Kicukiro: Ab’i Masaka bagaragaje ibanga ryo kwishyura mituweli ku gihe

  • Imvaho Nshya
  • Kanama 9, 2023
  • Hashize amezi 10
Image

Abaturage bo mu Murenge wa Masaka kimwe n’abayobozi mu masibo no mu Midugudu batangaza ko kimwe mu bibafasha kwishyura Mituweli ari ukuba baribumbiye mu matsinda.

Babigarutseho mu gitaramo cya Mituweli nyuma y’inteko y’abaturage ku mugoroba wo ku wa Kabiri tariki 08 Kanama 2023, mu Kagari ka Gitaraga mu Murenge wa Masaka mu Karere ka Kicukiro.

Rev. Past. Ndenzaho Shadrack, Mutwarasibo w’Isibo y’Icyekerezo mu Mudugudu wa Rwintare, Akagari ka Gitaraga, yabwiye Imvaho Nshya ko kugira ngo bashobore kwesa umuhigo wa Mituweli, batangiye bizigama mu matsinda.

Ati: “Intego yacu tugenderaho, ni uko abaturage bacu bose baba mu matsinda yo kwizigama. Ibanga ryacu, iyo tumaze kugira amafaranga menshi mu isanduka tutaragabana duhita tureba abaturage bafite ndetse n’imiryango bafite uko ingana. Ayo mafaranga tuyashyira ku ruhande, igihe cya Mituweli cyatangira tugatangira kwishyurira abaturage ndetse n’abagize ibibazo tukabaguriza”.

Akomeza agira ati: “Amatsinda aradufasha cyane kuko ntushobora kwinjira mu itsinda udafite inyemezabwishyu (Bordereau) iyo batangiye ikibina”.

Dusabimana Angelique umuyobozi w’Umudugudu wa Kabeza mu Murenge wa Masaka asobanura ko Umudugudu ayoboye, abafatanyabikorwa bahakorera bishyurira Mituweli abaturage batishoboye.

Avuga ko kugeza ubu barengeje 100% mu kwishyura Mituweli mu mudugudu abereye umuyobozi. Ati: “Dufite ibibina, dufite n’amatsinda. Abaturage bacu tubakangurira kwinjira mu matsinda bakizigama”.

Mu mudugudu wa Kabeza bafite amatsinda yo kwizigama aho bagabana mu kwezi kwa Kamena. Dusabimana avuga ko ayobora ikibina cy’abantu 150.

Ati: “Iyo bagarutse kwizigama, bizigama ku munsi wa Mbere. Iyo rero kuri uwo munsi wa Mbere twagabanye, undi wa Mbere bagaruka bose bishyura Mituweli”.

Nduwayezu Alfred, Umunyamabanga Nshingwabikorwa w’Umurenge wa Masaka, asobanura ko abaturage basaga ibihumbi 70 mu Murenge wa Masaka hafi 90% bishyuye Mituweli.

Yabwiye itangazamakuru ko mu gihe gishize Umurenge wa Masaka wazaga inyuma y’indi ariko biyemeza gutangira gahunda zitandukanye zigamije kwegera abaturage.

Yagize ati: “Ibanga rikomeye cyane ni ugufatanya n’abantu; insengero, amakoperative, ibimina bityo tugashyiramo imbaraga, twese tukajyanamo”.

Umuyobozi wa Dubai Ports World mu Rwanda, Sumeet Bhardwaj, nyuma yo kwishyurira abaturage 500 batishoboye yagaragaje ko ubuzima ari ikintu cy’agaciro.

Agira ati “Ni yo mpamvu twahisemo kwishyurira Mituweli abaturage 500 mu Mudugudu dukoreramo mu Murenge wa Masaka”.

Yavuze ko badashyigikiwe na Guverinoma y’u Rwanda icyerekezo bafite kitari gushoboka.

Ashimangira ati : “Tuzakomeza kugira uruhare mu gufasha abaturage”.

Mu gitaramo cyiswe icya Mituweli, Mutwarasibo w’indashyikirwa yahawe igare rizamufasha kugera ku baturage vuba n’Umukuru w’Umudugudu wa Kabeza, Dusabimana Angelique, wahawe telefoni igezweho.

Yanditswe na KAYITARE JEAN PAUL

  • Imvaho Nshya
  • Kanama 9, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE