Hatabayeho ubufatanye ntacyo abantu bageraho- Dr Bizimana

  • Imvaho Nshya
  • Ugushyingo 16, 2023
  • Hashize amezi 4
Image

Minisitiri w’Ubumwe bw’Abanyarwanda n’Inshingano Mboneragihugu Dr Bizimana Jean Damascene, yatangije ku mugaragaro Itorero Indashyikirwa 2023 ryitabiriwe n’Intore mu Ikoranabuhanga ribera mu kigo cy’Ubutore cya Nkumba, abakangurira kugira ubufatanye kuko butabayeho ntacyo abantu bageraho.

Yagize ati: “Mbakangurire gukurikira iri torero, kurikurikira uko bikwiye ngo inyigisho abatoza mufite bazabaha zizabafashe mu mibereho mwebwe ubwanyu no mu kazi mushinzwe, kugira ngo muzatange umusaruro urenze uwo Musanzwe mutanga ndetse mufashe kuko mushinzwe no gufasha.

Imwe mu ndangagaciro buriya ni ugufatanya, kuko hatabayeho ubufatanye ntacyo abantu bageraho, iyo umuntu abaye nyamwigendaho ntacyo ageraho kinini. Kugira ngo muzagirane ubufatanye na bagenzi banyu mu kazi, mu rwego mukorera ariko no mu zindi nzego mushinzwe gufasha”.

Minisitiri Dr. Bizimana ubwo yatangizaga iryo Torero ku wa Gatatu tariki ya 15 Ugushyingo, yashimiye abaryitabiriye abasaba kuzabyaza umusaruro ibyo bazahigira.

Ati: “Ndabashimira cyane kuba mwashoboye kwitabira iri Torero, muzabona ko iri torero rizabagirira akamaro mwebwe ubwanyu, buri wese ku giti cye kuko hari ibyo bazabigisha n’ibyo bazabasobanurira musanzwe mutazi, hari n’ibyo bazababwira muzi ariko bizabakangura, bikababera umusemburo mwiza, bikaba nk’imfashanyigisho izabafasha mu kazi, kuko burya mu kazi umuntu afashwa n’ibyo yize.

Ikindi uhera ku byo mwarimu aguha ariko ukanafashwa n’ibyo bagenzi bawe bagutanze mu kazi bakurusha, bakakugira n’inama cyane cyane unafashwa na we ubwawe n’ubumenyi ufite n’ubushake ufite bwo kwiga no gukora, ukanafashwa n’indangagaciro zikuranga zituma ukunda umurimo”.

Dr Bizimana yabahaye n’ikiganiro ku isenyuka ry’Ubunyarwanda n’ishingiro ry’amahitamo ya Ndi Umunyarwanda.

Yagaragaje ko mbere y’ubukoloni Abanyarwanda basangiraga akabisi n’agahiye, ubumwe bwabo buza gusenywa n’abakoloni n’abamisiyoneri babinyujije mu iyobokamana n’amashuri bazanye byubakiye ku macakubiri, byagejeje Igihugu kuri Jenoside yakorewe Abatutsi mu 1994.

Yasabye abitabiriye iri Torero kumenya amateka y’u Rwanda kugira ngo bibafashe bo ubwabo kuko utazi aho ava atamenya aho ajya, ariko kandi bazanayabwire abazabakomokaho hagamijwe kubaka u Rwanda rwunze ubumwe kandi ruzira ingengabitekerezo ya Jenoside.

Yashimangiye ko ubu hari amahirwe yo kugira Igihugu kiyobowe neza cyagaruye Ubunyarwanda, asaba urubyiruko gufasha Ubuyobozi Bukuru bw’Igihugu bashyigikira gahunda zigamije kurushaho guteza imbere Ubunyarwanda.

Yabasabye gukoresha ikoranabuhanga by’umwihariko imbuga nkoranyambaga bagaragaza isura nziza y’u Rwanda n’iterambere rumaze kugeraho mu nzego zitandukanye harimo ubuzima, ubukungu, imibereho myiza n’ibindi, no kuvuguruza ibinyoma bikwizwa ku Rwanda.

NYIRANEZA JUDITH

  • Imvaho Nshya
  • Ugushyingo 16, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE