Eldin Shiboub Ali ari mu bahembwe bitwaye neza muri Gashyantare

  • SHEMA IVAN
  • Werurwe 21, 2024
  • Hashize ukwezi 1
Image

Eldin Shiboub Ali wa APR FC na Rutahizamu Ani Elija wa Bugesera FC bari mu bahawe ibihembo byo kwitwara neza muri Shampiyona y’u Rwanda, by’umwihariko mu kwezi kwa Gashyantare 2024.

Ni ibihembo byatanzwe mu ijoro ryo ku wa Gatatu tariki ya 20 Werurwe 2024, hahembwa umutoza, umukinnyi, umunyezamu bitwaye neza ndetse n’igitego kiruta ibindi.

Ibi bihembo byatanzwe n’ubuyobozi bwa Rwanda Premier League binyuze mu baterankunga bayo biyemeje kujya bahemba umukinnyi wahize abandi buri kwezi, umukinnyi watsinze igitego cyiza, umutoza mwiza, umunyezamu mwiza ndetse bakanatanga ibihembo by’umwaka hiyongereyeho ikipe nziza.

Ku nshuro ya gatatu hari hahembwe abakinnyi b’ukwezi nyuma y’ibihembo bya mbere byatanzwe muri Mutarama bahemba abitwaye neza mu Ukuboza 2023.

Umunyasudani Eldin Shiboub Ali wa APR FC mu mikino ine yatsinzemo ibitego bine we wabaye umukinnyi w’ukwezi, ahigitse Destin Malanga w’Amagaju, Shaban Hussein wa AS Kigali na Samuel Pimpong wa Mukura VS.

Igitego cyiza cy’ukwezi cyabaye icya Ani Elijah akaba yaragitsinze ubwo Bugesera FC yahuraga na Gasogi United mu mukino w’umunsi wa 20 wa shampiyona. Igitego cye cyahize icya Niyibizi Ramadan, Eldin Shiboub Ali na Destin Malanga.

Umutoza mwiza yabaye Thierry Forger wa APR FC watsinze imikino ine akanganya umukino umwe mu mikino itanu mu kwezi kwa Gashyantare yarushije abarimo Guy Bukasa wa AS Kigali Julien Mette wa Rayon sports na Habimana Sosthene wa Musanze FC.

Umunyezamu mwiza yabaye Nzeyirwanda Djihad ukinira Kiyovu Sports ahigitse Pavel Ndzila wa APR FC, Muhawenayo Gad wa Musanze FC na Habineza Fils Francois wa Etoile de l’Est. Ni inshuro ya Kabiri Nzeyirwanda Djihad yegukanye igihembo cy’Umuzamu w’ukwezi muri uyu mwaka w’imikino.

Abitwaye neza bashyikirijwe igikombe giherekejwe n’amafaranga y’u Rwanda ibihumbi 300  usibye Eldin Shiboub Ali wahawe miliyoni 1 y’amafaranga y’u Rwanda.

Shampiyona y’u Rwanda igeze ku munsi wa 21 aho urutonde rw’agateganyo kugeza ubu ruyobowe n’Ikipe y’Ingabo z’Igihugu APR FC ifite amanota 58 ikarusha Rayon sports ya kabiri amanota 13.

  • SHEMA IVAN
  • Werurwe 21, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE