Ingorane zo kubaka mu Mujyi wa Kigali nta byangombwa

  • KAYITARE JEAN PAUL
  • Ugushyingo 28, 2023
  • Hashize amezi 6
Image

Hirya no hino mu Mujyi wa Kigali hakunze kumvikana inkuru z’inzu zisenywa zicyubakwa cyangwa zaruzuye, kubera kutubahiriza amabwiriza agenga imyubakire mu Mujyi wa Kigali.

Mu batubahiriza amabwiriza y’imyubakire, harimo abarara bubaka bugacya inzu zuzuye, abubakira mu bipangu ndetse n’abazubaka ku karubanda nyuma yo gutanga ruswa.

Ingingo ikunze kugarukwaho ni ruswa igaragara mu myubakire nkuko Umuryango Mpuzamahanga urwanya akarengane na ruswa, ishami ry’u Rwanda (TI-Rwanda) ubigarukaho muri raporo zinyuranye.

Iyo hatahuwe inzu zubatswe mu buryo bunyuranyije n’amategeko zikurwaho bityo ba nyirazo bakavuga ko barenganyijwe, ntibanatinya kuvuga ko batanze n’akantu (ruswa).

Aha ni ho Umujyi wa Kigali uhera ushishikariza abaturage kubaka babanje gusaba no guhabwa uruhushya ndetse no kubahiriza igishushanyo mbonera cyemejwe.

Ubutumwa bwanyujijwe ku rubuga rwa X rw’Umujyi wa Kigali bugira buti “Ntibyemewe gutangira kubaka utarabona uruhushya ngo urumanike kuri site.

Irinde imyubakire itemewe kuko iteza ibihombo kandi wubahirize inama zitangwa n’abagenzuzi”.

Habiyambere Enan, umukozi mu Ishami ry’ubugenzuzi mu Mujyi wa Kigali, asobanura ko iyo umuturage agiye kubaka yasabye uruhushya bimufasha gushyira mu bikorwa igishushanyo mbonera.

Ikindi ngo bimufasha kumenya ibyo agiye kubaka ndetse akagirwa inama zijyanye na tekiniki.

Akomeza agira ati: “Ikindi ibyo wubatse biba bifite umutekano kubera ko biba byasuzumwe n’inzego zibishinzwe ndetse n’abanyamwuga babishinzwe.

Icyo gihe akaba hari icyizere cy’uko ibyo wubatse birambye ndetse bifite umutekano, yaba ari inyubako ku bazayigana kandi bikaba byubahirije igishushanyo mbonera cy’Umujyi wa Kigali”.  

Ashishikariza abantu kwirinda gukora ibikorwa byo kubaka badasabye uruhushya kuko bibateza ibibazo byinshi birimo n’ibihombo.

Uwubatse binyuranyije n’amabwiriza y’imyubakire mu Mujyi wa Kigali akavanirwaho ibyo yubatse ngo bimutera ihungabana kandi bikagira ingaruka ku bukungu bw’igihugu ndetse no ku isura y’Umujyi wa Kigali muri rusange.

Habiyambere agira ati: “Iyo umuntu yubatse ibitemewe atanabifitiye uruhushya bikurwaho kandi ku kiguzi cye. Icyo gihe aba ahombye yaba kubyubaka no kubikuraho ndetse n’igihugu kikaba gihombye”.

  • KAYITARE JEAN PAUL
  • Ugushyingo 28, 2023
  • Hashize amezi 6
TANGA IGITEKEREZO
lg says:
Ugushyingo 28, 2023 at 4:04 pm

Birashoboka cyane ko kubaka inzu ikarinda yuzura hanyuma ukaza gusenyerwa ko haba halimo Ruswa ntagushidikanya ntabwo umuntu yatangira inzu ngo ageze aho asakara ntayo ilimo kuvugako bubaka bugacya yuzuya nibike za gatsata za rebero hepho ho nubu birakorwa nahandi mumanegeka naho inzu igaragara biterwa na Ruswa ndetse naho niyo nubwo bwacya yujuje aba yatanze akantu gusa si abo mumugi wa Kigali baba bayihawe nabinzego zibanze limwe nalimwe bikagera no mumurenge umugi wa Kigali ujye unakurikirana abo baho byabonetse abahayobora nabo bahanwe

Andika igitekerezo

AMATEGEKO AGENGA IYANDIKA RY'IGITEKEREZO CYAWE