CAN2023: Afurika y’Efo yegukanye umwanya wa Gatatu

  • SHEMA IVAN
  • Gashyantare 11, 2024
  • Hashize amezi 3
Image

Ikipe y’igihugu ya Afurika y’Efo Bafana Bafana, yatsinze Repubulika Iharanira Demokarasi ya Congo Penaliti 6-5, nyuma gusoza iminota 120 amakipe yombi anganyije ubusa ku busa, yegukana umwanya wa gatatu mu gikombe cy’Afurika.

Uyu mukino w’umwanya wa gatatu wabaye mu ijoro ryo ku wa Gatandatu, tariki 10 Gashyantare 2024.

Amakipe yombi yari yahinduye abakinnyi yari amaze iminsi akoresha, abatoza batanga amahirwe ku batarabonye umwanya uhagije wo gukina muri iri rushanwa.

Ibi byatumye umukino utangira utuje, amakipe yombi yigana, gusa Repubulika Iharanira Demokarasi ya Congo ikanyuzamo igasatira binyuze kuri Elia Mechak.

Igice cya mbere cyarangiye amakipe yombi anganya ubusa ku busa.

RDC yakomeje gusatira bikomeye no mu gice cya kabiri ariko Mechak na Simon Banza ntibabyaze umusaruro amahirwe babonaga.

Mu minota 60, umukino watangiye kwihuta amakipe yombi atangira guhushanya ibitego.

Ku munota wa 65, Mechak yazamukanye umupira yihuta, myugariro w’Afurika y’Epfo awukuraho nabi, uyu mukinnyi akomeza kuwusanganira awuhindura imbere y’izamu usanga Silas Katompa ahagaze wenyine awutera hanze.

Nyuma y’iminota itatu, Afurika y’Epfo na yo yahushije uburyo bukomeye cyane, ku mupira Mihlali Miyambera yacomekewe azamuka wenyine asigaranye n’umunyezamu atera agashoti gato cyane.

Umutoza wa Repubulika Iharanira Demokarasi ya Congo, Sébastien Desabre yatangiye gukora impinduka yinjiza mu kibuga Yoane Wissa, Fiston Mayele na Cédric Bakambu.

Afurika y’Epfo yakomeje kurushwa bigaragara, cyane ko yari yasubiye inyuma wabonaga ko ikina icungira ku mipira RDC itakaje.

Ku munota wa 90, Samuel Moutoussamy yateye umupira muremure Mayele awushyira neza ku gituza, atera ishoti rica hanze gato cyane y’izamu.

Umukino warangiye amakipe yombi akomeje kunganya ubusa ku busa, hitabazwa penaliti.

Afurika y’Epfo ni yo yateye iya mbere, Teboho Mokoena arayihusha. RDC yakurikiyeho itsinda enye zayo neza cyane.

Kapiteni wa RDC, Chancel Mbemba yahushije penaliti ya gatanu yakuwemo n’umunyezamu Ronwen Williams, Afurika y’Epfo isubira mu mukino.

Amakipe yombi yongeye gutsinda imwe ku yindi, umunyezamu Williams akuramo penaliti ya Mechak Elia, Afurika y’Epfo yegukana intsinzi utyo kuri penaliti 6-5.

Afurika y’Efo yaherukaga umudali mu gikombe cy’Afurika muri 2000 aho yari yabaye iya Gatatu nanone

Umukino wa nyuma uteganyijwe kuri iki  Cyumweru, tariki 11 Gashyantare 2024, aho uhuza Ikipe y’Igihugu ya Côte d’Ivoire n’iya Nigeria saa nyine zijoro.

  • SHEMA IVAN
  • Gashyantare 11, 2024
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE