FIBA AfroCan 2023:  Uko amakipe yagiye akurikirana

  • Imvaho Nshya
  • Nyakanga 18, 2023
  • Hashize amezi 10
Image

Umwanya wa 3

RDC 73-82 Rwanda 

Umukino wa nyuma

Maroc 78-76 Cote d’Ivoire 

Ku Cyumweru tariki 16 Nyakanga 2023 ni bwo hasojwe imikino y’Afurika muri Basketball  mu bagabo “FIBA AfroCan 2023” yaberaga i Luanda muri Angola kuva taliki 08 Nyakanga 2023.

Ikipe y’igihugu ya Maroc ni yo yegukanye igikombe  naho ikipe y’u Rwanda yegukana umwanya wa gatatu.

Iyi kipe y’u Rwanda yegukanye umwanya wa gatatu nyuma yo gutsinda ikipe ya RDC yari ifite iki gikombe  giheruka amanota 82 kuri 73.

 Muri uyu mukino, ikipe y’u Rwanda yatsinze uduce tubiri twa mbere tubanza amanota 19 kuri 17 na 19 kuri 16. Agace ka gatatu, ikipe ya RDC yatsinze u Rwanda amanota 29 kuri 19 naho agace ka kane, ikipe y’u Rwanda itsinda amanota 25 kuri 11.

Kapiteni w’ikipe y’u Rwanda, Ndayisaba Ndizeye Dieudonne yatangaje ko bishimye kuba begukanye umwanya wa gatatu ku nshuro ya mbere bitabiriye iri rushanwa cyane ko bari batangiye nabi batsindwa imikino ibiri ya mbere.

Yakomeje avuga ko ibi bibahaye imbaraga  ku buryo ubutaha bashobora no kugera ku mukino wa nyuma ndetse bakanegukana igikombe.

Umutoza w’ikipe y’u Rwanda, Murenzi Yves yatangaje ko kwegukana uyu mwanya  babyishimiye  kuko bagize ibyago baviramo muri 1/2 ariko intego bari bafite ari ukwegukana igikombe.

Yakomeje avuga ko  impamvu ikipe y’u Rwanda yitwaye neza ku mukino wa RDC  ari uko abakinnyi baberetse amashusho y’umukino wa 1/2 bareba amakosa bakoze  bagerageza kuyakosora ndetse banakora ubwugarizi bwiza birangira batsinze uyu mukino.

Maroc yegukanye igikombe

Ku mukino wa nyuma ikipe ya Maroc yitwaye neza itsinda Cote d’Ivoire  amanota 78 kuri 76. 

Iyi kipe ya Maroc yageze ku mukino wa nyuma  isezereye RDC muri 1/2  iyitsinze amanota 76 kuri 69 mu gihe, ikipe ya Cote d’Ivoire yasezereye ikipe y’u Rwanda iyitsinze amanota 74 kuri 71.

Uko amakipe yakurikiranye

Ikipe ya Maroc yegukanye umwanya wa mbere ihabwa umudali wa zahabu n’igikombe ikurikirwa na Cote d’Ivoire, Rwanda (3), RDC (4),Tunisia (5), Kenya (6), Angola (7), Nigeria (8), Gabon (9), Mozambique (10), Cameroun (11) na Mali (12).

Hatowe ikipe y’irushanwa

Abakinnyi 5 bagize ikipe y’irushanwa  ni Jihad Benchlikha, Kevin Bruno Franceschi  (Maroc), Evariste Shonganya (RDC), Ndizeye Ndayisaba Dieudonne (Rwanda) na Mike Fofana (Cote d’Ivoire).

Kevin Bruno Franceschi ukinira ikipe y’igihugu ya Maroc ni we wabaye umukinnyi witwaye neza mu irushanwa ryose “MVP”.

Biteganyijwe ko imikino ya “FIBA AfroCan” izongera kuba muri 2027 aho amakipe 4 yitwaye neza uyu mwaka afite itike y’imikino ya nyuma   akaba atazanyura mu mikino y’amajonjora. Aya makipe ni Maroc, Cote d’Ivoire, u Rwanda na RDC.

  • Imvaho Nshya
  • Nyakanga 18, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE