Kiyovu Sports yatsinze Police FC yuzuza imikino umunani idatsinda

  • SHEMA IVAN
  • Werurwe 1, 2024
  • Hashize amezi 2
Image

Kiyovu sports yatsinze Police FC ibitego 2-1 mu mukino w’umunsi wa 23 wa shampiyona, yuzuza imikino umunani idatsinda muri shampiyona.

Uyu mukino wabaye ku mugoroba wo kuri uyu wa Gatanu tariki 01 Werurwe 2024 kuri Kigali Pele stadium.

Amakipe yombi yari yatsinzwe imikino y’umunsi wa 22 wa shampiyona.

Ku munota wa kabiri Kiyovu Sports yafunguye amazumu kuri koruneri yatewe na Nizeyimana Djuma, usanga Ndizeye Eric ahita ashyira umupira mu rushundura.

Ku munota wa 8 Kiyovu Sports yabonye uburyo bwiza bwo gutsinda igitego cya kabiri ku mupira Kilongozi Richard yacomekeye  Mosengo Tansele mu rubuga rw’amahina, awukozeho ugana mu izamu, ku bw’amahirwe ye make Rukundo Onesime arahagoboka, awushyira muri koruneri.

Kiyovu Sports yakinnye neza iminota 30 ibanza yongeye kubona andi mahirwe ku munota wa 21 ku mupira Nizeyimana Djuma yinjiranye mu rubuga rw’amahina, yateye ishoti rikurwamo na Rukundo Onesime, ahita atabarwa na bagenzi be barimo Nsabimana Eric ‘Zidane’.

Ku munota wa 26 Hakizimana Muhadjiri wa Police FC yabonye uburyo bwo gutsinda igitego cyo kwishyura ku mupira yateye uteretse muri metero nka 30, Umunyezamu Ishimwe Patrick arasimbuka awushyira muri koruneri. Ku munota wa 40 Police FC yabonye igitego cyo kwishyura cyatsinzwe na Djibrine Akuki ku mupira ugendera hasi ateye mu izamu, Ishimwe Patrick ntiyabasha kuwugeraho.

Ku munota wa 42 Kiyovu Sports yabuze amahirwe yo kuyobora umukino mbere y’uko igice cya mbere kirangira ku mupira wagarukiye Tansele inyuma y’urubuga rw’amahina,  ateresheje ishoti akaguru k’ibumuso uca ku ruhande rw’izamu.

Igice cya mbere cyarangiye amakipe yombi anganyije igitego kimwe kuri kimwe.

Ku munota wa 48 mu gice cya kabiri Kiyovu Sports yatsinze igitego cya kabiri cyatsinzwe na Leku Alfred ku mupira mwiza yahawe na Tansele Mosengo ajijisha ba myugariro ba Police FC ahita ashyira umupira mu rushundura arobye Umunyezamu Rukundo Onesime.

Nyuma yo gutsinda ibitego cya kabiri Police FC yakangutse itangira gusatira ariko na Kiyovu Sports isubira inyuma.

Ku munota wa 61 uburyo bwo gutsinda igitego cya gatatu ku mupira Kilongozi Richard yahawe na Makenzi iburyo, ateye ishoti rikomeye rinyura ku ruhande gato rw’izamu ririnzwe na Rukundo Onesime.

Ku munota wa 70 Kiyovu Sports yabuze amahirwe akomeye yo gutsinda ibitego cya gatatu ku mupira Mosengo Tansele yateye uteretse muri metero nka 25, Niyonzima Olivier ‘Seif’ arasimbuka ashyiraho umutwe, ku bw’amahirwe ye make ufata igiti cy’izamu uvamo.

Mu minota icumi ya nyuma Police FC yakomeje gushaka igitego cyo kwishyura ariko ba myugariro ba Kiyovu Sports bakomeza kurinda izamu ryabo. Ku munota wa 86 Kiyovu Sports yabonye andi mahirwe yo gutsinda igitego cya gatatu ku mupira Muhozi Fred yahaye Kilongozi awucomekeye Alfred Leku, wari uwa nyuma ateye ishoti rikomeye rifatwa na Rukundo Onesime.

Mbere yuko umukino urangira umusifuzi wa kane yongeyeho iminota ine.

Ku munota wa 3 w’inyongera Hakizimana Muhadjiri  yacenze abakinnyi babiri ba Kiyovu Sports, ateye  ishoti rikomeye rinyura hejuru y’izamu.

Umukino warangiye Kiyovu Sports itsinze Police FC ibitego 2-1, ifata umwanya wa gatandatu n’amanota 31.

Police FC yagumye ku mwanya wa gatanu n’amanota 33.

Iyi kipe ya Polisi ntirabona intsinzi mu mikino umunani yo kwishyura, ndetse yanganyijemo ibiri gusa.

Mu wundi mukino Etoile de l’Est yaherukaga intsinzi tariki 5 Ugushyingo 2023 yatsinze AS Kigali igitego 1-0 kuri Kigali Pele stadium.

Imikin yo ku wa Gatandatu tariki 02 Werurwe 2023

Bugesera FC izakira Mukura VS saa cyenda kuri Stade ya Bugesera

Musanze FC izakira Muhazi United saa cyenda kuri Stade Ubworoherane

Gorilla FC izakira Amagaju saa cyenda kuri Kigali Pele stadium

APR FC izakira Etincelles saa kumi n’ebyiri z’umugoroba kuri Kigali Pele stadium

Ku cyumweru tariki 03 Werurwe 2024

Sunrise FC izakira Rayon Sports saa cyenda kuri Stade Nyagatare

Gasogi United izakira Marines FC saa cyenda kuri Kigali Pele Stadium

APR FC izakira Etincelles saa kumi n’ebyiri z’umugoroba kuri Kigali Pele Stadium.

  • SHEMA IVAN
  • Werurwe 1, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE