Iburasirazuba: Abagize Komite za RPF Inkotanyi biyemeje guteza imbere abaturage

  • NSHIMIYIMANA FAUSTIN
  • Ukuboza 23, 2023
  • Hashize amezi 5
Image

Abanyamuryango ba FPR Inkotanyi bagize Komite zo ku rwego rw’Uturere n’Intara y’Iburasirazuba baherutse gutorwa buzuza inzego z’Umuryango biyemeje kwegera abaturage no kumva ibibazo bafite bigakemurirwa ku gihe hagamijwe guteza imbere imibereho y’abaturage.

Ibi ni ibyagarutsweho kuri uyu wa Gatandatu tariki ya 23 Ukuboza 2023, ubwo mu Karere ka Kayonza habaga amahugurwa y’umunsi umwe yahurije hamwe komite zo ku rwego rw’Uturere tugize Intara y’Iburasirazuba na Komite z’Umuryango ku rwego rw’Intara.

Munyanziza Pheneas, uhagarariye urubyiruko muri Komite Nyobozi mu Ntara y’Iburasirazuba yavuze ko ibyo bigiye mu mahugurwa bibongereye ubumenyi ndetse bizamufasha mu guhugura abandi banyamuryango.

Yagize ati: “Amahugurwa ni ingenzi kuko kwiga ni uguhozaho kandi aba yatwongereye ubumenyi ku kumenya imyitwarire n’inshingano zikwiye kuranga umunyamuryango bityo bizamfasha gukora ibikorwa by’ingenzi bigamije guteza imbere abo tuyobora. Icyo tugiye gukora rero ni ukwigira ku bunararibonye bw’abanyamuryango bakuru, tukigira ku mateka y’igihugu natwe bikadutera ishyaka ryo gukora cyane ndetse tukongera n’ubukangurambaga bugamije kuzamura imyumvire y’abaturage kugira ngo intara yacu itere imbere.”

Umutesi Claudette, umunyamuryango muri Komite Ngenzuzi y’Akarere ka Bugesera nawe yagize ati: “Amahugurwa yari akenewe cyane kuko ni ubwa mbere nyitabiriye ndi muri komite, akaba rero yamfashije kwinjira mu nshingano neza nkaba nibukijwe indangagaciro, kuba umunyamuryango urangwa n’ishyaka n’ubutwari byo gukorera umuryango n’igihugu bityo nkazasangiza ubumenyi nahawe abanyamuryango n’abaturage”.

Komiseri ushinzwe iterambere ry’urubyiruko mu Muryango FPR Inkotanyi, Mugesera Sam, yavuze ko aya mahugurwa yateguwe hagamijwe gukomeza guha ubumenyi abanyamuryango ba FPR Inkotanyi baherutse gutorwa ubwo buzuzaga inzego z’Umuryango ku rwego rw’Intara y’Iburasirazuba kugira ngo bakomeze intego n’ingamba zo guteza imbere abaturage.

Mugesera Sam yagize ati: “Amahugurwa mu Muryango wa RPF Inkotanyi ni gahunda isanzwe ikorwa kugira ngo abanyamuryango bahugurwe bibutswe inshingano, dore ko hari n’abazigiyemo ari bashya na bo rero ni ngombwa ko bajya mu mujyo umwe n’abandi. Ni ngombwa kubibutsa indangagaciro ziranga umunyamuryango cyangwa zishobora kuranga umunyarwanda uwo ari we wese ndetse no gufatanya n’abandi gushyira umuturage ku isonga.”

Yakomeje agira ati: “Abanyamuryango barafatanya kugera ku muturage uri hasi kuva ku rwego rw’Umudugudu n’ahandi kugira ngo bose bafatanyirize hamwe mu musingi w’iterambere twese turangajwe imbere, nta kindi rero ni ukugira ngo tuvuduke mu iterambere twongere ikibatsi mu bikorwa by’iterambere kandi bigamije kugeza u Rwanda aho twifuza nk’Abanyarwanda”.

Abagiye mu nshingano yabasabye kwegera abaturage by’umwihariko abanyamuryango kugira ngo barangwe n’indangagaciro nziza ziranga umunyarwanda, bakemura ibibazo bafite bitandukanye bigaragara mu miryango no muri sosiyete bakamanuka bakabana na bo bakabereka ko inshingano zabo z’ibanze ari bo ba mbere bo kugira ngo bashyirwe ku isonga.

Umukuru w’Umuryango FPR Inkotanyi mu Ntara y’Iburasirazuba John Kalenzi, yasabye abanyamuryango ba FPR gufata iya mbere mu gushyira mu bikorwa gahunda z’iterambere ziteganyijwe mu Turere kugira ngo Intara irusheho gutera imbere no guteza imbere abaturage.

 Yanagarutse kuri gahunda yo gutegura amahugurwa ku bagize komite ku rwego rw’Umurenge bitarenze tariki ya 07 Mutarama 2023, mu Tugari no mu Midugudu naho akaba azakomeza bitarenze tariki ya 20 Mutarama 2023 akaba azagirwamo uruhare n’abagize Komisiyo Ngengamyitwarire na Komite Ngenzuzi  n’abandi babifite mu nshingano.

Abari mu mahugurwa y’umunsi umwe bize amasomo ku ngingo zijyanye n’imyitwarire n’imikorere ihindura imibereho y’abanyamuryango n’abaturage, ingamba zo kwihutisha iterambere ry’abaturage bo mu Burasirazuba n’igihugu muri rusange, amateka y’u Rwanda, imyemerere n’imyumvire ikwiye kuranga abanyamuryango ba FPR Inkotanyi, Politiki n’iterambere, imibanire, gahunda y’amatora ateganyijwe mu mwaka wa 2024 n’ibindi.

  • NSHIMIYIMANA FAUSTIN
  • Ukuboza 23, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE