Dr Habineza Frank yikomye Tshisekedi watinyutse gutuka Perezida Kagame

  • KAMALIZA AGNES
  • Ukuboza 18, 2023
  • Hashize amezi 5
Image

Dr. Habineza Frank, Umuyobozi w’Ishyaka riharanira Demokarasi no kurengera Ibidukikije (Democratic Green Party), yamaganye bikomeye imvugo zibiba urwango za Perezida wa Repubulika Iharanira Demokarasi ya Congo Antoine Felix Tshisekedi watinyutse agatuka Umukuru w’Igihugu cy’u Rwanda Paul Kagame amugereranya na Hitler.

Depite Dr Frank Habineza avuga ko nubwo ibibazo bya dipolomasi abafite uburenganzira bwo kubivugabo ari Minisiteri y’Ububanyi n’Amahanga, ariko nk’ishyaka rye bamagana imvugo z’agasuzuguro n’agashinyaguro sizebya Umukuru w’Igihugu cy’u Rwanda.

Ati: “Nk’ishyaka turamagana imvugo mbi zisebya Umukuru w’Igihugu kuko aba ahagarariye Abanyarwanda bose noneho biriya bintu bavuze byo gushaka kumwitiranya na Hitler ni ibintu by’agasuzuguro cyangwa by’agashinyaguro kuko twese tuzi ubugome Hitler yakoreye Abayahudi ndetse n’abandi bantu yishe nabi cyane harimo abantu bagufi cyane, yakoze ubugome bwinshi, gufata Umukuru w’Igihugu cy’u Rwanda akamugereranya na Hitler ni ikintu twamagana twivuye inyuma ntawagishyigikira”.

Yongeyeho ko Tshisekedi akwiye gukora politiki ye mu mahoro aho guteza umwuka mubi wateza ibindi bibazo mu bene gihugu.

Ati: “Tukaba twasaba Perezida ko yakora politiki ye mu mahoro, ye kuzana ibintu nk’ibyo bishobora guteza ibindi bibazo bitari ngombwa mu bene gihugu, kuko Abanyekongo ni bene wacu ni inshuti zacu turacuruzanya ndetse hariya Rubavu mubona ukuntu bahora bagenderana ntabwo dushaka  kugirana ibibazo nabo rwose. Niba hari n’ibibazo bihari bazabikemure baciye mu nzira y’amahoro ni byo Green Party yemera.”

Yongeyeho ko ishyaka rye ryemera ko nta gihugu gikwiye gutera ikindi ariko mu gihe igihugu gitewe gikwiye kwitabara kandi bagishyigikira. Politike ikwiye gukorwa mu mahoro kandi bemera ko Leta ikwiye kujyaho iciye mu matora batemera ubutegetsi bufashwe ku mbaraga (coup d’etat) kandi ibibazo byose bikwiye gukemurwa biciye mu biganiro.

Ubwo Perezida Tshisekedi yiyamamarizaga mu mujyi wa Bukavu ku ya 08 Ukuboza 2023, yageraranyije Perezida Kagame na Adolfe Hitler wishe Abayahudi bageze kuri Miliyoni eshashatu agakora n’ubundi bugome.

Ni amagambo atarakiriwe neza haba ari mu Banyekongo ubwabo ndetse n’abandi ku mbuga nkoranyambaga aho benshi bamuhaye urw’amenyo bavuga ko imvugo ze zidakwiye Umukuru w’Igihugu.

Bavuze ayo ari amahomvu adakwiye kugira ibindi bihugu urwitwazo kuko yananiwe gukora ibyo yasezeranyije abaturage ubwo yiyamamarizaga manda ye ya mbere muri Congo.

Si ubwa mbere Tshisekedi yumvikanye avuga imvugo zihembera urwango kuko no mu kwezi gushize ubwo yari kuri Televiziyo y’igihugu mu magambo ye yavuze ko azakora ibishoboka byose agaha ubufasha abashaka guhirika ubutegetsi bw’u Rwanda.

Mu bihe bitandukanye u Rwanda ruhakana kenshi ibirego rushinjwa na Congo byo guha ubufasha umutwe wa M23 ruvuga ko ari ibinyoma, ndetse n’uyu mutwe ntuhwema kuvuga ko nta n’urupfumuye uhabwa n’u Rwanda.

  • KAMALIZA AGNES
  • Ukuboza 18, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE