CAN 2023: Bigoranye, Nigeria yageze ku mukino wa nyuma

  • SHEMA IVAN
  • Gashyantare 7, 2024
  • Hashize ibyumweru 4
Image

Ikipe y’Igihugu ya Nigeria yageze ku mukino wa nyuma wa w’Igikombe cy’Afurika nyuma yo gutsinda Afurika y’Epfo penaliti 4-2, ubwo amakipe yombi yari anganyije igitego 1-1 mu minota 120.

Uyu mukino wa mbere wa ½ wabaye ku mugoroba wo kuri uyu wa Gatatu tariki 7 Gashyantare 2024 kuri Stade de La Paix.

Ni umukino watangiye utuje amakipe yombi yigana bikomeye, ibyatumaga igice cya mbere kitaryoha cyane bityo amakipe yombi agisoza anganya ubusa ku busa.

Nigeria yasubiranye imbaraga mu gice cya kabiri, irasatira bikomeye ariko uburyo Ademola Lookman na Victor Osimhen babonaga ntibubyare umusaruro.

Osimhen yongeye kuzamukana umupira, ategerwa mu rubuga rw’amahina, umusifuzi atanga penaliti. Yinjijwe neza na Kapiteni William Troost-Ekong atsinda igitego cya mbere cya Nigeria ku munota wa 67.

Afurika y’Epfo ntiyacitse intege yakomeje gusatira bikomeye ariko uburyo bwinshi Evidence Makgopa yabonaga nta bubyaze umusaruro. Ku munota wa 84, Tau Percy yakorewe ikosa mu rubuga rw’amahina ariko umusifuzi ntiyatanga ikosa. ‘

Uwo mupira wahise uzamukanwa na Lookman yihuta cyane, awucomekera Bright Osayi-Samuel awuhindura imbere y’izamu, usanga Victor Osimhen atsinda igitego cya kabiri, ku munota wa 86.

Umusifuzi yifashishije VAR, igitego yacyanze ahubwo asubira inyuma atanga rya kosa rya mbere ryakorewe Percy bityo biba penaliti.

Yinjijwe neza na Teboho Mokoena yishyura igitego ku munota wa 90. Umukino warangiye amakipe yombi anganya igitego 1-1 hashyirwaho iminota 30 yinyongera.

Muri iyi mikino amakipe yombi yakomeje gusatirana ashaka igitego cy’intsinzi ariko kirabura. Ku munota wa 114, Terem Moffi yazamukanye umupira yihuta ariko Grant Kekana aramutega, umusifuzi atanga penaliti.

Yongeye kwifashisha VAR ya penaliti ayikuraho ahubwo asanga yategewe hanze y’urubuga rw’amahina, atanga ‘coup franc’ n’ikarita y’umutuku kuri Grant Kekana. Iminota 120 yarangiye amakipe yombi akomeje kunganya igitego 1-1 yerekeza muri penaliti.

Nigeria yitwaye neza muri penaliti eshanu itsindamo enye, mu gihe Afurika y’Epfo yatsinze ebyiri muri enye yateye.

Ikipe y’Igihugu ya Nigeria yageze ku mukino wanyuma, yaherukagamo muri 2013.

Ku mukino wa nyuma uzaba ku Cyumweru, Nigeria izahura n’ikipe ikomeza hagati ya Côte d’Ivoire na Repubulika Iharanira Demokarasi ya Congo.

Umukino wanyuma uteganyijwe ku Cyumweru, tariki 11 Gashyantare 2024 saa nyine zijoro. Naho umukino wo guhatanira umwanya wa gatatu uzakinwa ku wa Gatandatu tariki 10 Gashyantare 2024 saa nyine zijoro.

  • SHEMA IVAN
  • Gashyantare 7, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE