Kamonyi: Barishimira kwegerezwa amazi meza yatwaye asaga miliyari 5.4

  • AKIMANA JEAN DE DIEU
  • Werurwe 4, 2024
  • Hashize ukwezi 1
Image

Abaturage ba Kamonyi batuye mu Mirenge itandukaye harimo iyo mu Mayaga baravuga ko bishimira ko mu cyerekezo cy’imyaka 7 cyo kwihutisha iterambere (NST1) kigiye kugera ku musozo hamaze kubakwa imiyoboro y’ibilometero 466,3(466, 3 km) mu Karere kose yuzuye itwaye amafaranga y’u Rwanda 5, 404.000.000.

Bamwe muri bo bavuga ko bahoranaga ibibazo bitandukanye by’amazi kubera ko nta miyoboro bagiraga abenshi bakoreshaga amazi bavomaga mu bishanga no mu nkuka zabyo.

Nyirantezimana Marie Rose atuye mu m
Murenge wa Nyamiyaga avuga ko nta cyizere bagiraga bahoraga banywa amazi mabi yo mu bishanga bagahora kwa muganga bivuza indwara zikomoka ku mwanda.

Yagize ati: “Mbere y’imyaka 4 ishize ntabwo twatekerezaga ko tuzabona amazi kuko twese twadahaga mu bishanga ndetse akadutera indwara zirimo inzoka twaterwaga n’aya mazi twanywaga tukanayakoresha”.

Nduwayezu Straton avuga ko atuye mu Murenge wa Gacurabwenge mu Kagali ka Rugobagoba avuga ko bishimishije kuba Leta yarabatekerejeho ikabegereza amazi kuko ayo bari bafite yazaga gake kandi akabura cyane.

Ati: “Turishimye cyane kuko ubuyobozi bwacu bwarebye ikintu tubura cyane irakitwegereza ubu twabonye amazi meza ariko mbere twayabonaga gake cyangwa tukavomesha amagare twayabuze”.

Nirere Marine atuye mu Murenge wa Kayenzi avuga ko ashimira Perezida wa Repubulika Paul Kagame wabakuye ku kunywa amazi mabi.

Yagize ati: “Twebwe abatuye i Kayenzi turashimira Perezida wacu Paul Kagame kuko yadukuye ku kuvoma amazi mabi ubu n’indwara z’inzoka twahoranaga zaragabanyutse ariko ibi byose tubikesha imiyoborere myiza y’ubuyobozi bwacu”.

Umuyobozi w’Akarere wungirije ushinzwe Iterambere ry’Ubukungu, Niyongira Uzziel aherutse gutangariza Imvaho Nshya ko mu myaka 6 ishize hakozwe byinshi mu bijyanye no gukwirakwiza amazi ku baturage aho hubatswe imiyoboro no gutunganya amasoko avanwamo amazi.

Ati: “Mu myaka 6 ishize hakozwe byinshi mu kugeza amazi meza ku baturage bacu kuko hari imiyoboro mishya twakoze ndetse hari n’indi yasanwe tunongerera ubushobozi amwe mu masoko atanga aya mazi”.

Yongeyeho ko hari imiyoboro yubatswe kugira ngo abatari bafite mazi meza babashe kuyabona harimo umuyoboro w’amazi wa Ntwali ufite ibilometero 57 watwaye amafaranga y’u Rwanda miliyari 2,15 ; hubatswe umuyoboro w’amazi wa Gacurabwenge-Rugobagoba-Ngoma -Buye ufite ibilometero 57.5 utwara asaga miliyari 1, 200 000 000, hubatswe kandi umuyoboro wa AEP Kayenzi utwara agera kuri 1.257 000 000 ukaba ufite uburebure bw’Ibilometero 50.6 ndetse n’umuyoboro wa Gacurabwenge – Kibuza ukaba ufite ibilometero 22.2 utwara 480.000.000 Frw.

Hanasanwe umuyoboro w’amazi wa Shyogwe -Mayaga na wo watwaye amafaranga agera kuri 122.000.000 frw ukaba ufite uburebure bw’ibilometero 279, hongewe gusanwa umuyoboro w’amazi wa Mukanda -Kabuga- Raro watwaye angana na 110.000.000 frw ndetse n’Umuyoboro w’amazi wa Ntebe watwaye 85.000.000 frw ndetse hanaguwe isoko ya Mbizi mu Murenge wa Rukoma itanga amazi ku burebure bw’ibilometero 83,4 .

Visi Meya Niyongira asaba abaturage kubungabunga ibi bikorwa remezo ntibyangizwe kuko ni bo byubakiwe kandi hakenewe ko bibafasha bikabarinda kunywa amazi mabi yatuma barwara indwara zitandukanye zishobora gukomoka ku mwanda.

Mu mwaka wa 2017 Akarere ka Kamonyi kari karasaranganyije amazi ku kigero cya 64, 7% naho muri uyu mwaka bari kuri 85.6% bivuze ko bazamutseho 20, 9% mu kwegereza abaturage amazi.

  • AKIMANA JEAN DE DIEU
  • Werurwe 4, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE