Kigali: Abasaga 1000 bitabiriye Inama yiga ku mutungo kamere w’amazi ku Isi

  • NTAWITONDA JEAN CLAUDE
  • Ukuboza 11, 2023
  • Hashize amezi 3
Image

U Rwanda rwahaye ikaze abasaga 1000 bateraniye i Kigali mu Nama Mpuzamahanga ya 7 yiga ku iterambere ry’imikoreshereze y’umutungo kamere w’amazi.

Iyo nama y’iminsi itatu irimo kubera rimwe n’imurikabikorwa ryitabiriwe n’abarenga 100 baturutse mu bice bitandukanye ku Isi, aho barimo kugaragaza udushya mu kubungabunga umutungo kamere w’amazi.

Guverinoma y’u Rwanda ivuga ko kwakira iyo nama bitanga amahirwe yihariye yo guhuriza hamwe impuguke mu kubungabunga umutungo kamere w’amazi baturutse mu bihugu bitandukanye ku Isi, by’umwihariko muri Afurika, bakungurana ibitekerezo no gusangira ubunararibonye ku bishya biriho ku Isi n’ikoranabuhanga rigezweho.

Nanone kandi abahanga udushya babonye amahirwe yo kugaragaza ikoranabuhanga ryabo ryafasha kurushaho kurinda umutungo kamere w’amazi no gutanga ibisubizo birambye mu rwego rw’amazi, isuku n’isukura bigamije guhangana n’ingaruka z’imihindagurikire y’ibihe.

Ministiri w’Ibikorwa Remezo Dr. Jimmy Gasore asanga hakwiye kubaho uruhare rw’abatuye Isi mu gusigasira umutungo kamere w’amazi nka kimwe mu by’ingenzi Isi icungiyeho.

Dr. Jimmy Gasore yasabye abitabiriye iyi nama kugira uruhare mu bikorwa bigamije kubungabunga amazi kuko ari yo soko y’ubuzima bw’abatuye Isi.

Mu gutangiza iyi nama y’iminsi itanu, Umuyobozi Mukuru w’ikigo gishinzwe amazi, isuku n’isukura WASAC Group Prof. Omar Munyaneza, yagaragaje intambwe Leta y’u Rwanda imaze gutera muri gahunda z’ikwirakwizwa ry’amazi meza hirya no hino mu gihugu.

Umuyobozi w’Ihuriro Mpuzamahanga ryita ku mazi (IWA) Tom Mollenkopf, na we yashimangiye ko hakwiye kubaho uruhare rw’ibihugu mu gushyiraho amategeko agenga imikoreshereze myiza y’amazi.

Iyi nama ibaye mu gihe u Rwanda rugeze ku kigero cya 82.3% rwegereza abaturage amazi meza, ariko Gahunda ya Guverinoma y’imyaka 7 yo kwihutisha iterambere (NST1) iteganya ko bitarenze mu mwaka wa 2024, abaturage 100% bazaba begerejwe amazi meza nibura muri metero 500.

Zimwe mu ngingo ziganirirwaho muri iyo nama harimo kureba uburyo bwo kubaka ubukungu bwisubira, gushyiraho ingamba zikumira ihindagurika ry’ibihe mu rwego rw’amazi n’izukura, kwifashisha ikoranabuhanga rigezweho, no gusaranganya amazi mu buryo bunoze kandi akaboneka amasaha 24/7.

Mu bindi biganirwaho harimo ibirebana no gutanga serivisi z’isukura zidaheza mu mijyi, guhanga ibishya no gushyiraho Politiki z’imicungire inoze y’amazi, gushyiraho ibisubizo karemano bishingiye ku gukwirakwiza amazi no kubika amazi y’imvura, ubufatanye mu igenamigambi n’ibindi.

Abateraniye i Kigali bishimira ko hari ishoramari rikomeye rikomeje gushyirwa mu kubaka ibikorwa remezo by’amazi, by’umwihariko mu bihugu bikiri mu nzira y’amajyambere.

  • NTAWITONDA JEAN CLAUDE
  • Ukuboza 11, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE