Kayonza: Abagore bakora imipira ya ‘Football’ bohereza i Burayi n’Amerika

  • NSHIMIYIMANA FAUSTIN
  • Ukuboza 12, 2023
  • Hashize amezi 5
Image

Abagore n’abakobwa bo mu Karere ka Kayonza bakomeje gukirigita ifaranga kubera imipira yifashishwa mu mukino w’umupira w’amaguru (football), aho bayiboneye amasoko ku mugabane w’u Burayi n’Amerika.

Abo bagore bakorera mu kigo gikorerwamo imyuga inyura mu kigo cyitwa “Urugo Women Opportunity Center”, aho bashobora kuboha imipira iri hagati ya 20 na 30 ku munsi, umwe mubayikora ukaba ugura 50,000 by’amafaranga y’u Rwanda ku isoko ryo mu gihugu.

Iyo mipira baboha ifite umwihariko mu gukomera kuko ikorwa mu mpu z’inka zikannye mu buhanga bakaba bazibona zatunganyirijwe mu nganda.

Abayikora bavuga ko gukora imipira y’amaguru mu mpu byabafashije kwikura mu bukene bibateza imbere n’imiryango yabo bitewe n’uko byahinduye imibereho yabo.

Uwayezu Devotha utuye mu Murenge wa Nyamirama, yavuze ko ubumenyi afite mu gukora umupira w’amaguru mu mpu bwaturutse ku mahugurwa yahawe n’Ikigo Urugo Women Opportunity Center, akaba yishimira ko amafaranga akura muri ibi bikorwa akora bimufasha kwishakamo ibisubizo no kwikemurira ibibazo ndetse adasize n’umuryango we.

Yagize ati: “Nagize amahirwe yo guhabwa amahugurwa y’amezi ane ariko nsoje kwiga muri Kanama 2023 mbona bampaye akazi. Kuva natangira akazi rero nishimira ko nakuyemo ubumenyi bwo kumenya kwikorera (Ballon), ikindi kandi ni amafaranga mbona aba yavuye mu byo mba nakoze kandi nkikemurira ibibazo ntategereje mu rugo ahubwo akenshi ni njye ubafasha kuko ari njye winjiza amafaranga afatika kandi aza buri kwezi.”

Umuhoza Cecile utuye mu Murenge wa Mukarange na we yagize ati: “Mu gihe gito maze nkora hano nyuma yuko bampaye amasomo yo gukora imipira, byatangiye kumfasha kuko amafaranga mbonye maze kuyaguramo amatungo arimo ihene n’inkoko, umwana wanjye mwitaho uko bikwiye kandi mfasha no mu rugo kuko ari ho mba.”

Intego z’abagore n’abakobwa bakora imipira mu mpu bavuga ko ari ukumenyekanisha imipira bakora ku rwego mpuzamahanga na bo bikarushaho kubateza imbere.

Umuyobozi wungirije ushinzwe ubucuruzi, ubukerarugendo n’imirimo mu Kigo cy’Urugo Women Opportunity Center, Cyubahiro Jean Christopher, yavuze ko baterwa ishema n’ibyo abagore n’abakobwa bakora kandi bigaragara ko bashyigikiwe n’inzego zitandukanye.

Yavuze ko ubwo u Rwanda rwakiraga Inteko rusange y’Impuzamashyirahamwe y’Umupira w’Amaguru ku Isi (FIFA) ya 73 muri Werurwe 2023, bagize amahirwe yo gusurwa n’umufasha wa Perezida wa FIFA Leena Infantino, aho bakorera i Kayonza.

Yagize ati: “Twagize amahirwe ubwo mu Rwanda haberaga Inteko ya FIFA kuko twasuwe n’umugore wa Perezida wa FIFA, asura ibikorwa byaba b’ababyeyi n’abakobwa. Kuri twe ni ishema rikomeye kuko bigaragara ko agaciro k’ibyo bakora kagaragaza neza ko umugore ashoboye kandi afite gushyigikirwa.”

Cyubahiro yakomeje avuga ko ubwo basurwaga n’umugore wa Perezida wa FIFA, Leena Infantino, batanze impano y’imipira y’amaguru ibiri kuri FIFA no kuri Perezida wa Repubulika y’u Rwanda Paul Kagame, ndetse hakaba hari ibiganiro na FIFA by’uburyo banoza ireme ry’iyo mipira bakora igakwirakwizwa hirya no hino ku Isi.

Yagize ati: “Umwihariko wacu ni uko umupira wakorewe hano uri muri FIFA, ubu turi mu biganiro na FIFA ku buryo twanoza imipira dukora ikagira ireme ryiza, ikajya ku rwego mpuzamahanga hanyuma FIFA ikajya iyifata ikayitanga hirya no hino nk’umwihariko w’igihugu cyacu.”

Abagore n’abakobwa bakora imipira yo gukina mu mpu z’inka ni 30, abahabwa akazi babanza guhabwa amasomo n’amahugurwa.

Ikigo Women Opportunity Center gifasha n’abandi bagore bari mu bukene bo muri Kayonza kwiteza imbere mu mibereho yabo n’ubukungu mu myuga y’ubudozi, ububoshyi, ubuhinzi ndetse no gutunganya ibikomoka ku mata badashingiye ku bagabo.

  • NSHIMIYIMANA FAUSTIN
  • Ukuboza 12, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE