Isiganwa rya Tour du Rwanda 2024 ryashowemo miliyari 1,2 Frw

  • SHEMA IVAN
  • Gashyantare 27, 2024
  • Hashize amezi 2
Image

Isiganwa Mpuzamahanga rya Tour du Rwanda 2024 riheruka kubera mu Rwanda, ryatanzweho miliyari 1,2 z’amafaranga y’u Rwanda kugira ngo rigende neza.

Ku Cyumweru, tariki ya 25 Gashyantare ni bwo hakinwe agace ka nyuma mu duce umunani tugize isiganwa ngarukamwaka rinyura mu ntara zose zigize u Rwanda.

Tour du Rwanda ni isiganwa rimaze imyaka irenga 30 rikinwa, rikaba ryarabanje kuba iry’imbere mu gihugu nyuma riza kuba mpuzamahanga kugera aho rishyizwe ku rwego rwa 2.1 aho ryitabirwa n’abakinnyi bakomeye ku Isi.

Yaba abakinnyi ndetse n’abategura irushanwa bavuga ko uyu mwaka wari ufite umwihariko cyane haba mu kurushanwa ndetse no kuritegura bigendanye no kurisanisha na Shampiyona y’Isi izaba mu 2025.

Nk’uko ibyatangajwe na  The New Times, iri siganwa ryatazweho miliyari 1,2 Frw mu mitegurire yaryo ugeranyije na miliyari 1,4 Frw zashyizwe mu rya 2023.

Ni mu gihe mu mwaka wa 2020 ryashyizwemo miliyoni 740 z’amafaranga y’u Rwanda.

Akayabo katanzwe kugira ngo isiganwa rigende neza harimo 40% y’uruhare rwa Leta y’u Rwanda rwiyongera kuri 60% y’abaterankunga ndetse n’abaritegura.

Tour du Rwanda ni rimwe mu masiganwa akomeye muri Afurika kugeza ubu ari ku rutonde rw’Ishyirahamwe ry’umukino w’Amagare ku Isi (UCI) kuko ibihugu byinshi byohereza amakipe n’abakinnyi beza ngo babiheshe ishema.

Irya 2024 ryitabiriwe n’abakinnyi 94 nubwo 63 ari bo barisoje bakaba bari baturutse mu bihugu 13. Maystar, Java InovoTec na Team Rwanda ni yo makipe yari ahagarariye u Rwanda.

Umwongereza Peter Joseph Blackmore ukinira Ikipe ya Israel-Premier Tech ni we wegukanye Tour du Rwanda 2024 yakinwaga ku nshuro ya 16, aba umukinnyi 14 uyegukanye kuva ibaye mpuzamahanga mu 2009.

Nyuma ya Tour du Rwanda, hakurikiye imyiteguro yo kuzakira neza irushanwa rya Shampiyona y’Isi y’Amagare izabera i Kigali mu Rwanda kuva tariki ya 21 kugeza 28 Nzeri 2025, ndetse rikazaba ari n’inshuro ya mbere rizaba ribereye muri Afurika.

  • SHEMA IVAN
  • Gashyantare 27, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE