Imbuto zose zatumizwaga hanze y’u Rwanda rurazikorera

  • ZIGAMA THEONESTE
  • Mutarama 24, 2024
  • Hashize ukwezi 1
Image

Leta y’u Rwanda yatangaje ko imbuto zose zatumizwaga hanze zisigaye zikorerwa mu gihugu imbere, aho amafaranga y’u Rwanda agera kuri miliyari 8 yazigendagaho asigaye afasha abatubuzi bazo.

Ni ibyatangajwe na Minisitiri w’Intebe Dr Ngirente Edouard mu kiganiro yagejeje ku bitabiriye Inama y’Igihugu cy’Umushyikirano ya 19, ku wa Kabiri tariki ya 23 Mutarama 2024, cyagarukaga ku byagezweho muri Gahunda ya Guverinoma y’imyaka 7 yo Kwihutisha Iterambere (NST1) yo kuva mu 2017 kugeza mu 2024.

Mu kugaragaza ibyagezweho mu rwego rw’ubuhinzi n’ubworozi, Minisitiri w’Intebe yagaragaje ko amafaranga y’u Rwanda yabarirwaga hagati ya miliyari enye n’umunani ari yo yagendaga mu gutuzima imbuto hanze, ariko akaba afasha Abanyarwanda kuzituburira imbere mu gihugu.

Minisitiri w’Intebe Dr Ngirente kandi yahamije ko mu mwaka wa 2019, Leta y’u Rwanda yari yihaye intego ko igiye guhagarika gutumiza imbuto hanze kandi intego yagezweho uko bikwiye.

Yagize ati: “Twagira ngo tubwire Abanyarwanda ko kuri ubu ngubu, imbuto zose dukenera mu Rwanda tuzikorera hano imbere.”

Mu bindi u Rwanda rumaze kugeraho kandi mu rwego rwo kurwanya isuri, himakajwe gukora amaterasi y’indinganire n’andi materasi yikora, kuri hegitari zirenga miliyoni imwe n’ibihumbi 147 mu gihugu hose.

Leta igashishikariza abahinzi gukomeza gukora amaterasi mu mirima yose.

Minisitiri w’Intebe Dr. Edourd Ngirente yagaragaje ko binyuze muri Gahunda ya NST1, hongerewe ubuso bwuhirwa buva kuri hegitari zisaga 48.000 mu 2017 bugera kuri hegitari zirenga 71.000. Ibi byakozwe mu rwego rwo kwimakaza ubuhinzi budategereje imvura gusa.

Imwe muri iyi mishinga minini yo kuhira harimo uwa Gabiro, Nasho na Mpanga.

Minisitiri w’Intebe, Dr Ngirente Edouard, yavuze ko Guverinoma yongereye imbaraga mu kuvugurura ubworozi, harimo kwita ku buzima bw’amatungo, kongera ibikorwaremezo by’ubworozi n’ibindi.

Ati: “Ibi byagize uruhare mu kongera umukamo w’amata uva kuri litiro zisaga 700.000 mu 2017, ubu tugeza kuri litiro hafi miliyoni imwe n’ibihumbi 100.”

Minisitiei w’Intebe Dr. Ngirente Edouard

Mu bijyanye no gutanga nkunganire mu rwego rwo guhangana n’ibiciro bigenda bizamuka ku makoso yo hirya no hino ku Isi, u Rwanda rwishimira ko ingano y’ifumbire, abahinzi bakoresha yikubye inshuro zirenga ebyiri.

Mu 2017 hegitari imwe yashyirwagaho ifumbire ingana n’ibiro 32 gusa, none ubu ni ibilo 70 kuri hegitari.

Guverinoma ihamya ko urugendo rukiri rurerure mu kongera ifumbire ishyirwa kuri hegitari kuko mu bihugu byateye imbere, hari aho bageze ku bilo 140 kuri hegitari.

Icyakora u Rwanda rumaze gutera intambwe ishimishije muri Afurika kuko hari bimwe mu bihugu bigikoresha ibilo 25 by’ifumbire kuri hegitari.

Mu rwego rwo gukomeza kongera ingano y’ifumbire no kuyigeza ku baturage, hubatswe uruganda rukora ifumbire mu Karere ka Bugesera, ruzajya rukora toni ibihumbi 100 by’ifumbire mu gihe cy’umwaka.

Ni ifumbire yitezweho gukomeza kongera umusaruro mu rwego rw’ubuhinzi.

Guverinoma y’u Rwanda kandi ikomeza gushikariza abahinzi n’aborozi kujya muri gahunda yo kwishingira amatungo n’ibihingwa kuko byagaragaye ko ari ingenzi, dore ko bwanabagobotse mu gihe cy’ibiza byibasiye igihugu mu mwaka ushize.

Ubusanzwe Leta yunganira umuhinzi cyangwa umworozi ho 40% akitangira 60% y’ikiguzi cy’ubwishingizi bw’amatungo cyangwa ibihingwa bye.

Minisitiri w’Intebe Dr. Ngirente Edouard yanahishuye ko mu Rwanda, hagiye kuzura uruganda rutunganya amata y’ifu, aho ruzajya rutunganya litiro ibihumbi 650 z’amata ku munsi.

Ati: “Twagira ngo tumare impunge Abanyarwanda ko aho amata azaba ari hose, tuzagira amakusanyirizo ayakusanya aho ari hose bitagoranye, kandi ntihagire uwo amata abapfira ubusa.”

Madamu Jeannette Kagame
Perezida wa Repubulika Paul Kagame
  • ZIGAMA THEONESTE
  • Mutarama 24, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE