Kigali: Bajujubijwe n’amavuriro abacucura abizeza ubuvuzi ntabavure

  • KAMALIZA AGNES
  • Ugushyingo 28, 2023
  • Hashize amezi 6
Image

Bamwe mu batuye mu Mujyi wa Kigali, bavuga ko  bagiye bagana amavuriro amwe namwe  yamamazwa, abizeza ko azabavura indwara zose bafite bagatanga amafaranga yose basabwa, yewe bagakurikiza n’inama babaha ariko bikarangira badakize, ahubwo uburwayi bukarushaho kubarembya.

Aba baturage bo mu bice bitandukanye by’Umujyi wa Kigali, babwiye Imvaho Nshya ko bagannye ayo mavuriro arimo n’ayo bumvaga bizeye ko bazayaboneramo ubuvuzi bwuzuye ariko n’ubu bakaba bakirwaye indwara babwirwaga ko zakize.

Abaturage bababazwa n’uko amavuriro na yoasigaye avuka nk’amaduka, ugasanga abayashinga si n’abantu babyigiye cyangwa babiherewe uburenganzira n’inzego zemewe.

Hari abafata ururwego nk’ahantu ho gukura amafaranga nyamara barushaho gushyira ubuzima bw’abaturage mu kangaratete, cyane ko hari ababa bajya ku bigo ndrabuzima babona badakira mu bihe bifuza bakayoboka amavuriro yamamazwa bumva ko ari yo afite ibisubizo buyihuse.

Kayitesi Emelyne umwe muri bo yagize ati: “Njye rwose barantuburiye kuko  nari mfite ikibazo cy’imitsi, murumuna wanjye aza kundangira aho nivuriza, ngezeyo bambwira ibisabwa ngo bamvure ndishyura nkomeza gukora ibyo bantegetse ari imiti n’ibindi ariko n’ubu ntabwo ndakira.”

Mukabalisa Alexia na we ati: “Njye umukecuru wanjye yahoraga ataka twarayobewe icyo arwaye nza kumva bavuga ko hari ivuriro risuzuma kandi rikanavura indwara zose, mba muvanye epfo iyo mu cyaro Nyamagabe nti ngwino nakuboneye aho bakuvura ukaba muzima. Ariko niba hari umuntu unseka avuga ko nubwo mba i Kigali ntasobanutse ni mukecuru agira ati ni gute utanga amafaranga yawe ukanzana i Kigali mu bavuzi bakankandakanda ngo baramvura none bikaba bigeze n’ubu ntarakira ?.”

Mukabalisa yongeyeho ko akenshi yasanze benshi baba bibashakira amafaranga kuko usanga uyu munsi ukize ejo bikagaruka kandi baba barakwijeje ko ukize burundu.

Prof.David Tumusiime, umwarimu muri Kaminuza y’ u Rwanda wigisha ibijyanye n’ubuzima avuga ko hari bamwe mu barwayi baza kwivuza bararembye kubera kujya kwivuza ku mavuriro bumvise yamamazwa ariko ahanini aba atabifitiye ubushobozi n’uburenganzira.

Ati: “Abarwayi bagomba kumenya aho bivuriza tubona baza batugana bararembye kubera bahereye aho hose, kandi mu mahame ajyenga ubuvuzi birabujijwe kwamamaza ibyo uvura.”

Agira inama abaturajye yo gushishoza ku bavuzi bababwira ko bavura indwara zose bakagira amakenga yo kumenya aho bigiye ayo mashuri abandi batazi.

Ati: “Uyu muntu ukubwira ko avura indwara zose kandi nta muganga uvura ibintu byose bibaho, we yabyize imyaka ingahe? Abyigira he? Ese kuki ibyo bakoresha ibitaro bikuru byo mu Rwanda cyangwa ibyo mu mahanga bitabikoresha? Birakwiye ko Abanyarwanda babitekereza”.

Avuga ko gukora ubuvuzi bw’ubugororangingo cyangwa ubundi bwose atari ibya buri wese wabyuka ngo ahite ashinga ivuriro, kuko kubikora bisaba kubyiga imyaka myinshi.

Ati: “Umuntu wihuguye amezi atatu cyangwa atandatu akaza kuvura umuburi w’umuntu uwo wamugiraho ikibazo. Twebwe turi abanyamwunga mu buzima, ibi ni ibintu bisaba kubyiga imyaka myinshi yewe no mu buvuzi rusange abaganga biga imyaka itandutu bakimenyereza itanu cyangwa ine. Ubuvuzi bw’abo bantu rero sinabugerereranya n’ubwo uwabyize kuko ntibugereranyika.”

Yongeyeho ko ajya yumva bene abo baganga mu bitangazamakuru bavuga amakuru y’ubuvuzi atari yo, aboneraho gukangurira abantu kujya kwivuza ku baganga babyize bakoresha ibikoresho bifite ubushobozi bwo kuvura.

Ubuyobozi bw’Ikigo cy’Igihugu  cy’Ubuzima (RBC) buvuga ko hari imirongo ngenderwaho buri muntu akwiye gukurikiza mbere yuko ashinga ivuriro, haba ku mavuriro ya Leta ndetse n’ayigenga, bityo ko bidakwiye ko hari abakwiha  ubwo burenganzira batabyemerewe na Minisiteri ibifite mu nshingano.

Bagahirwa Irene, umukozi wa RBC mu Ishami rishinzwe kurwanya indwara zitandura, avuga ko byaba ari kibazo habaye hariho amavuriro abeshya  agakora atemewe kandi akamamazwa, akavuga ko Minisiteri y’Ubuzima yabafatira ingamba.

Ati: “Hari urwego muri Minisiteri y’Ubuzima rureberera amavuriro ya Leta ndetse n’ayigenga. Ivuriro rujyaho ritujuje ibisabwa byaba ari ikibazo kuko Minisiteri y’Ubuzima turaza gukorana n’izindi nzego tubihe umurongo. Uwamamaza ko akora iyakuramyakura n’ubugororangingo n’ibindi atarabiherewe uburenganzira, akwiye kuganirizwa hagafatwa izindi ngamba.”

Itegeko No 47/2012 ryo ku wa 14/01/2013 rigenga imicungire n’igenzura ry’ibiribwa n’imiti, ingingo yaryo  ya 31, ivuga ku  Kwemererwa gukora umwuga w’ubuhanga mu by’imiti,  ivuga ko Umuhanga mu by’imiti wemerewe gukora ari umuntu wanditswe ufite impamyabumenyi yo mu cyiciro cya kabiri cya Kaminuza mu buhanga mu by’imiti.

  • KAMALIZA AGNES
  • Ugushyingo 28, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE