Dr Ngirente yasabye abacukuzi b’amabuye y’agaciro gukira bubahiriza amategeko

  • ZIGAMA THEONESTE
  • Ukuboza 4, 2023
  • Hashize amezi 6
Image

Minisitiri w’Intebe Dr Edourd Ngirente yasabye abari mu rwego rw’ubucukuzi bw’amabuye y’agaciro mu Rwanda gukomeza gukora cyane kugira bongere ubukire kandi bateza imbere Igihugu ariko bubahiriza amategeko.

Yabigarutseho kuri uyu wa Mbere, ubwo yatangizaga ku mugaragaro Icyumweru cyahariwe Ubucukuzi bw’amabuye y’agaciro aho n’u Rwanda rwazihije Umunsi wahariwe Abacukuzi b’Amabuye y’agaciro ku Isi, wizihizwa tariki ya 4 Ukuboza buri mwaka.

Ni ibirori byitabiriwe n’abashoramari mu ngeri zitandukanye bakora mu bucukuzi bw’abuye y’agaciro bo mu Rwanda no mu bindi bihugu by’Afurika y’Iburasirazaba.

Minisitiri w’Intebe Edourd Ngirente, yagaragaje ko urwego rw’ubucukuzi bw’amabuye y’agaciro rumaze gutera imbere, asaba abakora muri uru rwego gukora cyane kugira ngo bakire.

Yagize ati: “Imibare nabonye igaragaza ko mwakize, mukomeze mukire, mukire cyane  mwubahiriza n’amategeko hanyuma dukize Igihugu cyacu.”

Minisitiri w’Intebe kandi yijeje abari muri uru rwego ko Guverinoma y’u Rwanda izakomeza kubashyigikira ndetse inakomeza kugenzura niba ibyo bakora byubahiraza amategeko.

Yijeje nanone kandi ko Guverinoma izanaharanira kuzamura urwego rw’ubushakatsi kugira ngo hamenyekane aho amabuye y’agaciro aherereye hose mu Rwanda, ingano yayo n’ibindi.

Yanabasabye ko muri iki cyumweru cyahariwe ubucukuzi bw’amabuye y’agaciro bakwiye kwicara bakungurana ibitekerezo ku buryo banoza akazi bakora kagatanga umusaruro kurushaho.

Amb. Karitanyi Yamina, Umuyobozi Mukuru w’Ikigo gishinzwe Mine, Gaze na Petelore mu Rwanda (RMB), yagaragaje ko intego bihaye ari iyo gukorera hamwe mu kunoza ibikorwa by’ubucukuzi bw’amabuye y’agaciro.

Yagize ati: “Muri iki gihe twihiza Umunsi w’ubucukuzi bw’amabuye y’agaciro tugomba kuzirikana ku kubahiriza amategeko, tugomba kuzamura uburyo bwo gukorera mu mucyo ndetse no kugira ubwirinzi mu byo dukora, turinda abaturage baturiye aho dukorera. Ibi kandi ni tubikora bizazamura ubukungu bw’Igihugu cyacu.”

Mpendahende Amiel bita Shuni, umwe mu bacukuzi b’abamubuye y’agaciro witabiriye, ashimira Leta y’u Rwanda kuba ikomeje kubashyigikira, agahamya ko bameza gutera imbere kandi bubahira amategeko agenga aka kazi.

Ati: “Ibyo byose turabikora, abakozi tubagurira imyambaro, tubagurira ingofero, nanone tugacukura tugira ngo turengere ibidukikije. Dufite abakozi babyize ibijyanye n’ibidukikije n’abize iby’ubucukizi bw’amabuye y’agaciro, turwanya imicukurire y’akajagari”.

Kuva muri Mutara kugera muri Nzeri uyu mwaka, RMB igaragaza ko ubucukuzi bw’amabuye y’agaciro bwinjirije u Rwanda miliyoni 852 z’amadolari ya Amerika.

Ni mu gihe mu mwaka ushize wa 2022 warangiye ubwo bucukuzi bwinjirije u Rwanda amadovize agera kuri miliyoni 772 z’amadorari y’amerika.

Leta y’u Rwanda yihaye intego ko  muri  gahunda ya Guverinoma y’imyaka 7 yo kwihutisha iterambere (NST1) urwego rw’ubucukuzi bw’amabuye y’agaciro mu mwaka wa 2024 ruzinjiza miliyari 1.5 z’amadokari y’Amerika.

  • ZIGAMA THEONESTE
  • Ukuboza 4, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE