Gen. (Rtd) Kabarebe yasabye Afurika guhuza umutungo ifite igahangana n’umutekano muke

  • ZIGAMA THEONESTE
  • Ugushyingo 29, 2023
  • Hashize amezi 6
Image

Umunyamabanga wa Leta ushinzwe Ubutwererane bw’Akarere muri Minisiteri y’Ububanyi n’Amahanga n’Ubutwererane, Gen. (Rtd) James Kabarebe, yagaragaje ko ibihugu by’Afurika bikwiye guhuriza hamwe  imbaraga zishingiye ku mutungo kamere mu guhangana n’umutekano muke wugarije uwo mugabane.

Gen. (Rtd) Kabarebe yabitangarije i Dakar muri Senegal ku wa Mbere tariki ya 27 Ugushyingo 2023, mu Nama mpuzamahanga yitabiriye yiga ku kubangabunga amahoro n’umutekano.

Inama ihurije hamwe bamwe mu Bakuru b’Ibihugu na za Guverinoma, abahagarariye Imiryango Nterankunga n’Impirimbanyi mu kubungabunga amahoro.

Muri uyu mwaka, iyo nama yitabiriwe n’abasaga 400 barimo abahagarariye imiryango itari iya Leta, abayobozi mu nzego nkuru za gisirikare, inzobere mu by’umutekano n’abashakashatsi, baganira ku cyatuma amahoro n’umutekano bigaruka muri Afurika.

Baribanda ku nsanganyamatsiko igira iti: “Ubushobozi bw’Afurika no kwishakira ibisubizo ku bibazo by’umutekano n’imiyoborere”

Mu ijambo yagejeje ku bitabiriye iyo nama, Gen (Rtd) James Kabarebe, yagaragaje  ko Afurika yugarijwe n’ibibazo by’umutekano bishingiye ku mitwe y’iterabwoba iri kuri uyu mugabane no ku Isi muri rusange, hakiyongeraho no guhanganira ubutegetsi.

Yagize ati: “Ibyo birasaba gushyiramo imbagara zidasanzwe dufatanyije mu guhangana n’ibyo bibazo”.

Kabarebe yatanze urugero rw’ukuntu u Rwanda rwahanganye n’ibibazo rwanga guheranwa n’imvururu n’amakimbirane nyuma ya Jenoside yakorewe Abatutsi, ashimangira ko Afurika yahakura isomo igahangana n’imvururu ziri kuri uyu mugabane kandi agahamya ko ibi bibazo bizarangira.

Ati: “Kuva icyo gihe, u Rwanda rwagize uruhare runini mu bikorwa by’amahoro mu Karere mu kumenya isano iri hagati y’amahoro n’iterambere, ibihugu bisangiye. Uruhare rwacu mu gushyigikira ibihugu by’inshuti nka Repubulika ya Santarafurika, Mozambique, Sudani, na Sudani y’Epfo byerekana uruhare rw’uburyo bwo gufatanya mu guhangana n’ibibazo by’umutekano birenze igihugu ahubwo mukawutanga no mu bindi bihugu”.

Gen. (Rtd) Kabarebe yagaragaje ko urugero nk’urwo rugaragaza ko guharanira amahoro arambye bisaba ubufatanye bwuzuye ntawe usigaye inyuma, haba Guverinoma ndetse n’abaturage, Imiryango Mpuzamahanga, impuguke mu bijyanye n’umutekano, n’abafatanyabikorwa Mpuzamahanga.

Yongeyeho ati: “Ndabasaba  gushimangira ubwitange bwacu tukagira imyumvire imwe. Reka dukoreshe imbaraga zikomeye z’umugabane wacu kandi duhuze umutungo kamere wacu kugira ngo dukemure byimazeyo umutekano muke utwugarije ”.

Gen. (Rtd) Kabarebe kandi yanavuze ko u Rwanda rwiyemeje gutanga umusanzu warwo muri gahunda zimakaza amahoro ku mugabane w’Afurika.

Hagati aho, muri iyi nama Minisitiri Gen (Rtd) Kabarebe yabonanye na Prof. Ismaïla Madior Fall, Minisitiri w’Ububanyi n’Amahanga wa Senegal.

Minisiteri y’Ububanyi n’Amahanga mu Rwanda (MINAFETT) yatangaje ko abo bayobozi bombi baganiriye ku gushimangira umubano mwiza w’ibihugu byombi hagati y’u Rwanda na Senegali.

  • ZIGAMA THEONESTE
  • Ugushyingo 29, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE