CHENO irasaba Abanyarwanda kwimakaza ibikorwa by’ubutwari

  • ZIGAMA THEONESTE
  • Mutarama 5, 2024
  • Hashize amezi 5
Image

Ubuyobozi bw’Urwego rushinzwe Intwari z’Igihugu, Imidari n’Impeta z’Ishimwe (CHENO), bwasabye Abanyarwanda kwimakaza ibikorwa by’ubutwari kuko ari ko gaciro kabo.

Byagarutsweho kuri uyu wa Gatanu tariki ya 05 Mutarama 2024, ubwo hatangizwaga Ukwezi kwahariwe ibikorwa by’Ubutwari mu rwego rwo kwitegura Umunsi w’Intwari z’Igihugu uzaba ku ya 1 Gashyantare 2024.

Umunsi w’Intwari z’Igihugu ni umunsi ngarukamwaka Abanyarwanda n’inshuti zabo bazirikana kandi bagasingiza Intwari z’Igihugu kubera ibikorwa by’ikirenga kandi by’ingirakamaro byabaranze.

Muri uyu mwaka, Umunsi w’Intwari z’lgihugu uzizihizwa ku nshuro ya 30, ufite insanganyamatsiko igira iti: “Ubutwari mu Banyarwanda, Agaciro kacu.”

Hashingiwe kuri iyi nsanganyamatsiko, CHENO ishishikariza Abanyarwanda kwimakaza ibikorwa by’ubutwari gukomeza guharanira kwigira, kwihesha agaciro, kwishakamo ibisubizo, gusigasira, kubungabunga ibyagezweho no kwihitiramo ibibabereye nk’Abanyarwanda.

Nkusi Deo, Umunyamabaganga Nshingwabikorwa wa CHENO, mu kiganiro n’itangazamakuru yasabye Abanyarwanda ko muri iki gihe cyahariwe ibikorwa by’ubutwari bakwihatira gukora ibikorwa byo gufashanya no kwishimira ibyagezweho.

Yagize ati: “Hari bashobora gukora ku rwego rw’Umudugudu n’ubusabane n’imikino itandukanye ni ukwishimira ibikorwa, kuremera ab’amikoro make cyane cyane ibikorwa biteza imbere bikanashimangira umuco n’ubumwe bw’Abanyarwanda.”

CHENO igaragaza ko uku kwezi kwahariwe ibikorwa by’ubutwari kuzageza tariki ya 31 Mutarama 2024, kuzarangwa n’ibiganiro byibanda ku gushikariza urubyiruka gukora ibikorwa by’ubutwari.

Ni ibiganiro bizakorwa binyujijwe mu bitangazamakuru, mu mashuri yisumbuye, amakuru na kaminuza, mu nzego za leta n’izitari iza Leta.

Hazakorwa kandi amarushanwa “Ubutwari Tournament” mu mikino na siporo zinyuranye; igitaramo gisingiza Intwari z’lgihugu kizaba tariki ya 31 Mutarama 2024 n’ibindi bikorwa higamije gukangurira Abanyarwanda indangagaciro z’umuco w’ubutwari.

Ni ukwezi kandi CHENO ivuga ko ibiganiro bizaba byibanda mu gushikariza urubyiruko kugira umuco w’ubutwari no gusigasira ibyagezweho.

Tariki ya 1 Gashyantare 2024, ni umunsi nyir’izina wo kwizihiza Umunsi w’Intwari z’Igihugu. Kuri uyu munsi kandi hazaba ibirori n’ibiganiro ku rwego rw’Imidugudu.

CHENO igaragaza ko bimwe mu bikorwa bishobora gutegurwa muri buri Mudugudu ari ibiganiro, ubusabane, imikino itandukanye, gutaha ibikorwa/ kwishimira ibyagezweho, gushimira ababaye indashyikirwa, kugabirana, kuremera abatishoboye, n’ibindi bikorwa biteza imbere bikanashimangira ubutwari, umuco n’ubumwe by’Abanyarwanda.

Umunsi w’Intwari kandi wizihizwa n’Abanyarwanda n’inshuti zabo baba mu mahanga.

Ku bufatanye na Minisiteri y’Ububanyi n’Amahanga (MINAFFET) na Ambasade z’u Rwanda mu bihugu binyuranye, Abanyarwanda baba mu mahanga na bo bazizihiza Umunsi w’Intwari z’Igihugu.

Kugeza ubu Intwa z’u Rwanda ziri mu byiciro bitatu ari byo Ingenzi harimo Gen Major Fred Gisa Rwigema n’umusirikare utazwi (uhagarariye ingabo zose z’u Rwanda zitangiye Igihugu  zaguye ku rugamba ndetse n’izashoboraga kurugwaho mu gihe cyahise icyubungubu n’ikizaza zirwanirira igihugu).

Hari kandi icyiciro cy’Intwari z’Imena harimo Umwami Mutara III Rudahigwa Charles Leo Pierre, Michel Rwagasana, Agatha Uwingiyemana, Felicite Niyitegeka n’Abanyeshuri b’Inyange banze kwitandukanya ubwo baterwaga n’Abacengezi.

Mu cyiciro cy’Ingenzi habarizwamo Intwari y’Imena ikaba inkwakuzi mu kugaragaza  ibitekerezo cyangwa ibikorwa by’ingirakamaro birangwa n’ubwitange buhebuje akamaro gakomeye  n’urugero ruhanitse.

Icyakora muri icyo cyiciro nta ntwari irashyirwamo.

CHENO isobanura ko ubushakashatsi bugikomeza ku bakoze ibikorwa by’ubutwari n’ibindi bikorwa byatuma bagirwa intwari z’Igihugu.

  • ZIGAMA THEONESTE
  • Mutarama 5, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE