Gicumbi: Bavanywe mu manegeka batuzwa mu Mudugudu watwaye miliyari 3 Frw

  • KAMALIZA AGNES
  • Ugushyingo 20, 2023
  • Hashize amezi 6
Image

Abavanywe mu manegeka bagatuzwa mu Mudugudu wa Kaniga uherereye mu Murenge wa Kaniga Akarere ka Gicumbi baravuga imyato ubuyobozi bw’u Rwanda bwabakuye ahashyiraga ubuzima bwabo mu kaga bukabatuza ahatekanye baciye ukubiri n’ibiza byari bibugarije.

Bamwe muri bo bavuga ko mbere yo kuzanwa mu Mudugudu wa Kaniga bari barabuze uko bigira, kuko batagiraga aho barambika umusaya  bitewe n’uko basenyewe n’ibiza.

Uyu  Mudugudu wuzuye utwaye miliyari zisaga 3 z’amafaranga y’u Rwanda ukaba utujwemo imiryango 60 yavanywe mu manegeka ndetse n’indi itishoboye.  

Kuri ubu barashima ko bashyizwe mu Mudugudu w’Icyitegererezo wa Kaniga, bakaba nta ngingimira bagifite yo kutabona aho barara ndetse bishimira batandukanye burundu n’ibibazo bashobora guterwa  n’imvura kuko uwo Mudugudu batujwemo wubatswe mu buryo bushobora guhangana n’imihindagurikire y’ibihe.

Uyu Mudugudu watashywe ku mugaragaro kuri uyu wa 20 Ugushyingo, watewe inkunga n’Ikigo gitera inkunga imishinga yo kurengera ibidukikije mu Rwanda (FONERWA), ukaba uherereye Mudugudu wa Runyinya, Akagari ka Murindi.

Ni umuhango witabiriwe na Minisitiri w’ibidukikije Dr Mujawamariya Jeanne d’Arc, Guverineri w’Intara y’Amajyaruguru Maurice Mugabowagahunde, n’abandi bafatanyabikorwa.

Bamwe mu batujwe heza bavuga ko mbere yo kubona izo nzu bari babayeho nabi, bahora bacumbika kubera gusenyerwa n’imvura ariko ubu bakaba bafite icyizere ko nta rwikekwe bazongera kugira mu bihe by’imvura.

Bagaragaza Alfonse ati: “Natujwe hano mvuye mu Mudugudu wa Rukizi aho inzu yari yaransenyukiyeho mbayeho nabi. Imvura yaragwaga abana bakambwira bati noneho turi bupfe, maze njya gucumbika gusa aho nagiye bwa mbere naho umuyaga wansanzeyo uransenyera, mbona undi mugiraneza ampa aho kuba naho amazi ansangayo. Nuko abayobozi bakora uko bashoboye ni ko kunzana mu Mudugudu.”

Kabongoya Olive na we ati: “Nari ndi mu manegeka ateye ubwoba mbanamo n’abana batanu. Gusa  numvaga ko kuzabona aho kuba ari inzozi ariko ubu ndi mu nzu nta musanzu nayitanzeho ndanezerewe cyane.”

Aba batujwe muri uyu Mudugudu baravuga ko kuva bawutuzwamo ubu basigaye bafite amahoro kandi ko ubuzima bwabo bwahindutse.

Minisitiri w’Ibidukikije Dr Mujawamariya Jeanne d’Arc yavuze ko uyu Mudugudu wubatswe hakoreshwa ibikoresho bidafite aho bihuriye no kwangiza ibidukikije, aboneraho no gusaba abatujwemo kuwufata neza no gukora ibikorwa bibateza imbere bakivana mu bukene.

Ati: “Uyu Mudugudu wubatswe hakoreshejwe ibikoresho bitangiza ibidukikije kuko nk’amatafari yahubatse yakoreshejwe n’izindi ngufu zidafite aho zihuriye no gutema amashyamba. Icyo tubifuzaho ni uguharanira kwiteza imbere mugatunga imiryango yanyu mwirinda amakimbirane. Mubane neza mu mahoro kandi turifuza ko mwafata neza izi nzu, mugaharanira kwishakamo ibisubizo n’ubushobozi bwo gusigasira ibyiza nkibi muba mugejejweho na Leta y’u Rwanda.” 

Abatujwe muri uyu Mudugudu banahawe ibikoresho by’ibanze birimo ibiryamirwa n’ibindi by’ibanze bakenera mu buzima bwa buri munsi.

Minisitiri Dr. Mujawamariya yanaboneyeho gushimira ko Ikigo CGF cyateye u Rwanda inkunga yatumye bigerwaho binyuze mu mushinga Green Gicumbi, wahinduye byinshi mu Karere ka Gicumbi kaza ku mwanya wa gatatu mu dukunze kwibasirwa n’ibiza mu Ntara y’Amajyaruguru.

KAMALIZA AGNES

  • KAMALIZA AGNES
  • Ugushyingo 20, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE