Imihanda ya kaburimbo ya 1 600 Km yakuye abaturage mu bwigunge

  • NYIRANEZA JUDITH
  • Mutarama 24, 2024
  • Hashize amezi 4
Image

Minisitiri w’Intebe Dr Ngirente yatangaje ko murwego rw’iterambere ry’ibikorwa remezo, hakozwe imihanda ya kaburimbo kuri Kilometero 1 600 yafashije abaturage kuva mu bwigunge no kugenderana.

Ibyo bikubiye mu bikorwa byakozwe muri gahunda ya Guverinoma y’imyaka irindwi igamije kwihutisha iterambere rirambye, NST1 biri mu ngingo yo gutunganya ibikorwa remezo, koroshya ubuhahirane n’imirimo yo gutwara abantu n’ibintu mu buryo bwa rusange.

Minisitiri w’Intebe Dr Ngirente yabigarutseho ku munsi wa mbere w’Inama y’Igihugu y’Umushyikirano ejo hashize ku wa Kabiri tariuki ya 23 Mutarama ubwo yagaragazaga aho iterambere rigeze.

Yagize ati: “Mu bikorwa remezo horoshywa imigenderanire hubatswe imihanda ya kaburimbo ihuza Uturere dutandukanye ifite uburebure bwa kilometero 1600 yagiye igabanya ubwigunge byoroshya imigenderanire n’imihahiranire.”

Minisitiri w’Intebe Dr Ngirente Edouard

Yagarutse kuri iyo mihanda yashyizweno kaburimbo harimo umuhanda wa Rukomo- Base- Nyagatare, Kagitumba- Kayonzaa -Rusumo, Ngoma- Bugesera- Nyanza, Huye-Kibeho n’umuhanda wa Pindura-Bweyeye.

Hari n’imihanda ya kilometero zisaga 237 yatunganyijwe mu Mujyi wa Kigali kandi bigaragara ko yiyongereye muri iyi myaka 7.

Minisitiri w’Intebe kandi yanagaragaje ko mu rwego rwo korohereza umusaruro kugera ku isoko hanatunganyijwe imihanda y’imigenderano (feeder roads)

Yagize ati: “Hagamijwe gufasha abahinzi n’aborozi kugeza umusaruro wabo ku isoko, hirya no hino hubatswe kandi hasanwa imihanda y’imigenderano ifite kilometero 3 700, ubwo intego tuba tuyigejeho kuko twari twihaye Kilometero 3000.”

Mu Mujyi wa Kigali naho ingendo zarorohejwe hakorwa imihanda ndetse hanongerwamo imodoka nini zitwara abagenzi mu buryo bwa rusange.

Ati: “Mu koroshya ingendo mu Mujyi wa Kigali hakozwe imihanda ya kilometero 237 kandi mu rwego rwo gukemura burundu ikibazo cyo gutwara abantu mu buryo bwa rusange mu Mujyi wa Kigali, hari bisi 140 zizagurwa ziyongera kuri 200 zamaze kugezwa mu gihugu ndetse 100 muri zo zikaba zaratangiye gukora.

Hamaze kandi gushyirwa amatara ku mihanda ku burebure burenga kilometero 2 160 ku mihanda minini n’iyo mu mijyi ugereranyije na kilometero 2 400 zari ziteganyijwe, aho naho akazi karacyakomeje.”

Ingo nshya zirenga miliyoni zagejejweho amashanyarazi hasanwa n’imiyoboro y’amazi

Dr Ngirente yakomeje atangaza ko imiyoboro y’amazi yubatswe isaga kilometero 1 800 mu bice by’imijyi na kilometero 2 000 mu bice by’icyaro, mu gihe imiyoboro y’amazi yasanwe ari 191. Ni igikorwa kigikomeza kuko amazi meza ni isoko y’isuku n’imibereho myiza.

Ku bijyanye n’amashanyarazi yagize ati: “Ingo zifite amashanyarazi ziyongereye ziva kuri 34,4% mu 2017 zigera kuri 74% ariko intego ni ukugira ingo 100% nk’uko Perezida wa Repubulika yabidusabye. Turacyafite rero kurangiza n’iyo 26% kugira ngo ingo zose z’Abanyarwanda zibe zifite amashanyarazi.”

Ibikorwa remezo by’ikoranabuhanga na byo birakataje

Minisitiri w’Intebe Dr Ngirente yavuze ko ibikorwa remezo by’ikoranabuhanga  na byo bikomeje kwitabwaho kugira ngo bikomeze kwihutisha serivisi.

Yagize ati: “Mu guteza imbere ibikorwa remezo by’ikoranabuhanga umuyoboro mugari wo kwihutisha internet mu 2017 wari ku burebure bwa kilometero 3 300 ugera kuri kilometero 15 700 mu 2023 dukwiza uwo muyoboro mu gihugu hose.

Serivisi za Leta zirenga 680 ubu zitangwa hakoreshejwe ikoranabuhanga cyane cyane zinyuze ku Irembo byihutisha serivisi kandi bigabanyan mwanya abantu bamaraga bategereje cyangwa se bajya gutonda ku bigo bya Leta.”

Ikindi ni uko ubu hari gushyirwa imbaraga mu kuba buri Munyarwanda wese yagira telefone ndetse akanamenya no  kubyikorera.

Ikoranabuhanga ryihurtsha serivisi
  • NYIRANEZA JUDITH
  • Mutarama 24, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE