Ikigo cyo mu Bushinwa kirateganya guteranyiriza imodoka mu Rwanda

  • NTAWITONDA JEAN CLAUDE
  • Ugushyingo 20, 2023
  • Hashize amezi 6
Image

Nyuma ya Volkswagen, Ikigo Dongfeng Motor Corporation Ltd kigezweho mu gutunganya imodoka zijyanye n’Igihe mu Bushinwa, cyatangiye gutekereza kuza kwagurira ibikorwa byacyo mu Rwanda, aho giteganya kuhubaka uruganda ruteranya imodoka zacyo.  

Dongfeng Motor Corporation Ltd. ni ikigo cya Leta y’u Bushinwa gifite icyicaro mu Mujyi wa Wuhan ahitwa Hubei, cyashinzwe mu mwaka wa 1961, kikaba kiri ku mwanya wa gatatu mu nganda enye nini zitunganya imodoka zicungwa na Leta.

Icyo kigo kivugwaho kuba gitunganya imodoka zo mu bwoko butandukanye kandi zihabwa amazina yihariye nka Venucia, Fengdu, Voyah, Aeolus, Forthing, ariko kigakora n’izifite amazina amenyerewe ku rwego mpuzamahanga nka Dongfeng-Honda, Dongfeng-Nissan na Dongfeng-Peugeot Citroën.

Mu mwaka wa 2021, 79% by’imodoka miliyoni 3.28 zagurishijwe n’icyo kigo mu bihugu birenga 100 ku Isi, zari zifite amazina azwi ku rwego mpuzamahanga.

Icyo kigo nanone gikora imodoka zikoresha amashanyarazi muri ayo mazina gikora, ariko hakaba harimo n’amazina y’imodoka zikoresha amashanyarazi azwi ku rwego mpuzamahanga nka Voyah.

Mugabo John, Umuyobozi w’Ikigo Choice Africa Investments kibarizwa mu Ihuriro Carcarbaba ricuruza imodoka za Dongfeng mu Rwanda, yabwiye itangazamakuru ko urwo ruganda rwa Leta y’u Bwushinwa rwiteguye kwagurira ibikorwa byarwo mu gihugu cy’Imisozi Igihumbi.

Yagize ati: “Ubusabe bw’abagura imodoka tuzana nibugera kuri 200 na 300 ku mwaka, uruganda ruteranya izo modoka ruzazanwa mu Rwanda.”

Yagaragaje iby’iyo gahunda anashimangira ko kugeza ubu, ubusabe bw’izo modoka mu Rwanda buri hafi kugera kuri 200 ku mwaka.

Uru ruganda rukora imodoka zo mu bwoko butandukanye zigezweho mu bwiza no mu gukomera

Uretse imodoka zisanzwe, uruganda rwa Dongfeng rukora n’imodoka zifashishwa mu bwubatsi, imodoka za gisirikare n’izindi zitandukanye.

Imodoka rutunganya ziboneka mu byiciro bitandukanye haba harimo izigenewe ubucuruzi gusa, izitwara abagenzi, izikoreshwa nk’imashini ndetse n’izindi zinyuranye.

Mugabo yavuze ko u Rwanda ruhanzwe amaso kubera ko ikirere cy’ishoramari gihagaze neza cyane nka kimwe mu bihugu by’Afurika u Bushinwa bukomeje kwaguriramo ibikorwa, kuri ubu rukaba ruri ku mwanya wa kabiri mu korohereza ishoramari nyuma y’Ibirwa bya Mauritius.

Yagize ati: “Buri kintu hano kiri ku murongo, kandi nta na ruswa iharangwa. Duhanze amaso Afurika y’Iburasirazuba, aho u Rwanda ruzaba santeri y’icyitegererezo mu gutunganya imodoka z’uruganda, maze tukabona tukagukira mu bihugu by’abaturanyi nka Repubulika Iharanira Demokarasi ya Congo n’u Burundi.”

Yakomeje agira ati: “Turashaka guha abakiliya bacu imodoka nziza, zujuje ubuziranenge kandi ziri ku biciro byiza.”

Kuba inganda zikomeye nka Dongfeng zikomeje kwiyunga kuri Volkswagen mu kongera imodoka ziteranyirizwa mu Rwanda, bibonwa nk’amahirwe akomeye yo kwagura ishoramari ry’amahanga riza mu gihugu ndetse no kurushaho kumenyekanisha u Rwanda mu ruhando mpuzamahanga.

Dongfeng irateganya kuza mu Rwanda mu gihe umubano w’u Rwanda n’u Bushinwa ukomeje kwaguka mu buryo budasanzwe kuva washingwa mu kwezi k’Ugushyingo 1971.

Uwo mubano ugaragarira mu bikorwa bitandukanye mu nzego z’ubuvuzi, uburezi, ubuhinzi, ikoranabuhanga no kubaka ibikorwa remezo.

Mu zindi nzego u Bushinwa bushoramo imari mu Rwanda harimo ubucuruzi, inganda, urwego rw’ubukerarugendo ndetse no kubaka imiturirwa.

NTAWITONDA JEAN CLAUDE

  • NTAWITONDA JEAN CLAUDE
  • Ugushyingo 20, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE