Djihad yabaye umucunguzi: Uko Abanyarwanda bakina hanze bitwaye mu mpera z’icyumweru

  • SHEMA IVAN
  • Werurwe 18, 2024
  • Hashize ukwezi 1
Image

Kapiteni w’ikipe y’igihugu Amavubi Bizimana Djihad na Rutahizamu wayo ukina anyuze ku ruhande Byiringo Lague bari mu Banyarwanda bakina hanze bahiriwe n’impera z’icyumweru.

Mu mpera ziki cyumweru dusoje mu bihugu bitandukanye, imikino ya shampiyona yarakinwe n’andi marushanwa arakomeza nubwo hari bimwe mu bihugu biri mu karuhuko.

Uko ni nako bimeze ku bakinnyi banyarwanda bagiye gukina hanze y’u Rwanda bafashije amakipe yabo nubwo hari abo shampiyona zabo zitahiriye muri iyi minsi.

Umukinnyi witwaye neza utegerejwe mu Ikipe y’Igihugu ni kapiteni Bizimana Djihad watsinze igitego ku munota wa gatanu w’inyongera kuri 90 y’umukino afasha FC Kryvbas Kryvyi Rih kwikura imbere ya Kolos Kovalivka muri Shampiyona ya Ukraine.

Bizimana n’Ikipe ye bakomeje urugendo rwo kwiruka ku Gikombe cya Shampiyna kuko banganya amanota 43 na FC Shakhtar Donetsk iyoboye urutonde rw’agateganyo.

Undi mukinnyi wagize icyumweru cyiza ni Rutahizamu Byiringiro Lague ukinira Sandvikens IF yo muri Suède ndetse ubwo yahuraga na Sollentuna mu mukino wo kwitegura Shampiyona ayitsindira igitego.

Ni igitego gifungura amazamu cyabonetse ku munota wa 11 w’umukino ndetse bagenzi be nka Alexandar Mutic na Calvin Kabuye washyizemo bibiri basozanya intsinzi y’ibitego 4-3.

Impera z’icyumweru zisize Rutahizamu Nshuti Innocent akinnye umukino wa mbere wa Shampiyona kuko yabanje mu kibuga mu mukino One Knoxville SC yo mu Cyiciro cya gatatu akinira muri Leta Zunze Ubumwe za Amerika itsinze Charlotte Independence ibitego 2-1. Uyu mukinnyi yasimbujwe ku munota wa 71.

Myugariro Imanishimwe Emmanuel ‘Mangwende’ yari ku ntebe y’abasimbura ubwo AS FAR Rabat yo muri Maroc akinira yafataga umwanya wa mbere itsinze OC Safi igitego 1-0.

Kugeza ku munsi wa 24 wa shampiyona FAR Rabat niyo iyoboye urutonde n’amanota 58.

Mu Buliligi Hakim Sahabo yakinnye umukino wahuje ikipe ye ya Standard de Liège na Eupen igatahana intsinzi y’ibitego 4-0. Ni umukino uyu musore atabanje mu kibuga ariko yinjira mu kurinda ibyagezweho kuko yagiyemo ku munota wa 85.

Muri Macedonia Myugariro Rwatubyaye Abdul yabanje mu kibuga mu mukino ikipe ye ya FC Shkupi yanganyijemo na Voska Sport 0-0 muri Shampiyona ya Macedonia.

Aba ni bamwe mu bakinnyi bitwaye neza mu gihe abandi bamaze kugera mu Ikipe y’Igihugu ndetse berekeje muri Madagascar aho bazakinira imikino ibiri ya gicuti irimo uwa Botswana tariki 22 Werurwe na Madagascar tariki 25 uku kwezi.

  • SHEMA IVAN
  • Werurwe 18, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE