Ikigo gikora ifumbire muri Morocco kizanye ubunararibonye bw’imyaka 100 mu Rwanda

  • NTAWITONDA JEAN CLAUDE
  • Ukuboza 21, 2023
  • Hashize amezi 5
Image

Ubuyobozi bw’Ikigo OCP AFRICA, ishami ry’Ikigo OCP Group cyo muri Morocco gifite ubunararibonye bw’imyaka 100 mu gutunganya ifubmbire mvaruganda, bwatangaje ko bwiteguye gushora imari itubutse mu ruganda rukora ifumbire rushya rwuzuye mu Rwanda, no mu rwego rw’ubuhinzi muri rusange.

Ubuyobozi bwa OCP Africa bwavuze ko buzanye ubunararibonye bw’igihe kirekire nka kimwe mu bigo byafatanyije mu kubaka urwo ruganda rukora ifumbire mvaruganda ifite ireme kandi itanga umusaruro uhagije.

Byagarutsweho ku wa Gatatu, ubwo Minisitiri w’Intebe Dr. Ngirente Edouard yakiraga Umuyobozi wa OCP Africa Anouar Jamali n’itsinda ryaje rimuherekeje, bakagirana ibiganiro byibanze ku bufatanye mu kwimakaza iterambere ry’ubuhinzi.

Jamali n’itsinda ryaje rimuherekeje bari mu bitabiriye itahwa ry’uruganda rwa mbere rw’ifumbire mu gihugu, rwuzuye mu Karere ka Bugesera rukaba rwitezweho kujya rukora nibutra toni zisaga 100,000 buri mwaka.

Minisitiri w’Ubuhinzi n’Ubworozi Dr. Musafiri Ildephonse, yabwiywe abanyamakuru ko Minisitiri w’Intebe w’u Rwanda n’Umuyobozi wa OCP Africa baganiriye by’umwihariko ku gushima intambwe itewe n’u Rwanda mu kugira uruganda rukora ifumbire mvaruganda yitezweho kuzamura umusaruro w’ubuhinzi ku kigero nibura cya 40%.

Dr. Musafiri yashimangiye ko urwo ruganda rwitezweho gutanga umusaruro ufatika uzafasha kwigobotora itumizwa ry’ifumbire mu mahanga, kandi ngo ruzajya rukora ifumbire ijyanye n’imiterere y’ubutaka buboneka muri buri gace runaka.

Ibiganiro byabo byanibanze kandi ku kurushaho gukora ifumbire irushijeho guhendukira abaturage kandi igera ku bahinzi bose mu Rwanda mu rwego rwo gushyigikira gahuda yo kongera umusaruro no kwihaza mu biribwa.

Ikindi mu byagarutsweho ni gahunda yo kurushaho kongera ishoramari mu rwego rwo gukorera ifumbire mu Rwanda, ubuyobozi bwa OCP Africa bwiyemeza ko buzakoresha ibikoresho fatizo biboneka mu Rwanda mu gukora ifumbire ibereye Abanyarwanda.

Ubuyobozi bw’urwo ruganda nanone bwashimangiye ubushake bwo gushora imari mu buhinzi ku butaka b’u Rwanda busaga hegitari 1000, bityo hakaba hategurwa gahunda yo kuzasura ibice bitandukanye bashobora kurambagizamo ubutaka bazakoreraho ubuhinzi bw’umwuga.

Minisitiri Dr. Musafiri ati: “Izi mbaraga bashyiramo zigamije kongera ibikorwa remezo by’ubuhinzi, harimo ibijyanye no kuhira, kongera umusaruro w’ubuhinzi n’ibindi.”

Nanone kandi Icyo kigo cyanagaragaje agaciro ko gushora imari mu kongerera agaciro umusaruro w’ubuhinzi n’ubworozi mu guharanira ko nta musaruro upfa ubusa ndetse ushobora kubikwa igihe kirekire bigatanga umusanzu mu kwimakaza umutekano w’ibiribwa.

  • NTAWITONDA JEAN CLAUDE
  • Ukuboza 21, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE