IMF yemereye u Rwanda miliyari 60 Frw muri uku kwezi

  • NTAWITONDA JEAN CLAUDE
  • Ukuboza 4, 2023
  • Hashize amezi 3
Image

Ikigega Mpuzamahanga cy’Imari (IMF) cyatangaje ko hagati muri uku kwezi k’Ukuboza kizagenera u Rwanda miliyoni 48.5 z’amadolari y’Amerika, ni ukuvuga miliyari zisaga 60 z’amafaranga y’u Rwanda, azifashishwa mu gushyigikira ikigega kigamije kubaka ubudahangarwa mu guhangana n’imihindagurikire y’ibihe.

Iyo nkunga y’inyongera yatangarijwe i Dubai muri Leta Zunze Ubumwe z’Abarabu (UAE) ahateraniye Inama y’Umuryango w’Abibumbye ya 28 yiga ku mihindagurikire y’ibihe (COP28), ikaba ije yiyongera kuri miliyoni 319 z’amadolari y’Amerika IMF yageneye u Rwanda mu mpera z’umwaka ushize igamije kurwanya ihindagurika ry’ibihe no kwitegura guhangana n’ibyorezo.

Iyo nkunga izatangwa muri gahunda y’ubufatanye mu gutera inkunga imishinga yo guhangana n’imihindagurikire y’ibihe yatangirijwe mu Nama y’i Paris yigaga ku Masezerano Mpuzamahanga nterankunga yateranye ku wa 22 no 23 Kamena 2023.

Ubuyobozi bwa IMF bwagize buti: “Dutewe ishema no gukomeza gufatanya n’u Rwanda n’Umuryango Mpuzamaahanga muri rusange, mu gushyigikira ubuyobozi n’ibikorwa bishya bihangana n’imihindagurikire y’ibihe. Gahunda y’u Rwanda y’ubufatanye mu gutera inkunga imishinga ihangana n’imihindagurikire y’ibihe ni igihamya cy’uburyo dushobora guhindura imiterere y’ibikorwa mpuzamahanga n’imari ikoreshwa mu guhangana n’imihindagurikire y’ibihe.”

Iyo gahunda iterwa inkunga n’Ikigo cy’Abafaransa gishinzwe Iterambere Mpuzamahanga (AFD), Umuryango w’Ubumwe bw’u Burayi (EU), Banki y’Ishoramari y’u Burayi (EIB), Ikigo Mpuzamahanga cy’Imari (IFC), Ikigo cy’u Budage gishinzwe Ubutwererane Mpuzamahanga (KfW) ndetse n’Ikigo cy’Abataliyani gishinzwe ubutwererane mpuzamahanga binyuze muri Banki y’Iterambere yitwa Depositi e Prestiti (CDP).

Ni gahunda yuzuzanya n’ubundi bufatanye busanzwe burangwa hagati y’u Rwanda n’amahanga, burimo Gahunda y’ubufatanye bw’u Rwanda n’u Budage igamije iterambere no guhangana n’imihundagurikire y’ibihe ndetse n’izindi gahunda zinyuranye rukorana na Banki y’Isi.

Gahunda y’Ubufatanye bw’u Rwanda n’amahanga mu guhangana n’imihindagurikire y’ibihe igamije korohereza ubufatanye bwa Leta n’abikorera mu kongera inkunga ishyirwa mu guhangana n’imihindagurikire y’ibihe.

Ibyo ngo byagezweho binyuze mu Rwego rwashyiriweho kubaka ubudahangarwa n’Iterambere Rirambye (RSF) rw’Ikigega Mpuzamahanga cy’Imari (IMF), bityo indi nkunga ikaba ikazatangwa imaze kwemezwa n’Inama Nshingwabikorwa y’Ubuyobozi bwa IMF.

Mu rwego rwo kurushaho kugaragaza ubushake mu gushyira mu bikorwa gahunda ziterwa inkunga na IMF, Guverinoma y’u Rwanda yatangaje amavugurura y’uburyo bubiri ajyanye no gusesengura ingorane n’ibyago byibasira imishinga y’ibigo bya Leta ndetse n’ubufatanye bwa Leta n’ibigo by’abikorera.

Andi mavugurura yakozwe mu rwego rwo kubaka ubukungu bufite ubudahangarwa ku mihinagurikire y’ibihe kandi bugendanye n’intego u Rwanda rwiyemeje mu guhangana n’imihindagurikire y’ibihe.

  • NTAWITONDA JEAN CLAUDE
  • Ukuboza 4, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE