Ibigo byo mu Rwanda byoroherejwe gutunga imodoka zikoresha amashanyarazi

  • NTAWITONDA JEAN CLAUDE
  • Gashyantare 21, 2024
  • Hashize amezi 2
Image

Binyuze mu ikodeshagurisha (leasing), ubu ibigo bitandukanye bikorera mu Rwanda bishobora gutunga imodoka zikoresha amashanyarazi zigezweho  zirimo izo mu bwoko bwa SUV, MIN-Jeep ntoya n’iziringaniye, imodoka ndende na za van.

Ayo mahirwe yo gutunga imodoka zigezweho zikoresha amashanyarazi yiyongereye ku bigo bikorera mu Rwanda nyuma y’amasezerano Ikigo PREV Rwanda Ltd gicuruza imodoka zikoresha amashanyarazi.

Ni amasezerano icyo kigo cyasinyanye na Banki y’u Rwanda y’Amajyambere (BRD) ku wa Kabiri tariki ya 20 Gashyantare, atumye kiba icya mbere gihawe amafaranga yo mu Kigega Ireme Invest cyashyiriweho gutera inkunga abikorera bahanga udushya mu kwimakaza iterambere ry’u Rwanda ritangiza ibidukikije.

Ireme Invest ni ikigega cyatangijwe na Perezida wa Repubulika y’u Rwanda Paul Kagame, mu kwezi k’Ugushyingo 2022, gicungwa n’Ikigega cy’Igihugu cy’Ibidukikije (FONERWA) ku bufatanye na Banki y’u Rwanda y’Amajyambere (BRD).

Ku ikubitiro iki kigega cyatangiranye miliyoni 104 z’amadolari y’Amerika, ni ukuvuga amafarangay’u Rwanda asaga miliyari 109.

Inguzayo ya mbere y’icyo kigega yahawe PREV Rwanda Ltd, igiye gufasha mu kongera imbaraga zishyirwa mu kwimukira ku gukoresha imodoka zikoresha amashanyarazi kuko zidasohora ibyuka byanduza ikirere.

PREV Rwanda Ltd, nk’ikigo cyashinzwe mu mwaka wa 2022 gikorera mu Giporoso, Akarere ka Kicukiro, ibonye amahirwe mashya ko kwagura serivisi zayo zo kugeza ku Banyarwanda imodoka zigezweho zikoresha amashanyarazi.

Gahunda y’ikodeshagurisha ku bigo izajya ikorwa ku buryo bizajya bihabwa imodoka byishyura mu gihe runaka, ariko bitabujije y’uko n’abafite ubushobozi bwo kwishyura igiciro cyose bahawe ikaze.

Gahunda y’ikodeshagurisha ishobora gufasha ibigo byinshi kwimukira ku modoka zikoresha amashanyarazi ugereranyije n’uko bishobora kuzigura ku giciro cyose ubusanzwe kiba kiri hejuru cyane y’icy’imodoka zisanzwe.

Ubuyobozi bwa BRD bushimangira ko isinywa ry’ayo masezerano rishimanngira intambwe ikomeye mu gushyigikira urugendo rw’u Rwanda mu kugabanya ibyuka bihumanya ikirere rukagera ku kirere kizira ibyuka bihumanya bitarenze mu mwaka wa 2050.

Kampeta Pitchette Sayinzoga, Umuyobozi Mukuru wa BRD, yavuze ko iyo nguzanyo izagira uruhare mu kwihutisha iterambere ry’uburyo bwo gutwara abantu bugezweho no no kongerera imbaraga icyerekezo cy’u Rwanda cyokubaka ubudahangarwa ku ngaruka z’imihindagurikire y’ibihe.

Yagize ati: “Tunejejwe no gufatanya na PREV mu kongera ibinyabiziga bikoresha amashanyarazi mu Rwanda. Ubu bufatanye bwerekana ubushake bwa BRD bwo gushyigikira imishinga ishyigikira urugendo rwo kwimukira ku bukungu butangiza ibidukikije.

Yakomeje ashimangira ko ubufatanye nk’ubu bufasha urwego rw’abikorera kurushaho guhanga imirimo myinsi itangiza ibidukikije, kugira uruhare mu rugendo rwo guhangana n’ingaruka z’imihindagurikire y’ibihe no kwimakaza ibikorwa biramba.

Yongeyeho ati: “Ndashishikariza n’ibindi bigo kubyaza umusaruro amahirwe ahebuje Ikigega Ireme Invest gitanga.”

Abitabiriye uyu muhango basobanuriwe imirongo migari ya Ireme Invest nka gahunda ya Guverinoma y’u Rwanda yiteguye gushyigikira imishinga yimakaza kubungabunga ibidukikije no kubaka ubudahangarwa ku mihindagurikire y’ibihe.

Iyo mishinga ikora ku nzego zose uhereye ku birebana n’uburyo bwo gutwara abantu bugezweho, gukoresha ingufu zitangiza ibidukikije, kubaka imigi irambye, gukora ubuhinzi bwihanganira imihindagurikire y’ibihe, uburyo bwo kubungabunga imyanda no kubaka ubukungu bwisubira.

Fred Rutayisire, Umuyobozi Mukuru wa PREV Rwanda Ltd, na we yaboneyeho gushimangira ko inguzanyo bemerewe ari intambwe ikomeye ku kigo ayoboye no ku ruhererekane rwa taransiporo mu Rwanda.

Yagize ati: “Binyuze mu Kigega Ireme Invest, tugiye gutera intambwe nini iganisha ku kugera ku cyerekezo cy’u Rwanda cyo kuba igihugu kitohereza ibyuka bihumanya mu kirere, kandi iyi ni intangiriro ibyiza biri imbere.”

Yaboneyeho gushishikariza n’ibindi bigo kwiyizera bigatangiza ubufatanye n’icyo kigega cyitezweho gufasha u Rwanda kongera ibikorwa bifasha kubaka ubukungu butangiza ibidukikije kandi biramba.

  • NTAWITONDA JEAN CLAUDE
  • Gashyantare 21, 2024
  • Hashize amezi 2
TANGA IGITEKEREZO
Mporananayo Jean Marie vianney says:
Gashyantare 22, 2024 at 11:12 am

Nibyiza icyo gikorwa kudushishikariza gukoresha izo modoka , uwayishaka yabariza kuyihe contact ?

Andika igitekerezo

AMATEGEKO AGENGA IYANDIKA RY'IGITEKEREZO CYAWE