Kigali: Inzobere zisaga 250 zirategura gahunda yo kuvugurura ubuhinzi (PSTA 5)

  • ZIGAMA THEONESTE
  • Ugushyingo 23, 2023
  • Hashize amezi 6
Image

Mu nama y’iminsi itatu iteraniye i Kigali, inzobere mu buhinzi n’ubworozi zisaga 250 zo mu Rwanda no hanze yarwo, zirimo gutegura guhunda ya Gatanu yo kuvugurura ubuhinzi n’ubworozi mu Rwanda (PSTA 5).

Minisiteri y’Ubuhinzi n’Ubworozi (MINAGRI) yatangaje ko  yizeye  ko kongera imbaraga muri gahunda yo guteza imbere no kuvugurura ubuhinzi n’ubworozi, bikazongera umusaruro w’ubuhinzi binyuze muri gahunda irimo gutegurwa igamije kongera umusaruro.

Gahunda ya Kane yo kuvugura ubuhinzi (PSTA 4) yatangiye mu mwaka 2018 kugeza 2024 yatumye  ubuhinzi butanga umusaruro,  aho  wiyongereyoho 28% mu myaka ine ku bikomoka ku buhinzi byoherejwe hanze y’u Rwanda.

Iyi gahunda ifite intego yo kuvugurura ubuhinzi harimo kongera umusururo w’ibihingwa, kwimakaza ikoranabuhanga mu buhinzi, kongera abakozi benshi mu rwego rw’ubuhinzi, kunoza serivisi mu buhinzi, gushyiraho ingamba zo guhangana n’imihandagurikire y’ibihe, kunoza imikoranire mu nzego n’ibindi.

Rwigamba Eric, Umunyamabanga wa Leta muri Minisiteri y’Ubuhinzi n’Ubworozi (MINAGRI), yagaragaje ko izi ngamba zo kunoza imikorere mu buhinzi zizatanga umusaruro uhagije.

Yaboneyeho gusaba abitabiriye iyi nama kugerageza gucukumbura ibibazo byose biri mu buhinzi n’ubworozi, mu rwego rwo kongera umusaruro no kwihaza mu biribwa kandi ko hari icyizere ko bizagerwaho.

Yagize ati: “Icyo turimo gushyiramo imbaraga, ni gute twazamura umubare w’abahinzi bashobora kubona  imbuto? Iyi nama igamije guhuza aba bantu bose bari mu buhinzi n’ubworozi kugira ngo dushyiremo imbaraga n’amafaranga kugira tuzamure ubuhinzi n’ubworozi.”

Minisiteri y’Ubuhinzi n’Ubworozi ivuga ko hari itsinda ririmo kugenzura niba gahunda zirimo guteza imbere ubuhinzi n’ubworozi zitanga umusaruro zirimo gahunda yo kwihaza mu biribwa.

PSTA 4 iheruka yatangiye mu mwaka wa 2018 izarangira muri Kamena  2024; MINAGRI ivuga ko yagiye itanga impinduka mu kongera umusaruro bityo ikaba ishaka kunoza uburyo abahinzi barushaho kongera umusaruro.

Rwigamba Eric yagize ati: “Nk’ibigori mu Rwanda, ubungubu  kuri hegatari ufashe impuzandengo turi hagati ya toni 2.5 na toni 3 ku gihugu, ariko igishimishije muri za gahunda zirimo kuhira, gukoresha imbuto nziza, gukora ifumbire, ubu dufite abahinzi b’Abanyarwanda babonye umusaruro uri hagati ya toni 10 na 12 kuri hegetari.

Ni ukuvuga ko iyi nama icyo irimo kuganira ni ukureba uko twazamura umusururo w’umuhinzi ukagera kuri toni umunani cyangwa kuri zirindwi kuri hegatari, tuzamura umubare w’abahinzi babona imbuto nziza n’ifumbire, ubuso dufite mu Rwanda burahagije ku buryo twabona ibigori dukeneye nk’igihugu.”

Imibare igaragaza ko mu Rwanda imiryango yihagije  mu biribwa iri ku ijanisha rya 79.3%,  MINAGRI ikagaragaza ko ishaka kuzamura iri janisha hashingiwe ku ngamba zizafatwa muri iyi gahunda nshya yo kuzamura umusaruro w’ubuhinzi.

Izi nzobere zitegura PSTA5 zirimo abahagarariye Banki y’Isi, Umuryango w’Abibumbye n’abarimo gutegura Politiki yo guteza imbere ubuhinzi n’ubworozi mu Rwanda.

Biteganyijwe ko PSTA 5 izatangizwa mu kwezi kwa Nyakanga 2024, ikazamara imyaka itanu.  

  • ZIGAMA THEONESTE
  • Ugushyingo 23, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE