Ikibaya cya Congo u Rwanda rubarizwamo ni ibihaha by’Isi – Dr. Ngirente

  • Imvaho Nshya
  • Nyakanga 19, 2023
  • Hashize amezi 10
Image

Minisitiri w’Intebe Dr. Edouard Ngirente yitabiriye inama y’Abakuru b’Ibihugu na za Guverinoma bihuriye muri Komisiyo ishinzwe guhangana n’imihindagurikire y’ibihe mu bihugu bituriye ikibaya cya Congo, asaba buri gihugu kubigiramo uruhare.

Yabigarutseho mu nama yateranye kuri uyu wa 18 Nyakanga 2023 yakozwe mu buryo bw’ikoranabuhanga, iyoborwa na Perezida wa Repubulika ya Congo, Denis Sassou Nguesso.

Minisitiri w’Intebe Dr. Edouard Ngirente yasobanuye uburyo ikibaya cya Congo ari ingirakamaro mu kubungabunga urusobe rw’ibinyabuzima no mu guhangana n’imihindagurikire y’ibihe, asaba buri gihugu kugira uruhare mu kubungabunga urusobe rw’ibinyabuzima ruhari.

Yongeyeho ko ari igice gifatwa  nk’ibihaha by’Isi, kuko hari amashyamba menshi agira uruhare mu kugabanya imyuka yangiza ikirere ndetse hakaba hari amazi menshi.

Ati: “Ikibaya cya Congo n’u Rwanda rubarizwamo gifatwa nk’ibihaha by’Isi. Gikungahaye ku rusobe rw’ibinyabuzima kandi hakaba na hamwe mu hantu harangwa amasoko y’amazi ku Isi.

Imihindagurikire y’ikirere ni ikibazo cyugarije Isi, gisaba ubufatanye bw’Isi yose kugira ngo gikemuke mu buryo burambye”.

Yongeyeho ati “Ni inshingano yacu twese gukomeza gufatanya mu kurinda ibyo binyabuzima duhuriyeho mu rwego rwo guharanira kwihaza mu biribwa, kugira ubuzima buzira umuze no guteza imbere amahirwe y’terambere ry’ubukungu”.

Minisitiri w’Intebe Dr. Ngirente Edouard

Yanagaragaje aho u Rwanda rugeze mu ishyirwa mu bikorwa ry’amasezerano mpuzamahanga ku mihindagurikire y’ibihe.

Ati: “U Rwanda rwiyemeje kugabanya ku gipimo cya 38% imyuka ihumanya ikirere bitarenze mu mwaka wa 2030. […..] kandi  nyuma yo kugera ku ntego rwihaye yo gutera amashyamba kuri 30% by’ubuso, n’ubundi ruzakomeza no gutera andi”.

Perezida wa Repubulika ya Congo, Denis Sassou Nguesso  ari na we uyoboye Komisiyo ishinzwe guhangana n’imihindagurikire y’ibihe mu bihugu by’Ikibaya cya Congo, we yashimangiye  ko icyo kibaya ari nk’ibihaha by’Isi mu gutanga umwuka mwiza ndetse no kuba indiri y’urusobe rw’ibinyabuzima.

Yagize ati: “Ikibaya cya Congo aho n’u Rwanda rubarizwa, gifatwa nk’ibihaha by’Isi. Gikize ku rusobe rw’ibinyabuzima ndetse ni n’i kinkomoko y’amazi. Ikibaya cya Congo hamwe n’ibindi bibaya bibiri by’ingenzi, icya Amazone giherereye muri Amerika y’Amajyepfo n’icya Borneo-Mekong kiri muri Aziya y’Amajyepfo ashyira uburasirazuba bigize igice kinini cy’Isi gifata imyuka ya karubone kubera amashyamba magari ahari. Bigize kandi 80% by’amashyamba atuma ku Isi hagwa imvura, bikanacumbikira 2/3 by’urusobe rw’ibinyabuzima biyiriho”.

Minisitiri w’Intebe Dr Edouard Ngirente kandi yagaragaje ko u Rwanda rushyigikiye ubufatanye hagati y’ibihugu bituriye ibibaya bitatu bikomeye ku Isi, hagamijwe iterambere no guhangana n’imihindagurikire y’ibihe.

Minisitiri w’Intebe Dr Ngirente yavuze ko ari ngombwa gukomeza kubungabunga uru rusobe rw’ibinyabuzima kugira ngo bizafashe kugera ku ntego z’iterambere rirambye no kuri gahunda Afurika yihaye yiswe Agenda 2063.

Iyi nama yari igamije gutegura iy’Abakuru b’Ibihugu bihuriye ku bibaya bya Congo, Amazone na Borneo – Mekong iteganyijwe kubera i Brazaville kuva tariki 26- 28 Ukwakira 2023.

Yanditswe na NYIRANEZA Judith

  • Imvaho Nshya
  • Nyakanga 19, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE