Burkina Faso: Abasivili 15 biciwe mu misa

Abasivili 15 bishwe abandi babiri barakomereka ubwo bari mu misa mu Majyaruguru ya Burkina Faso nkuko byatangajwe n’ubuyobozi.

Ku Cyumweru ni bwo iyo Kiliziya yagabweho igitero cy’iterabwoba nkuko France 24 yabitangaje.

Umukuru  wa diyosezi ya Dori, Jean-Pierre Sawadogo, yagize ati: “Igitero cy’iterabwoba cyabaye mu Mududugudu wa Essakane ku wa 25 Gashyantare cyaguyemo inzirakarengane zari mu misa”.

Yatangarije AFP ko umubare w’agateganyo w’abahitanywe na cyo ari 15 mu gihe babiri bakomeretse.

Sawadogo yasabye ko igihugu cyagira amahoro n’umutekano.

Iki ni ikindi gitero cy’iterabwoba cyibasiye amatorero ya gikirisitu, mu gihe igiheruka cyashimutiwemo abapadiri.

Burkina Faso yibasiwe n’ibitero by’iterabwoba ndetse inyeshyamba zigendera ku matwara ya kiyisilamu zahasesekaye guhera mu mwaka 2015.

Bitewe no kuba Guverinoma yarananiwe guhosha amakimbirane yagiye arangwa n’ihirikwa ry’ubutegetsi bugafatwa n’igisirikare, ndetse abagera ku 20 000 bahitanywe n’ibitero mu gihe abasaga miliyoni ebyiri bavanywe mu byabo.