BDF yasinye amasezerano ya miliyari 25 Frw yo gushora mu buhinzi

  • ZIGAMA THEONESTE
  • Ukuboza 13, 2023
  • Hashize amezi 5
Image

Ikigega gishinzwe guteza imbere imishinga mito n’iciriritse (BDF) cyasinye amazerano y’ubufatanye n’umushinga Hinga Wunguke, agamije gufasha Abanyarwanda bafite imishinga y’ubuhinzi ariko bafite imbogamizi zo kubona ingwate muri banki no kugorwa n’inyungu nyinshi bakwa.

Ni amasezerano afite agaciro ka miliyari 25 y’u Rwanda, yashyizweho umukono, ku ya 12 Ukuboza 2023, hagati y’Umuyobozi Mukuru wa BDF, Munyeshyaka Vincent, n’Umuyobozi Mukuru wa Hinga Wunguke, Daniel Gies.

Ayo mafaranga azagezwa muri za SACCO 186 n’ibindi bigo bitera inkunga urwego rw’ubuhinzi mu Turere 13 umushinga Hinga Wunguke uterwa inkunga n’Ikigo cy’Abanyamerika gishinzwe Iterambere Mpuzamahanga (USAID) ukoreramo.

Utwo Turere ni Bugesera, Burera, Gakenke, Gatsibo, Karongi, Kayonza, Ngoma, Nyabihu, Nyamagabe, Nyamasheke, Ngororero, Rubavu, ndetse na Rutsiro.

Impande zombi zavuze ko aya masezerano azafasha gukemura ikibazo cy’inguzanyo zidahagije ku bahinzi kuko hari abagorwa no kubona ingwate kugira ngo babone amafaranga yo gushora mu bikorwa byo kongera umusaruro.

Munyeshya Vincent, Umuyobozi Mukuru wa BDF yavuze ko ubu bufatanye uretse kwagura ishoramari mu buhinzi, buzafasha abahinzi kongera ubwiza n’ingano y’ibyo bohereza ku masoko.

Yagize ati: “Hinga Wunguke izashyira mu bikorwa ingamba zo gufasha abahinzi-borozi kugira ngo ibigo by’imari byongere ubushake bwo gushora imari mu buhinzi.”

Daniel Gies, yashimangiye ko bagamije gukuraho inzitizi zirimo ingwate yatumaga abahinzi batabona inguzanyo ku nyungu yo hasi.

Yagaragaje ko bazakorana na BDF ndetse n’abandi bafatanyabikorwa kugira ngo izo nzitizi abahinzi bahura na zo zivanweho.

Yagize ati: ”Ikibazo abahinzi bakomeje guhura na cyo ni ukubura ingwate zigabanya ubushobozi bwabo bwo kubona inkunga ikenewe kandi turateganya gufatanya na BDF ndetse n’abandi bafatanyabikorwa mu gukemura iki kibazo.”

Byitezwe ko aya masezerano azagira uruhare ruri hagati ya 50 na 70% mu kuzamura urwego rw’ubuhinzi ndetse n’abahinzi ubwabo kuko ari ho abashoramari mu buhinzi bazaba boroherezwa gushora imari by’umwihariko kugurisha ifumbire yaba iy’imvaruganda cyangwa se iy’imborera mu rwego rwo kuzamura ubuhinzi bita ku bihingwa bikenewe ku masoko.

RAB igaragaza ko muri miliyoni 13 z’Abanyarwanda abantu 76% bakora ubuhinzi.

Ni mu gihe ubushakashatsi bwa gatanu ku mibereho y’ingo mu Rwanda (EICV5) bwagaragaje ko abarenga 62.2% by’urubyiruko rukora ubuhinzi, ubworozi, uburobyi n’ibirebana n’amashyamba.

Ikigo cy’Igihugu gishinzwe iterambere ry’Ubuhinzi n’Ubworozi (RAB), gitangaza ko ubuhinzi mu Rwanda bukwiye kwitabwaho kuko bwihariye 40% by’ubukungu bw’Igihugu.

Minisiteri y’Ubuhinzi n’Ubworozi, igaragaza ko kugira ngo abagana ubuhinzi by’umwihariko urubyiruko bakomeze kwiyongera, hazakomeza gushyirwaho ingamba zigamije kuborohereza zirimo no kubafasha kubona igishoro.

  • ZIGAMA THEONESTE
  • Ukuboza 13, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE