Davido agiye gushimirwa guteza imbere umuziki w’Abirabura ku Isi

Umuhanzi w’icyamamare muri Nigeria na Afurika muri rusage Davido, yashyizwe ku rutonde rw’abahanzi bazahabwa icyubahiro cy’ibyamamare byakoze amateka mu muziki no mu myidagaduro y’Abirabura ku Isi muri gahunda yiswe ‘Black Music and Entertainment Walk of Fame’ 2026

Black Music and Entertainment Walk of Fame’ ni ibirori bitegurwa hagamijwe guha icyubahiro abahanzi bakoze amateka mu myidagaduro y’ababirabura ikaba yarashinzwe mu 2021.

Abategura ‘Black Music and Entertainment Walk of Fame’ babinyujije ku mbunga nkoranyambaga zabo banditse bati: “ Dutewe ishema no gutangaza umunyacyubahiro wacu wo mu Mpeshyi Davido, azahabwa icyubahiro cy’imbaraga yashyize mu kumenyekanisha Afrobeat ku Isi, Davido yafashije mu kugeza umuziki wa Afurika imbere ku rubyiniro mpuzamahanga […]”

Mu gutanga icyo cyubahiro ku bahanzi baba batoranyijwe, aho byabereye hashyirwa ibyapa bya ‘bronze’ na zahabu ku muhanda, byanditseho amazina y’ibyamamare n’ibigo byatanze umusanzu udasanzwe mu muziki no mu myidagaduro.

Davido wavukiye muri Amerika agakurira muri Nigeria, amaze kuba umwe mu bahanzi bafite izina rikomeye mu gukora neza injyana ya Afrobeats ku rwego mpuzamahanga.

Mu rugendo rwe rw’umuziki amaze gukusanya abarenga miliyari eshanu bumvise indirimbo ze kuri murandasi kandi amashusho y’indirimbo ze amaze kurebwa inshuro zirenga miliyari 1.2.

Mu 2023, yabaye umuhanzi wa mbere wo muri Afurika ugejeje album ye ku mwanya wa mbere kuri iTunes Album Chart binyuze kuri album ye yise Timeless, yanamuhesheje guhatana mu byiciro bitatu muri Grammy Awards.

Album ye ya gatanu yise 5IVE, yasohotse muri Mata 2025, na yo yamuhesheje guhatana mu byiciro bibiri birimo n’icya ‘Best African Music Performance’ muri Grammy Awards za 68. Ibyatumye abarwa nk’umuhanzi umaze guhatana mu byiciro bitanu muri Grammy Awards.

Guhabwa icyo cyubahiro kuri Davido bigaragaza indi ntambwe ishimangira uko injyana ya Afrobeats aririmbamo ikomeje kwigarurira isi no guhabwa agaciro mu ruhando mpuzamahanga rw’umuziki.

Uretse Davido uzahabwa icyo cyubahiro harimo ibindi byamamare nka Ludacris, umwe mu baraperi bakoze amateka muri Atlanta, umaze kugurisha kopi za album ze zirenga miliyoni 24 ku Isi ndetse akaba afatwa nk’umuraperi wagurishije cyane kurusha abandi.

Abategura ‘Black Music and Entertainment Walk of Fame’ batangaje ko icyiciro cya 2026 kiri mu bikomeye byabayeho kuva iyi gahunda ryatangira mu myaka itanu ishize.

Bitegnyijwe ko uwo muhango uzaba tariki ya 1 Kamena 2026, ukazabera mu gace ka Historic Westside mu Mujyi wa Atlanta, hafi ya Stade ya Mercedes-Benz Stadium.