Kamonyi: Yatemye insina 60 yateye anigamba ko yanatema umubyeyi we

Umusore witwa Ntakirutimana Emmanuel ufite imyaka 28 utuye mu Murenge wa Nyarubaka mu Kagari Gitare mu Mudugudu wa Remera mu Karere ka Kamonyi yatemye insina 60, ibisheke 10 n’ingemwe z’amacunga 3 biturutse ku mujinya waturutse ku makimbirane yagiranye n’umubyeyi we.

Aya makuru yamenyekanye ahagana saa tatu za mugitondo (9:00 am) kuri uyu wa 19 Gashyantare 2024.

Umunyamabanga Nshingwabikorwa w’Umurenge wa Nyarubaka, Providence Mbonigaba Mpozenzi yabwiye Imvaho Nshya ko aya makuru ari yo uyu musore mu gitondo cy’uyu munsi yatonganye n’umubyeyi (nyina) we amubaza impamvu ejo yakubise umwana, bararakaranya amuhindukirana n’umuhoro aramuhunga ahita ajya gutema insina 60, ibisheke 10 n’amacunga y’ingemwe 3 yateye mu murima bamutije akaziteramo.

Akomeza asaba abaturage kwirinda amakimbirane yo mu rugo ndetse bagatanga amakuru ku gihe ajyanye n’imiryango irimo amakimbirane kugira ngo yigishwe ive mu makimbirane ariko kandi abana bakwiye kubaha ababyeyi babo.

Imvaho Nshya yagerageje gushaka amakuru mu baturanyi b’uyu muryango bayitangariza ko uyu musore asanzwe asa n’uwananiye ababyeyi be, ndetse bamusabiye inguzanyo muri Banki bamugurira Ipikipiki nayo biramunanira.

Bivugwa ko uyu musore yari yamaze gutabwa muri yombi ndetse ababyeyi bagiye gutanga ikirego kuri RIB.