Hamuritswe amafunguro atandukanye ategurirwa i Kigali

  • MUTETERAZINA SHIFAH
  • Werurwe 19, 2024
  • Hashize ukwezi 1
Image

Abatetsi bakorera mu mahoteli atandukanye yo mu Mujyi wa Kigali, barishimira ko bungutse ubumenyi mu gutegura amafunguro atandukanye aboneka i Kigali.

Babitangaje ejo ku wa Mbere tariki 18 Werurwe 2024, ubwo hamurikwaga amafunguro yo mu bihugu bitandukanye aboneka muri uyu Mujyi, binyuze mu kumva icyanga cyangwa umwihariko w’uko ategurwa.

Ni igikorwa cyabaye mu rwego rwo gutegura Iserukiramuco ryiswe Taste Flavour of Kigali, giteganyijwe guhera tariki 23 kugeza 24 Werurwe uyu mwaka.

Ni Iserukiramuco ryateguwe n’Ihuriro ry’abatetsi babigize umwuga mu Rwanda, RCA, ku bufatanye n’Ikigo cyo muri Ethiopia SACEL Ltd, hagamijwe kwereka abasura u Rwanda ko bashobora kuhabona amafunguro yo mu bihugu bitandukanye, by’umwihariko, hamenyekanishwa indyo gakondo z’ibihugu bitandukanye zitegurirwa mu Mujyi wa Kigali.

Bamwe mu bitabiriye iri serukiramuco bavuga ko babyishimiye kuko bituma barushaho kumenyana ndetse no kunguka ubumenyi.

Umwe mu bitabiriye iri iserukiramuco utegura amafunguro yo muri Somalia, avuga ko iri serukiramuco ari amahirwe akomeye kuri bo.

Ati: “Umujyi wa Kigali ubamo abantu benshi b’imico n’imyemerere bitandukanye, ni amahirwe kuri twe kugaragaza amafunguro ya Somalia, dutewe ishema nabyo.”

Akomeza agira ati: “Twahigiye byinshi, iwacu muri Somaliya ntabwo tuzi guteka indyo zokeje, rero aha twahabyigiye.”

Murwanashyaka Samuel ni umwe mu batetsi bitabiriye, avuga ko bazunguka amafunguro atandukanye batagiraga muri Hoteli yabo.

Ati: “Mu mahoteli habamo amafunguro menshi, tuzabigiraho na bo bazatwigiraho mbega tuzategura ibintu bishya tutari dufite muri hoteli yacu.”

Umuyobozi w’Ihuriro ry’abatetsi babigize umwuga RCA, Rutayisire Innocent, avuga ko Igihugu kizungukira muri iri serukiramuco.

Ati: “Mu bukerarugendo u Rwanda ruri gutera imbere rwakira abashyitsi benshi, iyo baje bakabona ayo mafunguro atandukanye, bagira amahitamo ntabwo umuntu arya indyo imwe, rero bizatuma abantu benshi bagira icyizere cyo kuza mu gihugu”.

Igikorwa cyo kumurika amafunguro atandukanye atekwa muri Kigali cyari cyitabiriwe n’amahoteli agera muri 30, mu gihe amaze kwiyandikisha kuzitabira iserukiramuco arenga 100.

Biteganyijwe ko Iserukiramuco rya Taste Flavour of Kigali rizaba tariki 23 na 24 Werurwe 2024,
rikazabera muri Camp Kigali, tariki 23 na 24 Werurwe 2024.

Amafoto: Uwamaliya Cécile

  • MUTETERAZINA SHIFAH
  • Werurwe 19, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE