El Clásico: FC Barcelona yanyagiye Real Madrid ikomeza kuyobora Shampiyona 

FC Barcelona yanyagiye Real Madrid ibitego 4-0 mu mukino w’Umunsi wa 11 wa Shampiyona, ihagarika urugendo rwayo rwo kumara imikino 42 imaze idatsindwa muri Shampiyona ya La Liga. 

Uyu mukino urebwa n’abantu benshi ku Isi wabaye mu ijoro ryo ku wa Gatandatu tariki 26 Ukwakira 2024, ubera kuri Estadio Santiago Bernabéu i Madrid, usifurwa na José María Sánchez Martínez. 

Amakipe yombi yagiye gukina akurikirana ku rutonde rwa Shampiyona aho Barcelona yari ku mwanya wa mbere n’amanota 27 mu gihe Real Madrid yari ku mwanya wa kabiri n’amanota 24.

Muri uyu mukino, Real Madrid yasabwaga gutsinda kugira ngo yandike amateka yo kumara imikino 43 idatsindwa, cyane ko yaherukaga gutsindwa muri Nzeri 2023.

Real Madrid yatangiye umukino neza ihusha ibitego harimo uburyo bw’igitego bwa Kylian Mbappé na Vinicius Junior.

Ku munota wa 30, Mbappé yatsinze igitego cya mbere ariko umusifuzi nyuma yo kwitabaza VAR aracyanga avuga ko yaraririye.

Real Madrid yari mu mukino yongeye kubona amahirwe y’igitego gikomeye, ku mupira Mbappé yahinduye imbere y’izamu, Jude Bellingham akawukina aryamye ariko umunyezamu Iñaki Peña akawukurimo ku murongo. 

Ku ruhande rwa FC Barcelona na yo  

abarimo Lamine Yamal na Robert Lewandowski bageragezaga uburyo bwinshi bw’ibitego ariko bananirwa kububyaza umusaruro. 

Igice cya mbere cyarangiye amakipe yombi anganya ubusa ku busa. 

Mu gice cya kabiri, FC Barcelona yagarukanye imbaraga nyinshi maze ku munota wa 54, Marco Casado acomekera Robert Lewandowski umupira mwiza asiga ba myugariro atsinda igitego cya mbere.

Nyuma y’iminota ibiri gusa, FC yatsinze igitego cya kabiri ku mupira mwiza wahinduwe na Alejandro Balde, usanga Lewandowski atsindisha umutwe.

FC Barcelona yarushaga cyane Real Madrid yongeye gutsinda igitego cya gatatu ku munota wa 75, ku mupira Raphinha yahaye Lamine Yamal atera ishoti rikomeye rigendera hejuru umupira ujya mu rushundura. 

Bidatinze, ku munota wa 84, FC Barcelona yatsinze igitego cya kane ku mupira mwiza Iñigo Martínez yahaye Raphinha asanga umunyezamu Lunin yasohotse nabi, aramuroba atsinda igitego.

Umukino warangiye FC Barcelona inyagiye Real Madrid ibitego 4-0 ihagarika urugendo rwayo rwo kumara imikino 42 imaze idatsindwa muri Shampiyona ya La Liga. 

FC Barcelona yakomeje kuyobora Shampiyona n’amanota 30 irusha Real Madrid ya kabiri amanota atandatu.