Kenya: Raila Odinga arashaka kuyobora Afurika Yunze Ubumwe

  • ZIGAMA THEONESTE
  • Gashyantare 15, 2024
  • Hashize amezi 2
Image

Umunyapolitiki utavuga rumwe n’ubutegetsi bwa Kenya, Raila Odinga yatangaje ko yifuza kuyora Komisiyo ya Afurika Yunze ubumwe (AUC).

Uyu mugabo w’umucuruzi w’imyaka 78 y’amavuko, mu 2018 yari yatorewe kuba umuyobozi w’ishami rishinzwe iterambere ry’ibikorwa remezo muri Afurika muri AUC.

Ni umwanya yagiyeho hagamijwe ubufatanye no kwihutisha iterambere ry’uwo mugabane binyuze mu bikorwa remezo.

Odinga akaba yatangaje ko afite ubushobozi buhagije bwo kuyobora iyo komisiyo ihurije hamwe ibihugu by’Afurika. 

Komisiyo y’Afurika Yunze Ubumwe ifite icyicaro mu gihugu cya Ethiopia, i Addis Ababa, ikaba ari yo  bunyamabanga bw’Umuryango w’Afurika Yunze Ubumwe (AU) mu bikorwa byayo bya buri munsi.

Odiga wabaye Minisitiri w’Intebe wa Kenya kuva mu mwaka wa 2008-2013, ni umuhugu wa Jaramogi Oginga Odinga na we wabaye Visi Perezida wa Mbere wa Kenya ikimara kubona ubwigenge.

Raila kuri ubu ayoboye ihuriro ry’abatavuga rumwe n’ubutegetsi Azimio la Umoja muri Kenya.

Mu kiganiro yagiranye n’itangazamakuru i Nairobi mu murwa mukuru wa Kenya kuri uyu wa Kane tariki ya 15 Gashyantare 2024, Odinga yagize ati: “Ndashaka kubishyira ku mugaragaro ko niteguye rwose kuba umuyobozi wa Komisiyo y’Afurika Yunze Ubumwe”.

Odinga amaze guhatana mu matora y’Umukuru w’Igihugu inshuro zigera kuri eshanu zose atsindwa.

Yagize ati: “Uyu mugabane birigaragaza ko unkeneye ngo mbe umuyobozi, ukeneye amaboko yanjye, niteguye kwitanga uko nshoboye kose kugira ngo mwuteze imbere.”

Odinga yavuze ko ubwo yakoraga muri uyu Muryango w’Afurika Yunze Ubumwe (AU) muri 2018, byamuhaye ubunararibonye bwo kumenya no gusobanukirwa icyo ubukungu bw’Afurika bwashingiraho ngo bukomeze kuzamuka.

Ati “Kuba muri uriya mwanya byampaye amahirwe yo gusuzuma buri gihugu cy’Afurika, nizeye ko mu gihe ibihugu byose by’Afurika byemeye gushyira hamwe, byateza imbere umugabane”.

Odinga yatangiye gukora Politiki muri Kenya, guhera mu myaka 1970, aheruka gutsindwa ku nshuro ya gatanu mu matora y’Umukuru w’Igihugu muri Kenya ya 2022, aho Perezida William Ruto uriho ubu ari we wegukanye itsinzi.

Odinga yari yariyamamaje no mu matora ya 1997, 2007, 2013 na 2017.

Umuyobozi Mukuru wa Komisiyo y’Afurika Yunze Ubumwe biteganyijwe ko azatorwa mu mwaka utaha wa 2025, aho agomba gusimbura uriho ubu Mussa Fakki Mahamat ukomoka muri Chad, akaba yaratowe muri manda ya kabiri muri 2021, bwa mbere  yagiye kuri uwo mwanya  mu 2017.

Umuyobozi Mukuru w’iyo Komisiyo atorwa n’Inteko Rusange y’Umugane w’Afurika, agatorerwa manda y’imyaka ine yemererwa kongera kwiyamamaza inshuro imwe.

  • ZIGAMA THEONESTE
  • Gashyantare 15, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE