Gatsibo: Ikiraro cyo mu kirere cy’asaga miliyoni 40 Frw cyazahuye ubuhahirane

  • NSHIMIYIMANA FAUSTIN
  • Gashyantare 10, 2024
  • Hashize ibyumweru 3
Image

Bamwe mu baturage batuye mu Karere ka Gatsibo, mu Tugari twa Mayange na Kibare mu Murenge wa Nyagihanga bavuga ko Ikiraro cyo mu kirere cyubatswe bakizeho kuzahura ubuhahirane.

Kitarubakwa ubuhahirane n’ibindi bice bwari bwarahagaze bakagorwa no kugeza umusaruro ku isoko bitewe n’ikiraro cyari kimaze igihe kinini cyarangiritse, byabangamiraga abajya kwivuriza ku Kigo Nderabuzima cya Nyagihanga n n’abana bajya kwiga, ariko ubu barishimira ko ibi bibazo byose bigiye gukemuka.

Ni ikiraro cyo mu kirere cyuzuye gitwaye arenga miliyoni 40 z’amafaranga y’u Rwanda ku bufatanye bw’Akarere ka Gatsibo na Bridges to Prosperity.

Rwabutogogo Aime yagize ati: “Ubuhahirane ntibwakorwaga uko bikwiye kuko twatinyaga imiterere yo mu kibaya yadusabaga kunyura mu bitare. Kubona uko tujyana umusaruro w’ubuhinzi ku isoko byari bigoye kuko inaha tweza ikawa, urutoki, ibigori n’ibishyimbo n’ibindi kandi n’ibyo dukuramo amafaranga ariko urumva ko iyangirika ry’iyi nzira ryadukeneshaga. Ubu tugiye kujya tugeza umusaruro w’ubuhinzi ku isoko mu buryo bworoshye kandi bwihuse.”

Mukamurara Phoibe yagize ati: “Abana bajyaga kwiga bagorwaga no kubona uko bagera ku mashuri kuko inzira ziragoye. Muri ibi bihe by’imvura amazi aba menshi mu gishanga bakabura aho banyura ugasanga rimwe na rimwe barasibye. Ariko ubu kuba twubakiwe ikiraro bituruhuye imvune n’impungenge ababyeyi twahoranaga z’uburyo abana bacu bava cyangwa bajya ku ishuri.”

Ibi kandi bishimangirwa na Mukarwego Xaverine, yagize ati: “Twagorwaga no kujya kwivuriza ku Kigo Nderabuzima cya Nyagihanga kuko umurwayi byamusabaga kwishyura moto y’amafaranga 2 000 kandi uburwayi hari igihe budutungura tudafite amafaranga yo kuba watega moto, reba abagemurira umurwayi  kubategera uburyo bihenda. Ubu iki kiraro kituvunnye amaguru ndetse n’amafaranga twatangaga dutega moto.”

Ikiraro cyo mu kirere cyubatswe hagamijwe gushaka igisubizo kirambye cy’uburyo ubuhahirane n’imigenderanire ikorwa nta nkomyi no gukuraho inzitizi ku bahinzi bagorwa no kugeza umusaruro ku isoko n’abakenera serivisi z’ubuvuzi ndetse n’abana bajya ku ishuri.

Umuyobozi w’Akarere ka Gatsibo wungirije ushinzwe Iterambere ry’Ubukungu, Sekanyange Jean Leonard yasabye abaturage kubungabunga iki kiraro kuko byitezwe ko kizakoreshwa imyaka irenga 30 ndetse hari komite yashyizweho ihabwa n’ibikoresho izajya ifasha mu kukitaho no gucunga abashobora kuba bacyangiza.

Yagize ati: “Twishimiye ko cyubatswe mu gihe gito kingana n’ibyumweru bibiri. Ni umuhigo twari twarahize muri uyu mwaka kandi weshejwe kare. Abaturage turabasaba kugifata neza kuko ni ikiraro cyo mu kirere gisaba kukinyuraho witonze cyane cyane abana bato bajya ku ishuri, nukwitwararika kugira ngo hatazagira uwo kivutsa ubuzima kuko ntabwo ari ikiraro cyo gukiniraho ahubwo ni ukugikoresha wambuka yaba moto n’amagare.

Hari komite y’abantu 10 batuye hariya bahuguriwe ndetse bahabwa ibikoresho ku buryo bazajya bakitaho ndetse banacunga ko nta kibazo cyahura nacyo, hagira abacyangiza kuko n’ibyuma kandi bakwiye guhora bacunga bareba ko amaburo afunze neza mu rwego rwo kwirinda ko cyateza ibyago no gusaza kitarageza imyaka 30 cyagenewe.”

Ubuyobozi bw’Akarere ka Gatsibo butangaza ko mu mwaka w’ingengo y’imari 2023/2024 bufite intego yo kubaka ibiraro byo mu kirere umunani bizaba byuzuye muri Kamena 2024. Ibiraro bine bizubakwa ku bufatanye n’abaturage, ibindi bine byahawe ba rwiyemeza mirimo.

  • NSHIMIYIMANA FAUSTIN
  • Gashyantare 10, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE