Burkina Faso yiyemeje kwigira ku bunyamwuga bwa Polisi y’u Rwanda

  • Imvaho Nshya
  • Ugushyingo 22, 2023
  • Hashize amezi 6
Image

Umuyobozi Mukuru wa Polisi ya Burkina Faso Gen. Dr Roger OueDraogo, yatangaje ko Igihugu cye cyifuza kwigira ku bunararibonye n’imikorere ntangarugero bya Polisi y’u Rwanda.

Icyo gihugu kandi cyifuza gufatanya n’u Rwanda mu kurwanya iterabwoba no guhangana n’ibindi bibazo bihungabanya umutekano ku mugabane wa Afurika. 

Yabigarutseho ku wa Kabiri tariki ya 21 Ugushyingo, ubwo we n’itsinda ryaje rimuherekeje mu ruzinduko rw’akazi mu Rwanda bakirwaga n’Umuyobozi Mukuru wa Polisi y’u Rwanda (IGP), CG Felix Namuhoranye.

Mu nama yahuje impande zombi, IGP Namuhoranye yashimiye mugenzi we kuba barahisemo gusura u Rwanda, avuga ko bitanga amahirwe ku nzego zombi Polisi y’u Rwanda n’iya Burkina Faso yo guhuza ibitekerezo no kungurana ubumenyi bujyanye n’ibikorwa byo gucunga umutekano.

Yagize ati: “Tubashimiye kuba mwarahisemo gusura igihugu cyacu na Polisi y’u Rwanda by’umwihariko. Uru ruzinduko ni amahirwe yo guhuza ibitekerezo no kungurana ubunararibonye ku bijyanye no gucunga umutekano.”

Yakomeje ati: “Hashize imyaka 23 Polisi y’u Rwanda ishinzwe nyuma y’imyaka 6 gusa habaye Jenoside yakorewe Abatutsi mu 1994. Muri icyo gihe kitari kirekire hibanzwe ku kubaka ubushobozi, hashyirwa imbaraga nyinshi mu mahugurwa no gushaka ibikoresho bigezweho byo kwifashisha mu kazi ko gucunga umutekano mu rwego rwo kuzamura urwego rw’imikorere ya ngombwa yo gucunga umutekano mu Rwanda ndetse no hanze yarwo mu butumwa bwo kubungabunga amahoro, aho u Rwanda rwohereza abapolisi.”

Intumwa za Burkina Faso zagiranye ibiganiro n’ubuyobozi bukuru bwa Polisi y’u Rwanda

IGP Namuhoranye yagaragaje ko ibihugu byombi bifite byinshi bihuriyeho, uru ruzinduko rukazafasha mu gushyiraho ingamba zo gukemura ibibazo by’umutekano bikigaragara ku mpande zombi.

IGP Namuhoranye yavuze ko u Rwanda rwagiye rugaragaza ko rwiteguye kugira uruhare mu kwihuza n’ibindi bihugu mu miryango itandukanye mu Karere no ku rwego Mpuzamahanga mu byerekeranye n’ubufatanye mu by’umutekano kandi ko byagiye bitanga umusaruro ufatika bityo ko Polisi y’u Rwanda yishimiye gukorana n’inzego z’umutekano za Burkina Faso mu ngeri zitandukanye zirimo amahugurwa no gukumira ibyaha.

Controller General  Dr.  Ouedraogo mu ijambo rye, yishimiye uko we n’intumwa ayoboye bakiriwe mu Rwanda, avuga ko hari byinshi bazabasha kwigira ku mikorere y’intangarugero ya Polisi y’u Rwanda.

Yagize ati: “Twabashije kwibonera ishusho y’umusanzu wa Polisi y’u Rwanda mu kubaka umutekano n’iterambere ry’igihugu, ibikorwa bitandukanye byo guteza imbere imibereho myiza y’abaturage Polisi ikora ifatanyije na bo ndetse n’ubufatanye n’abaturage mu gukumira no kurwanya ibyaha nk’urugero ruzadufasha kunoza imikorere ku nzego zacu z’umutekano.”

Muri uru ruzinduko bagirira mu Rwanda, bazasura amashuri ya Polisi y’u Rwanda n’amashami atandukanye hirya no hino mu gihugu.

  • Imvaho Nshya
  • Ugushyingo 22, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE