Bigoranye Rayon sports yakuye amanota i Ngoma, Gasogi United ibona intsinzi

  • SHEMA IVAN
  • Gashyantare 17, 2024
  • Hashize amezi 2
Image

Imikino yabaye kuri uyu wa Gatandatu tariki 18 Gashyantare 2024 ku bibuga bitandukanye byo hirya no hino mu gihugu yarangiye Rayon sports itsinze Etoile de l’Est 1-0, Gasogi United itsinda Gorilla FC 1-0 mu mikino y’umunsi wa 21 wa shampiyona.

Umukino wa Gasogi United na Gorilla FC wabereye kuri Kigali Pele Stadium watangiye ikipe ya Gasogi United isatira, bidatinze ku munota wa 10, Muderi Akbar atsinda igitego cya mbere ku ishoti rikomeye yateye, umunyezamu Matumele Arnaud abura aho umupira unyuze.

Iyi kipe yakomeje gukina neza ari na ko yiharira umupira cyane. Ku rundi ruhande Gorilla FC umukino wari wayigoye kuko muri iki gice yakoze impinduka ebyiri.

Irakoze Darcy wagize imvune yasimbuwe na Nsengiyumva Mustafa, mu gihe Nsengiyumva Samuel umukino wananiye yatanze umwanya uhabwa Nshimiyimana Tharcisse.

Mu minota ya nyuma y’iki gice, amakipe yombi yakomeje gusatirana ariko igitego kirabura. Igice cya Mbere cyarangiye Gasogi United yatsinze Gorilla FC igitego 1-0.

Mu gice cya kabiri Gorilla FC yagarukanye imbaraga itangira gusatira cyane ishaka igitego cyo kwishyura.

Mu minota 75, Gasogi United yongeye gusubira hejuru iyobora umukino cyane ko impinduka yakoze za Mugisha Joseph na Lisele Lisomba zayifashaga.

Gorilla FC yakomeje gusatira ishaka igitego cyo kwishyura ariko umunyezamu, Ibrahima Dauda ayibera ibamba.

Umukino warangiye, Gasogi United yatsinze Gorilla FC igitego 1-0. Iyi kipe yongera kubona intsinzi nyuma y’imikino ine idatsinda, iheruka gutsinda tariki 13 Mutarama 2024 itsinda Etincelles Ibitego 2-1.

Mugihe Gorilla FC ikomeje kujya ahabi yujuje imikino itanu ntatsinzi muri shampiyona.

Gasogi United yahise ifata umwanya wa munani n’amanota 26, mu gihe Gorilla FC igeze ku wa 13 n’amanota 21.

Mu wundi mukino Rayon sports yari yasuye Etoile de l’Est yanyuma ku rutonde rwa shampiyona.

Uyu mukino wabereye kuri stade ya Ngoma warangiye Rayon sports itsinze Etoile de l’Est igitego kimwe ku busa cyatsinzwe na Kapiteni Muhire Kevin ku munota wa 89.

Rayon sports yahise igira amanota 42 iguma ku mwanya wa kabiri irushwa na APR FC ya mbere amanota atatu inafite imikino ibiri y’ibirarane.

Etoile de l’Est ikomeje gukomanga ku muryango w’icyiciro cya kabiri kuko iracyari ku mwanya wa nyuma n’amanota 13 gusa.

Uko indi mikino yagenze uyu munsi

Musanze FC 1-1    Etincelles FC

Sunrise FC 2-4 Mukura Victory sports

Ku Cyumweru tariki 18 Gashyantare 2024

Bugesera FC izakira APR FC saa cyenda

As Kigali izakira Marines FC

Muhazi United izakira Police FC

  • SHEMA IVAN
  • Gashyantare 17, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE