Nyuma y’amezi abiri, imikino ya UEFA Champions League yasubukuwe ibanza ya 1/8, Real Madrid yatsinze RB Leipzig igitego 1-0 naho Manchester City (Man City) itsinda FC Copenhagen 3-1.
Mu ijoro ryo ku wa 13 Gashyantare 2024, ni bwo hatangiye gukinwa imikino y’amakipe meza i Burayi ya UEFA Champions League hakinwa imikino ibanza ya ⅛.
Real Madrid yo muri Espagne yari yasuye RB Leipzig yo Budage yari imbere y’abakunzi bayo ishaka amanota atatu yayifashije kuzakina umukino wo kwishyura yemye.
RB Leipzig yatangiye neza uyu mukino kuko ku munota wa kabiri gusa, Benjamin Šeško yari yamaze gushyira umupira mu rucundura ariko umusifuzi wari kuri uyu mukino, Irfan Peljto, avuga ko yahawe umupira yaraririye.
Nyuma yo kubona ko bitoroshye Real Madrid yatangiye gusatira cyane ishaka igitego ariko ntiyabona igitego.
Amakosa yakoze mu cya mbere yayahinduye mu cya kabiri ubwo yatsindaga igitego cya mbere cyinjijwe na Brahim Diaz ku mupira mwiza yahawe na Dani Carvajal.
Iki ni na cyo gitego cyabonetse muri uyu mukino mugihe umukino wo kwishyura uteganyijwe tariki 6 werurwe 2024, ku kibuga Santiago Bernabéu cya Real Madrid.
Mu mukino Manchester City yo mu Bwongereza ifite igikombe giheruka yari yasuye FC Copenhagen yo muri Denmark.
Ni umukino wari unogeye ijisho ku washoboye kuwureba ndetse na bimwe mu bitego byinjijwe byari byiza ku mpande zombi nubwo Man City ari yo yacyuye amanota atatu itsinze 3-1.
Ibi ni ibitego byatangiye kujyamo ku munota wa 10 ubwo Phil Foden yaherezaga umupira Kevin De Bruyne wari uhagaze neza mu rubuga rw’amahina ahita ashyira umupira mu izamu.
Ku munota wa 21 FC Copenhagen yishyuye iki gitego ku ishoti rikomeye cyane Magnus Mattsson yatereye inyuma y’urubuga rw’umunyezamu.
Mbere y’uko igice cya mbere kirangira Manchester City yatsinze igitego cya kabiri cyatsinzwe na Bernardo Silva ku munota wa 45+1 aherejwe umupira na De Bruyne wakinnye neza uyu mukino.
Igitego cy’agashinguracumu cyagiyemo mu gice cya kabiri gitsinzwe na Phil Foden wabifashijwemo na Kevin De Bruyne ku munota wa 90+2.
Umukino warangiye ari ibitego 3-1 bifasha Manchester City kuzakina umukino wo kwishyura idahangayitse cyane.
Uko imikino ya ⅛ isigaye iteganyijwe:
Ku wa Gatatu, tariki 14 Gashyantare 2024
Lazio Roma irakira Bayern Munich saa yine z’ijoro
Paris Saint-Germain irakina na Real Sociedad saa yine z’ijoro
Ku wa Kabiri, tariki 20 Gashyantare 2024
Inter Milan izakira Atletico Madrid saa yine zijoro
PSV Eindhoven izakira Borussia Dortmund saa yine z’ijoro
Ku wa Gatatu, tariki 21 Gashyantare 2024
FC Porto izakira Arsenal saa yine z’ijoro
Napoli izakira Barcelona saa yine z’ijoro
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE