Kayonza: Ibigori yejeje ahahoze urwuri byamwinjirije hafi miliyoni 5 Frw

  • NSHIMIYIMANA FAUSTIN
  • Mutarama 28, 2024
  • Hashize ukwezi 1
Image

Umuhinzi-mworozi Ntabana Tito arabyinira ku rukoma nyuma y’aho ibigori ahinze bwa mbere mu gice cy’ubutaka bwe bwahoze ari urwuri bimwinjirije miliyoni zikabakaba 5 z’amafaranga y’u Rwanda.

Mu kiganiro yagiranye n’Imvaho nshya Ntabana yashimangiye ko uretse ibigori yagurishije, muri hegitari ze ashanu n’igice harimo n’ubutaka yahinzeho ibishyimbo ndetse n’imyumbati kandi byo ngo ntiyabishyize ku isoko.

Arashimira Leta y’u Rwanda yafashe icyemezo cyo kubashishikariza gukora ubuhinzi kuri 70% by’ubutaka bwabo bwari inzuri gusa, maze bagasigara bororera kuri 30%.

Uyu muhinzi mworozi yizeye ko umusaruro uzagenda urushaho kwiyongera uko akomeza kwagura ubuhinzi abufatanya n’ubworozi, cyane ko bakomeje guhabwa amahugurwa abafasha guhinga no Korora mu buryo bwa kijyambere.

Ntabana Tito ni umuhinzi-mworozi w’inka 30 yororera ahitwa Mucucu mu Kagari ka Buhabwa, Umurenge wa Murundi mu Karere ka Kayonza.

Muri hegitari esheshatu yororeragaho gusa, kuri ubu eshanu n’igice muri zo zezeho imyaka akaba yishimira ko uretse kuba byaramuhaye amafaranga n’ibiribwa, yanungutse n’ibiryo by’amatungo ye nay o ahindukir akamuha ifumbire y’imborera.

Ntabana Tito yavuze ko yagize amahirwe atangira gukora ubuhinzi n’ubwororzi mu rwuri rwe mu gihembwe cy’ihinga cya 2023B ahinga ibigori, ibishyimbo n’imyumbati.

Yemeza ko ubuhinzi n’ubworozi bukorwa mu buryo bugezweho buzana umusaruro ntagereranywa bitewe n’uko ntabyangirika kuko byombi byuzuzanya bitewe nuko ibisigazwa biva mu bigori bigaburirwa inka, umukamo ukiyongera, ifumbire na yo ikaboneka ku bwinshi ndetse n’amafaranga akaboneka.

Yagize ati: “Nge natangiye ubuhinzi n’ubworozi muri Mutarama 2023 mpinga ibigori, ibishyimbo n’imyumbati mu rwuri, ariko birimo inyungu pe! Kuko ndi kubona amafaranga mu byo nahinze kandi ndabona n’ibisigazwa by’ibihingwa bikamfasha mu bworozi nkora.”

Akomeza agira ati: “Kuva aho gahunda yo guhinga 70% by’inzuri itangiriye ndetse tukabona inyongeramusaruro ihagije, ubu nahinze ibigori kuri hegitari zirengaho eshanu kandi niteguye kubona umusaruro urenze uwo nabonaga.”

Ntabana Tito yishimira ko ubuhinzi bwaje ari inyongera y’agaciro gakomeye ku bworozi bwe

Ntabana yemeza ko impinduka Minisiteri y’Ubuhinzi n’Ubworozi (MINAGRI) yatangaje zo guhinga 70% by’inzuri zigamije guteza imbere ubworozi n’ubuhinzi zaziye igihe kuko asigaye abona ubwatsi bw’amatungo akabasha no kubuhunika, ndetse akabona n’ibyo kurya bitunga umuryango we agasagurira n’amasoko.

Yagize ati: “Ihinga rishize [2023B] natangiye ubuhinzi mbona ibyo kurya bitunga umuryango ariko kandi mbona n’amafaranga. Nizeye ko umusaruro uzaba mwinshi kurusha mu gihe gishize kuko ubu ndi gukora ubuhinzi bw’umwuga mu rwuri biturutse ku mahugurwa ya MINAGRI n’Akarere baduha, kandi bakaduhora hafi batwerekera. Umukamo uhagije uraboneka kandi ibiryo n’amafaranga na byo bikaba uko.”

Umuyobozi w’Akarere ka Kayonza, Nyemazi John Bosco, ashimira aborozi batangiye gushyira mu bikorwa amabwiriza ya MINAGRI ku bufatanye na Minisiteri y’Ubutegetsi bw’Igihugu (MINALOC), arebana no guhinga 70% by’inzuri kuko byongera umusaruro w’ibiribwa n’ubwatsi.

Yashimamgiye kandi ko hari ingamba zo kwegera no kwigisha abataratangira gushyira mu bikorwa aya mabwiriza.

Yagize ati: “Abatangiye gushyira mu bikorwa aya mabwiriza bafite umutekano w’ibiribwa ndetse n’ibyavuye mu buhinzi bigaburirwa amatungo bikongera n’umusaruro w’amata. Turasaba aborozi bataratangira gushyira mu bikorwa aya mabwiriza ariko kandi tuzarushaho kubegera. Aborozi nibakoreshe amahirwe ahari yabegerejwe barusheho kwiteza imbere n’imiryango yabo.”

Ntabana atangaza ko abona umukamo ungana na litiro 65 ku munsi uva ku nka eshanu; yemeza ko umukamo wiyongereye aho atangiye ubuhinzi akabona ibisigazwa ndetse akabona n’uburyo bwo kubuhunika.

Umusaruro w’ibigori yashyize ku isoko ukaba waramwinjirije miliyoni amafaranga angana na 4,800,000 z’amafaranga y’u Rwanda.

Uyu mugabo afite intego zo kongera umusaruro w’ubuhinzi n’ubworozi kuko yifuza kugura imashini z’ikata ubwatsi buva ku buhinzi n’uburyo bwo kurushaho guhunika ibisigwazwa by’ubwatsi biva ku buhinzi ndetse no kubaka hangari zibika ibiryo by’amatungo.

  • NSHIMIYIMANA FAUSTIN
  • Mutarama 28, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE