Umunyarwanda Davite Giancarlo ari kumwe na Matteo Davite, yegukanye irushanwa rya Huye Rally 2026′, bimuhesha no kwegukana Shampiyona y’u Rwanda yo gusiganwa mu modoka ya 2026. Huye Rally yakinwaga ku nshuro ya 40 itegurwa na Huye Motorsports Club ku bufatanye n’Ishyirahamwe Nyarwanda ry’Umukino wo Gusiganwa mu Modoka (Rwanda Automobile Club- RAC).
Iri siganwa ngarukamwaka ribera mu Ntara y’Amajyepfo, rigamije kwibuka no guha icyubahiro Gakwaya Claude wakinaga amasiganwa y’imodoka, witabye Imana mu 1986 azize impanuka.
Ku Cyumweru, tariki ya 18 Ukwakira 2026, ni bwo hakinwe umunsi waryo wa kabiri ari na wo wa nyuma, aho habaye uduce tune twakiniwe mu mihanda ya Save-Shyanda na Shyanda-Save, ku ntera y’ibilometero 40.
Davite Giancarlo na Matteo Davite, bari basoje uduce umunani twa mbere bari imbere ku wa Gatandatu tariki ya 17 Ukwakira 2026, bashimangiye umwanya wabo no ku Cyumweru aho basoje isiganwa ryose bakoresheje isaha imwe, iminota 30 n’amasegonda 41 ku ntera y’ibilometero 139 byari bigize irushanwa.
Ponsiano Lwakataka na Lawrence Mwambazi bakomoka muri Uganda, begukanye umwanya wa kabiri basizwe iminota 14 amasegonda 14 naho Gakwaya Claude na Kayibanda Aurore batwaye umwanya wa gatatu basizwe iminota 23 n’amasegonda 53.
Kwegukana Huye Rally ku nshuro ya kane byatumye Giancarlo Davite anegukana Shampiyona y’u Rwanda yo Gusiganwa mu Modoka ya 2026, nubwo ku ngengabihe hagisigaye ‘Rally des Mille Collines’ izabera i Rwamagana ku wa 28-29 Ugushyingo 2026.
Mu masiganwa atanu amaze gukinwa uyu mwaka, Giancarlo Davite yegukanye ane ari yo Nyirangarama Rally, GMT-Musha Rally, Women in Motosports Sprint Rally na Huye Rally mu gihe yabaye uwa kabiri muri Rwanda Mountain Gorilla Rally.
Huye Rally ya 2026 yari yiyandikishijemo imodoka 16, muri zo 12 ni iz’abakinnyi b’Abanyarwanda, enye zari iz’Abanya-Uganda.
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE