Kamonyi: Abihayimana bashimirwa uburere n’ubumenyi batanga

  • Imvaho Nshya
  • Nyakanga 14, 2023
  • Hashize amezi 11
Image

Ishuri Kabuga TSS riherereye mu Kagari ka Kabuga, mu Murenge wa Ngamba mu Karere ka Kamonyi rishimirwa n’ubuyobozi bw’Akarere ka Kamonyi kubera ko ari rimwe mu mashuri y’Abihayimana bahakorera, kandi bakaba batanga ubumenyi buha ubushobozi abahize guhangana ku isoko ry’umurimo batibagiwe n’uburere.

Ubu butumwa bwagarutsweho n’Ubuyobozi bw’Akarere ka Kamonyi ubwo ishuri Fr. Ramon Kabuga TSS ryizihizaga isabukuru y’imyaka 26 rimaze rishinzwe, hatangwa n’amasakaramentu yibanze ku banyeshuri bahiga mu gitambo cya misa cyatuwe na Nyiricyubahiro Musenyeri wa Diocèse ya Kabgayi Baltazar Ntivuguruzwa.

Umuyobozi w’Akarere ka Kamonyi Dr. Sylvere Nahayo, yashimiye ubuyobozi bw’ikigo cya TSS Kabuga uburyo badahwema gutanga uburezi bufite ireme.

Ati: “Ubumenyi buhatangirwa byagaragaye ko umwana ahabwa ubumenyi akagera ku isoko hanze afite ubumenyi kandi anashobotse. Uburere n’uburezi tubona cyane cyane mu bigo by’Abihayimana cyane cyane gatulika ari indashyikirwa, intagereranywa”.

Yongeyeho ati: “Dutangira uyu mwaka twari dufite umuhigo wo kugira ngo mu mashuri abanza n’ayisumbuye abana bacu babashe gutsinda neza, nshima ko ibigo byo muri Diyoseze ya Kabgayi ibikorwa bitandukanye bigirwamo uruhare na Diyoseze twabigezeho 100%”.

Yakomeje asobanura kandi ko kuba abana bahabwa ubumenyi bufite ireme bunaherekezwa no gushobora kandi abahiga baba bafite n’uburere.

Umwe mu banyeshuri warangije kuhiga mu ishami rya multimedia agahiga abandi, Immaculee Nyiramaneza yavuze ko ubumenyi bahabwa n’uburere bahabwa bibafasha kwibona muri sosiyete.

Yagize ati: “Kuba nahize abandi mu ishami rya multimedia byanshimishije cyane naje ntabyiteguye cyane, sinari nzi ko hari buboneke impano ingenewe, ariko byanshimishije gushimirwa mu ruhame ni ibintu by’agaciro cyane”.

Yongeyeho ko atarangije kwiga agikomeje kandi agira inama bagenzi be gukora cyane kandi yifitiye icyizere, ibyo ni byo bya mbere bituma agera ku cyo ashaka kugeraho.

Umuyobozi w’icyo kigo Padiri Rudahunga Cyiza Edmond Marie yasobanuye ko cyatangiye gishinzwe na Fr. José Ramon Amunarriz w’umwesipanyolo mu 1997 ari ikigo gihugura cyane cyane urubyiruko mu bijyanye n’imyuga.

Yagize ati: “Ishuri Ramon Kabuga TSS ryatangiye mu 1997 ari ikigo gihugura cyane cyane urubyiruko mu bijyanye n’imyuga, kugira ngo abana biga mu mashuri abanza batabonaga amahirwe yo kwiga ayisumbuye bo muri aka gace bazabone icyo bimarira. Intambwe yatewe ni ndende”.

Yongeyeho ko iryo shuri nubwo rifite abanyeshuri basaga 400, ari ishuri rigenda ryaguka kuko ubushobozi bwo kwakira abanyeshuri ku baririmo barengaho gato.
Yashimiye Diyoseze ya Kabgayi uburyo yakomeje kubaba hafi, RTB, NESA n’izindi nzego zifatanya n’ubuyobozi bw’Akarere ka Kamonyi ndetse n’ubwitange abigisha bagira.

Padiri Cyiza kandi yasabye abanyeshuri gukomeza gushyigikira no guteza imbere ibikorwa bya Padiri Ramon bikababera imbarutso yo guharanira kudatsindwa amasomo, cyane ko bikorera mu gihe uwashinze ikigo Padiri Ramon yabikoreraga abandi.

Intego y’ikigo ishingiye ku butumwa bugira buti ‘Turere umwana ushoboye kandi ushobotse’.

Ku bijyanye no kunoza uburezi hari imboganmizi zagaragajwe ko bicyugarije iri shuri ariko bifite ibisubizo birimo nk’amacumbi no kwagura ibyumba by’amashuri.


Fr. Ramon Kabuga TSS, muri uyu mwaka wa 2022/2023 rifite abanyeshuri 429 bari mu mashami 5 ari yo ishami ry’Ububaji, ry’ubwubatsi, ubushabitsi mu bijyanye no gukorana n’ibigo by’imari n’amabanki, n’ishami ritangiye uyu mwuka imiterere n’imyubakire ya Mudasobwa na Multimedia.

Mu birori byo kwizihiza isabukuru y’ikigo kandi banashyize indabo ku mva ishyinguyemo José Ramon Amunarriz. Padiri Jose Ramon Amunarriz, yavukiye muri Espagne ahagana mu 1932 yitaba Imana mu mwaka wa 2002.

Abanyeshuri basabwe kujya birinda ibishuko no mu gihe bagiye mu biruhuko.

Yanditswe na NYIRANEZA Judith

  • Imvaho Nshya
  • Nyakanga 14, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE