu Sports  yafunguye amazamu ku gitego cyatsinzwe na Alfred Leku ku mupira mwiza yahawe na Richard Kirongozi.

Sunrise FC yagowe cyane no kwinjira mu mukino hakiri kare bituma Kyovu Sports iyirusha cyane hagati mu kibuga.

Ku munota 39, Kiyovu Sports yabonye igitego cya kabiri cyatsinzwe na Richard Kirongozi  ku mupira muremure yateye urenga umuzamu Mfashingabo Didier uruhukira mu rushundura. 

Nyuma y’iminota itatu Kiyovu Sports yatsinze igitego cya gatatu cyatsinzwe na Alfred Leku mu mupira wavuye muri koruneri ashyiraho umutwe.

Igice cya mbere cyarangiye Kiyovu Sports itsinze Sunrise ibitego 3-0.

Mu gice cya kabiri Sunrise FC yatangiye isatira cyane izamu rya Kiyovu Sports ishaka kwishyura ibyibuze igitego kimwe, ba myugariro ba Kiyovu Sports bakomeje kugarira neza.

Ku munota wa 61, Kiyovu Sports yatsinze igitego cya kane cyatsinzwe na Richard Kirongozi.

Ku munota wa 75 Sunrise FC yabonye uburyo bwa mbere mu izamu rya Kiyovu Sports ku mupira watewe na Robert Mukogotya ariko ukurwamo n’umuzamu Nzeyirwanda Djihad.

Umukino warangiye Kiyovu Sports itsinze Sunrise Fc ibitego 4-0 mu mukino utayigoye cyane.

Kiyovu Sports yafashe umwanya wa gatandatu n’amanota 37 mu gihe Sunrise FC yagumye ku mwanya wa 13 n’amanota 26 irusha Etoile De l’Est ya nyuma amanota ane, kandi imikino itatu ngo shampiyona irangire.

Undi mukino wabaye uyu munsi, Musanze FC yatsinze Gasogi United igitego 2-1.

Imikino iteganyijwe ku wa Kane tariki 4 Mata 2024

Muhazi United izakira Mukura VS saa cyenda kuri Sitade ya Ngoma, 

Rayon Sports izakira Etincelles saa cyenda kuri Kigali Pele Stadium.

  • SHEMA IVAN
  • Mata 3, 2024
  • Hashize ibyumweru 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE