FERWAFA yahagaritse Heritier Luvumbu kubera imyitwarire mibi

  • SHEMA IVAN
  • Gashyantare 13, 2024
  • Hashize amezi 3
Image

Ishyirahamwe ry’Umupira w’Amaguru mu Rwanda (FERWAFA) ryahagaritse amezi atandatu Umunyekongo Heritier Nziga Luvumbu wakiniriga Rayon Sports mu bikorwa byose by’umupira w’amaguru kubera imyitwaririe idahwitse yagagaraje.

Mu mukino w’umunsi wa 20 wa shampiyona wabereye kuri Sitade ya Kigali, Hertier Luvumbu uherutse gutorwa nk’umukinnyi w’ukwezi wa Rayon Sports yaje gufungura amazamu ku munota wa 52 w’umukino, ni ko kwishimira igitego apfutse ku munwa intoki ebyiri z’ikindi kiganza zitunze kuri “Nyiramivumbi.”

Yabikoze ari imbere y’ibitangazamakuru byafataga amashusho y’umukino, bucya byakwirakwiye ku mbuga nkoranyambaga no mu bitangazamakuru bitandukanye, cyane ko ari cyo kimenyesho gikomeje kwifashishwa n’abanyepolitiki bo muri Repubulika Iharanira Demokarasi ya Congo (RDC).

Iki gikorwa cyo gupfuka ku munwa ni icya Politiki kimaze iminsi gikorwa n’Abanyekongo hirya no hino mu rwego rwo kuyobya uburari bw’ubwicanyi nyakuri buri gukorerwa abavuga Ikinyarwanda mu Burasirazuba bwa Congo nk’uko byemejwe n’Umuryango w’Abibumbye.

Mu itangazo FERWAFA yashyize hanze kuri uyu wa Kabiri tariki 13 Gashyanyatare, yavuze ko uyu mukinnnyi yahagaritswe kubera kuvanga Politiki n’umupira w’amaguru.

Rigira riti: “Nyuma y’umukino w’umunsi wa 20 wa shampiyona wahuzaga Rayon Sports na PoliceFC Luvumbu yerekanye ibimenyetso bijyanye na Politiki bihabanye n’amategeko shingiro n’amategeko ngengamyitwarire ya FERWAFA, CAF na FIFA, abuza gukoresha ibimenyetso cyangwa amagambo bya politiki mu mupira w’amaguru.”

Hagati aho ku wa Gatatu, Rayon Sports izakirwa na Vision ku Mumena muri ¼ cy’Igikombe cy’Amahoro nyuma yo gusezerera Interforce muri 1/8 iyitsinze ibitego 5-1 mu mikino yombi.

Biteganyijwe ko umukino uzatangira ku masaha ya saa cyenda kuri stade Mumena.

  • SHEMA IVAN
  • Gashyantare 13, 2024
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE