Intara y’Iburengerazuba iraburirwa ko ishobora kwibasirwa n’ibiza

  • ZIGAMA THEONESTE
  • Mata 17, 2024
  • Hashize ukwezi 1
Image

Minisiteri Ishinzwe ibikorwa by’Ubutabazi (MINEMA) yaburiye abatuye mu Ntara y’Iburengerazuba ko icyo gice gishobora kwibasirwa n’ibiza, kubera ko imiterere y’iyi Ntara idafite ubudahangarwa buhagije ku mihindagurikire y’ibihe.

Rukebanuka Adalbert, Umuyobozi Mukuru ushinzwe igenamigambi no guhangana n’ibiza muri MINEMA yabwiye itangazamakuru ko mu myaka itanu ishize abantu 492 bahitanywe n’ibiza, muri abo abagera kuri 317 bahitanwe n’inkuba.

Yavuze ko hashingiwe ku igenzura ryakozwe mu nzego zitandukanye zirimo iz’ubuzima,iz’uburezi,ibikorwa remezo n’ubuhinzi byagaragaye ko icyo gice cy’Iburengereza gifite ibyago byo kwibasirwa n’ibiza cyane.

Uwo muyobozi yavuze ko ubudahangarwa bwo guhangana n’ibiza mu Ntara y’Iburengerazuba buri ku gipimo cya 42% gusa, agahamya ko hakwiye gushyirwamo ingamba zishoboka zose kugira ngo hakumirwe ibiza bishobora kuhibasira muri ibi bihe.

Rukebanuka yagize ati: “Ibiza byiganje mu Ntara y’Iburengerazuba.”MINEMA kandi itangaza ko ibiza biheruka kwibasira u Rwanda byarutwaye arenga miliyoni 500 z’amafaranga y’u Rwanda, amenshi akaba yarakoreshejwe mu guhangana na byo mu gice cy’Iburengerazuba.

Yasabye ko hashyirwa imirindankuba mu bigo rusange bya Leta nk’ibitaro n’amashuri n’ibindi, ashimangira ko icyihutirwa cyane ari uguhagarika ibikorwa by’ubucukuzi bw’amabuye y’agaciro acukurwa mu buryo butemewe n’amategeko, cyane cyane mu Karere ka Ngororero, ibyo bikorwa bizwiho guteza inkangu za hato na hato.

Rukebanuka kandi yagaragaje impungenge zijyanye n’ingamba z’umutekano ku kiyaga cya Kivu, yibaza ku bwishingizi bw’ubwato bukorera muri icyo kiyaga.

MINEMA itangaza ko Ngororero ari yo iza inyuma mu gukaza ingamba zo guhangana n’ibiza, aho iri ku gipimo cya 39%, igakurikirwa na Karongi iri kuri 40%, Nyabihu kuri 41% na Rutsiro iri kuri 42%. Rubavu yo iri kuri 43%, Rusizi kuri 44% mu gihe Nyamasheke iri ku gipimo cya 46%.

Guverineri w’Intara y’Iburengerazuba, Dushimimana Lambert yatangaje ko harimo gushyiramo ingamba zo guhangana n’ibiza, harimo kurwanya isuri, gutera amashyamba ku misozi cyane ko icyo gice kigizwe n’imisozi miremire.

Yagize ati: turimo gushyiraho ingamba zo guhangana n’inkangu n’ibiza byibasira Intara yacu, harimo gushyiraho imirindankuba, no kongera gutera amashyamba”.

Mu rwego rwo guhangana n’inkuba, Dushimimana yashimangiye ko ari ngombwa gushyira imirindankuba ahantu hahurira abantu benshi nko mu mahoteli, mu nsengero, no kuri sitade, ashimangira ko hari ibihano byateganyijwe ku bantu batubahiriza ayo mabwiriza.

Ati: “Turajya inama yo gushyira imirindankuba ahantu hose hahurira abantu benshi, kandi tuzaca amande abantu bose batazubahiriza amategeko kugira ngo tugaragaze uburemere bw’ingaruka z’inkuba.”

  • ZIGAMA THEONESTE
  • Mata 17, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE