Itamar Einhorn yegukanye agace ka kabiri ka Tour du Rwanda

  • SHEMA IVAN
  • Gashyantare 19, 2024
  • Hashize amezi 2
Image

Umunya Isiraheli  Itamar Einhorn w’imyaka 26 ukinira Israel Premier -Tech yegukanye agace ka kabiri ka Tour du Rwanda 2024 nyuma yo gukoresha amasaha atatu, iminota 17 n’amasegonda 31 ku ntera y’ibilometero 129.4 yahagurukiye i Muhanga igasorezwa i Kibeho mu Karere ka Nyaruguru.

Saa Tanu zuzuye ni bwo abasiganwa bahagurutse i Muhanga berekeza ku butaka butagatifu i Kibeho mu Karere ka Nyaruguru.

Aka gace ka kabiri abakinnyi batangiye bakora ibilometero 2,3 ibihe bitangira kubarwa bageze imbere y’Ibitaro bya Kabgayi.

Aka gace kandi kari kagizwe n’imisozi 3 yo mu byiciro 3 (Category 3) ari yo umusozi wa Kiyonza ku kilometero cya 98, uwa Maraba ku kilometero cya 106 n’uwa Coko ku kilometero cya 119,7.

 Muri aka gace harimo ahantu 2 ho kurwanira amanota ya Sprint.

Abakinnyi batatu ari bo Alexandre Mayer w’Ibirwa bya Maurice, Nsengiyumva Shemu wa May Stars ndetse na Munyaneza Didier wa Team Rwanda, bacitse bagenzi babo ku kilometero cya kabiri, bayobora isiganwa kugeza binjiye mu Karere ka Nyaruguru.

Munyaneza Didier wa Team Rwanda ni we wegukanye amanota ya sprint ya mbere yatangiwe mu Ruhango ku kilometero cya 21 aho yakurikiwe na Alexandre Mayer na Nsengiyumva Shemu.

Kugera ku kilometero cya 50 i Nyanza, aba bakinnyi batatu bari bamaze gushyiramo intera y’iminota irindwi n’amasegonda 50 hagati yabo n’igikundi.

Ikinyuranyo cyatangiye kugabanyuka ku kilometero cya 60 i Rusatira, aho igikundi cyari cyatangiye gukora cyane kugira ngo kigabanye ibihe cyarushwaga n’abakinnyi batatu bari imbere.

Ubwo bari bageze ku kilometero cya 63, hari abakinnyi benshi baguye mu gikundi, barimo ab’u Rwanda n’aba Eritrea.

Amanota ya Sprint ya Kabiri yatangiwe i Huye mu Mujyi, ku kilometero cya 74, yegukanywe na Nsengiyumva Shemu, akurikirwa na Munyaneza Didier na Alexandre Mayer.

Igikundi cyakomeje kugabanya ikinyuranyo, batatu b’imbere banyuze ku Kanyaru hasigayemo iminota ine n’amasegonda 55, ni mu gihe bageze ku kilometero cya 81 hasigayemo iminota ine n’amasegonda atatu.

Mu bilometero 25 bya nyuma, Abanyarwanda Nsengiyumva na Munyaneza bari bamaze gufatwa n’igikundi ariko Alexandre Mayer we yari yakomeje yabasize ndetse yegukana amanota y’umusozi wa mbere i Kiyonza.

Mu gihe hari hasigaye ibilometero 10 gusa, Eric Manizabayo wa Team Rwanda yacitse igikundi ashaka kugenda wenyine imbere, nyuma yo kunyura kuri Milan Doine wa Lotto-Dstny wari wafashe Mayer bazamuka i Maraba, ariko na we ahita agarurwa na Lennert Teugels w’ Bingoal WB,

Nk’uko byari byitezwe, aka gace kasorejwe muri sprint [kunyongana imbaraga mu gitambika], kegukanwa na Itamar Einhorn wa Israel-Premier Tech akoresheje amasaha atatu, iminota 17 n’amasegonda 31, ibihe bimwe n’abandi bakinnyi bagera kuri 12 bamukurikiye.

Itamar Einhorn yabaye umukinnyi wa mbere ukomoka muri Israel wegukanye agace muri Tour du Rwanda.

Ibihembo byatanzwe: 

Umunyarwanda muto mwiza yabaye Shyaka Janvier ukinira UCI Mixed Team Africa

Umunyarwanda mwiza yabaye Mugisha Moise ukinira Java-InovoTec

Umukinnyi muto mwiza umunyafurika mu isiganwa yabaye

Aklilu Arefayne ukinira Ikipe y’Igihugu ya Eritrea.

Umunyafurika mwiza yabaye Merhawi Kudus ukinira ikipe y’igihugu Eritrea

Umukinnyi wayoboye isiganwa igihe kirekire yagizwe Alexandre Mayer

Umukinnyi wahize abandi muri Sprint yabaye Munyaneza Didier ukinira Team Rwanda.

Umukinnyi wahatanye kurusha abandi yabaye Nsengiyumva Shemu ukinira May Stars.

Tour du Rwanda 2024 izakomeza ku wa Kabiri, tariki ya 20 Gashyantare, hakinwa Agace ka Gatatu kazahagurukira i Huye kerekeza i Rusizi ku ntera y’ibilometero 141km.

  • SHEMA IVAN
  • Gashyantare 19, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE